इडली पिठाचे अप्पे - Appe

Appe in English

वेळ: २० मिनिटे
१५ अप्पे

साहित्य:
२ ते अडीच कप इडलीचे आंबवलेले पीठ
१ टीस्पून आले पेस्ट
३-४ कढीपत्ता पाने बारीक चिरून (ऐच्छिक)
२ टेस्पून कोथिंबीर, बारीक चिरून (ऐच्छिक)
दीड टीस्पून हिरव्या मिरच्यांची पेस्ट, भरडसर
चवीपुरते मीठ
२ ते ३ टेस्पून तेल, अप्पे बनवताना

कृती:
१) मीठ, आले पेस्ट,कोथिंबीर, कढीपत्ता आणि हिरव्या मिरच्यांची पेस्ट घालून इडलीचे पीठ मिक्स करावे.
२) अप्पे पात्र गॅसवर गरम करण्यास ठेवावे. प्रत्येक कप्प्यात दोनदोन थेंब तेल घालावे. इडलीचे पीठ चमच्याने घालून कप्पे भरावेत. झाकण ठेवून मध्यम आचेवर ३ ते ४ मिनिटे वाफ काढावी.
३) झाकण काढून अप्प्यांचे पृष्ठभाग तेलाने ब्रश करावे. अप्प्यांची बाजू पलटवावी. थोडेसे प्रेस करावे. परत झाकण ठेवून २ ते ३ मिनिटे अप्पे वाफवून घ्यावेत.
गरम अप्पे चटणीबरोबर सर्व्ह करावेत.

खजुराचे लाडू - Khajurache Ladoo

Dates Laddu in English

वेळ: १५ मिनिटे
१० ते १२ लहान लाडू

साहित्य:
२५ खजूर, बिया काढून (मिक्सरमध्ये भरडसर वाटून १ कप)
१/२ कप बदाम, भरडसर वाटून
१/२ कप किसलेले सुके खोबरे, गुलाबीसर भाजून
१ टेस्पून तूप
१ टीस्पून खसखस

कृती:
१) खजुराच्या बिया काढून खजूर मिक्सरमध्ये भरडसर वाटून घ्यावे. नॉनस्टिक पॅनमध्ये तूप गरम करावे त्यात खसखस घालून काही सेकंद परतावे. त्यात भरडसर वाटलेले बदाम, खोबरे आणि खजूर घालून मंद आचेवर गरम करावे.
२) नीट मिक्स झाले कि थाळीमध्ये काढून ठेवावे. हाताच्या तळव्यांना थोडे तूप लावून मिश्रण कोमटसर असतानाच लाडू बांधावेत.
शक्यतो एक ते दोन घासात संपेल इतपतच लाडूचा आकार असावा. खजूर उष्ण असतात एक लाडू आणि त्यावर ग्लासभर दुध प्यायल्यास शरीराला भरपूर उष्मांक मिळतात.

टीपा:
१) साध्या खजूराप्रमाणेच काळ्या खजूराचेही अशाप्रकारे लाडू करू शकतो.
२) मी फक्त बदामच वापरले होते. आवडीनुसार पिस्ता किंवा काजू असे सर्व मिळून अर्धा कप वापरू शकतो. जर जास्त ड्राय फ्रुट्स वापरायची असतील तर खजूराचे प्रमाणही वाढवावे. नाहीतर लाडू नीट बांधले जात नाहीत.
३) तुपाचे प्रमाण आवश्यकतेनुसार वाढवावे.
४) मी बदामाच्या रेडीमेड काप मिळतात ते वापरले होते. ते शक्यतो वापरू नयेत कारण लाडू बांधायला थोडे त्रासदायक पडते.
५) खजूराला ओलसरपणा असावा. कोरडे खडखडीत खजूर लाडवांसाठी चांगले लागत नाहीत.

फोडणीचा पाव - phodanicha paav

Bread chi Usal in English

वेळ: १० मिनिटे
वाढणी: २ जणांसाठी

साहित्य:
१० ब्रेडचे स्लाईसेस
२ टेस्पून तेल
फोडणीसाठी: २ चिमटी मोहोरी, १ चिमटी हिंग, १/८ टीस्पून हळद, ४-५ कढीपत्ता पाने
२ हिरव्या मिरच्या, उभ्या चिरून (किंवा २ सुक्या लाल मिरच्या मोडून)
१/४ कप कांदा, बारीक चिरून
चवीपुरते मीठ आणि साखर
कोथिंबीर सजावटीसाठी
१ टीस्पून लिंबाचा रस

कृती:
१) ब्रेडच्या स्लाईसेसचे छोटे चौकोनी तुकडे करून घ्यावे. किंवा हातानेच तुकडे करावे.
२) कढईत तेल गरम करून मोहोरी, हिंग, हळद, आणि कढीपत्ता घालून फोडणी करावी. हिरव्या मिरच्या आणि कांदा घालून परतावा.
३) कांदा परतताना मीठ घालावे आणि कांदा पारदर्शक होईस्तोवर परतावा.
४) ब्रेडचे तुकडे घालून २ चिमटी साखर पेरावी.
५) झाकण ठेवून मिडीयम आचेवर २-३ मिनिटे वाफ काढावी.
लिंबाचा रस आणि कोथिंबीर घालून गरमच सर्व्ह करावे.

टीपा:
१) ब्रेड मिक्सरमध्ये बारीक करून घेतला तरीही चालतो.

घावन घाटले - Ghavan Ghatle

Ghavan Ghatle in English



चकलीच्या सर्व वाचकांना गणेश चतुर्थीच्या हार्दिक शुभेच्छा!!

गणपतीला नैवेद्य दाखवण्यासाठी खास रेसिपीज - इथे क्लिक करा



काही दिवसातच गौरींचे आगमन होईल. इतर गोड पदार्थांबरोबरच घावन आणि घाटले हा पारंपारिक पदार्थ गौरींना नैवेद्य म्हणून दाखवायची प्रथा आहे. त्याची कृती पुढील प्रमाणे. नक्की करून पहा!!



घावनाचे साहित्य आणि कृती



वेळ: पूर्वतयारी- ५ मिनिटे | पाकृसाठी - २५ मिनिटे

वाढणी: ८ ते ९ मध्यम घावने

साहित्य:

१ कप तांदुळाची पिठी

२ कप दुध / पाणी

चिमूटभर मीठ

घावन बनवण्यासाठी तूप



कृती:

१) तांदुळाचे पीठ, दुध, आणि मीठ एका वाडग्यात मिक्स करावे. गुठळ्या राहणार नाहीत याची काळजी घ्यावी.

२) नॉनस्टिक तवा मिडीयम फ्लेमवर गरम करावा. तवा गरम झाला कि थोडे तूप घालावे. आणि त्यावर डावभर मिश्रण घालून पसरावे. झाकण ठेवून एक बाजू किमान २ ते ३ मिनिटे शिजू द्यावी. बाजू पालटून झाकण ठेवून दुसरी बाजू शिजवावी. जर असे वाटले कि पूर्ण शिजले नाहीये तर अजून थोडावेळ झाकण ठेवून शिजवावे.

तयार घावन घाटल्याबरोबर सर्व्ह करावे.



टीप:

१) गोड घावन आवडत असल्यास मिश्रणात थोडा गुळ घालावा.



==================================



घाटल्याचे साहित्य आणि कृती:



वेळ: १० मिनिटे

दीड कप (साधारण ३ जणांसाठी)



साहित्य:

दीड कप नारळाचे घट्ट दुध

१ टेस्पून तांदूळ पीठ

२ ते ३ चिमटी वेलची पूड

गूळ, गरजेनुसार (मी २ टेस्पून गुळ वापरला होता)



कृती:

१) सर्व साहित्य एकत्र करा. तांदूळ पिठाच्या गुठळ्या राहणार नाहीत याची दक्षता घ्या.

२) तयार मिश्रण लहान पातेल्यात घ्या. मंद आचेवर ढवळून शिजवा. मिश्रण दाटसर झाले कि गॅस बंद करा.

तयार घाटले गरम घावानाबरोबर सर्व्ह करा.



टीप:

१) घाटल्यामध्ये काजू पिस्त्याचे काप घातले तरीही चालतील.

२) गुळाचे प्रमाण गरजेनुसार कमी-जास्त करावे.

दुधी भोपळ्याचे थालीपीठ - Dudhi Thalipeeth

Lauki Thalipeeth in English

वेळ: ३० मिनिटे
वाढणी: ३ ते ४ मध्यम थालीपीठे

साहित्य:
१ कप सोलून किसलेला दुधी भोपळा
दीड ते दोन कप उपवासाची भाजणी किंवा गरजेनुसार
३ हिरव्या मिरच्या, ठेचून
१/४ चूप बारीक चिरलेली कोथिंबीर
१/४ कप भाजलेल्या शेंगदाण्याचा कूट
चवीनुसार मीठ
तूप किंवा शेंगदाण्याचे तेल थालीपीठ भाजताना

कृती:
१) किसलेल्या दुधीमध्ये हिरवी मिरची, मीठ, शेंगदाण्याचा कूट, आणि कोथिंबीर घालून मिक्स करावे. गरजेनुसार भाजणी घालून कणकेला भिजवतो तेवढे घट्ट भिजवून घ्यावे. भिजवलेल्या पिठाचे टेनिसच्या बॉलएवढे गोळे करून घ्यावे.
२) नॉनस्टिक तव्याला तूप लावून घ्यावे. हाताला चिकटू नये म्हणून हातालाही थोडेसे तूप लावावे. हाताने एकसारखे थालीपिठ थापावे. मध्याभागी तेल सोडायला बोटाने छिद्रं करावे.
३) मिडीयम आणि हायच्या मध्ये गॅस अडजस्ट करावा. झाकण ठेवून थालीपीठ शिजू द्यावे. मिनिटभराने झाकण काढून कडेने तूप सोडावे. झाकून एक बाजू नीट शिजू द्यावी. कालथ्याने उलथून, झाकण ठेवून दुसरी बाजूही शिजवावी.
गरमगरम थालीपीठ वाढताना दही आणि लिंबाचे गोड लोणचे बरोबर खायला द्यावे.

टीप:
१) दुधी बिनबियांचा आणि कोवळा असावा, म्हणजे किसायला सोपा जातो.
२) थालीपिठ शिजायला वेळ लागतो. जास्त थालीपीठं बनवताना वेळ वाचवण्यासाठी दोन शेगड्यावर दोन तवे वापरून थालीपीठं बनवावी.
३) काहीजण दुधी भोपळा उपवासाला खात नाहीत. म्हणून दुधीऐवजी काकडी किसून घालावी.

नाचणीचे डोसे - Raagi flour dosa

Nachni flour dosa in English

वेळ: ३० मिनिटे
१२ ते १५ मध्यम डोसे


साहित्य:
१ कप नाचणीचे पीठ
१/२ कप तांदुळाचे पीठ
१/२ कप उडीद डाळ
७ ते ८ मेथी दाणे
चवीपुरते मीठ
डोसा बनवताना थोडे तेल

कृती:
१) नाचणीचे पीठ आणि तांदुळाचे पीठ पाण्यात किमन ५ तास भिजवावे. खूप जास्त पाणी घालू नये बटाटा वड्याच्या पिठाला भिजवतो तसे घट्टसर भिजवावे. दुसऱ्या भांड्यात उडीद डाळ आणि मेथी दाणे एकत्र करून ५ तास भिजत ठेवावे.
२) ५ तासानंतर उडीद डाळीतील पाणी काढून मिक्सरमध्ये बारीक पेस्ट करावी. लागल्यास किंचित पाणी घालावे. आता भिजवलेले पीठ आणि उडीद डाळीची पेस्ट एकत्र करावी. लागेल तसे पाणी घालून नेहमीच्या डोसा पिठाला जेवढं पातळ पीठ असते तेवढे पातळ ठेवावे. चवीपुरते मीठ घालावे.
३) नॉनस्टिक तवा गरम करून त्यावर डावभर पीठ घालावे आणि डाव गोलगोल फिरवून डोसा पातळसर पसरवावा. कडेने तेल सोडावे. एक बाजू खरपूस झाली कि डोसा उलटून दुसऱ्या बाजूने निट भाजू द्यावा.
गरम गरम डोसे चटणी बरोबर सर्व्ह करावे.

टीपा:
१) डोसे छान पातळ पसरले गेले पाहिजेत, म्हणून डोशाचे पीठ पातळ ठेवावे. तसेच प्रत्येक वेळी डोसा बनवताना पीठ ढवळून घ्यावे, कारण डोशाचे पीठ स्थिर राहिले कि नाचणीचे पीठ तळाला बसते.
२) हे डोसे सकाळच्या न्याहारीला छान लागतात. म्हणून रात्रभर पीठ आणि डाळ भिजवून सकाळी डाळ वाटून लगेच डोसे बनवता येतात.
३) डोसे दोन्ही बाजूंनी नीट भाजावेत. कारण नाचणीचे पीठ जरा जरी शिजले नाही तर कचकचीत लागते.
४) डोसे बनवताना आवडीनुसार कोथिंबीर, मिरची, कांदा, टोमॅटो घालू शकतो.

पालक कॉर्न चिज सॅंडविच - Spinach Corn and cheese Sandwich

Spinach Cheese Sandwich in English

This is a delicious quick breakfast recipe and is equally healthy. You consume quite a good amount of spinach, when you eat 1 sandwich. If eaten moderately, cheese is very good for health as 1 cheese slice has goodness of 1 glass of milk. It's rich in vitamin B and calcium. Try light cheese for less fat and calorie content.

५ सॅंडविचेस
वेळ: १५ मिनीटे

साहित्य:
अडीच कप बारीक चिरलेला पालक
१/४ कप मक्याचे उकडलेले दाणे
२ मोठ्या लसूण पाकळ्या, सोलून बारीक चिरलेल्या
१ हिरवी मिरची, बारीक चिरून
१ टिस्पून बटर (+ अजून थोडे सॅंडविच भाजण्यासाठी)
१/२ कप किसलेले चिज
चवीपुरते मिठ
१० ब्रेडचे स्लाईस

कृती:
१) कढईत १ टिस्पून बटर गरम करावे. त्यात हिरवी मिरची, लसूण घालून १० सेकंद परतावे. नंतर पालक आणि मक्याचे दाणे घालावे.
२) पालक घातल्यावर लगेच मिठ घालावे आणि झाकण न ठेवता पालकातील पाण्याचा अंश निघून जाईस्तोवर परतावे.
३) मिश्रण ५ समभागात विभागून घ्यावे. एका ब्रेड स्लाईसवर १ भाग मिश्रण पसरवावे. त्यावर बर्‍यापैकी चिज घालावे. वरून दुसरा ब्रेड ठेवून सॅंडविच तयार करावे.
४) सॅंडविच टोस्टरमध्ये सॅंडविच टोस्ट करावे. किंवा तव्यावर थोडे बटर घालून मध्यम आचेवर सॅंडविच दोन्ही बाजूंनी खरपूस करून घ्यावे. चिज वितळू द्यावे.
सुरीने दोन भाग करावे. टोमॅटो केचपबरोबर सर्व्ह करावे.

टीपा:
१) पालक एकदम बारीक चिरावा. तसेच पालक शिजला कि आकाराने आळतो. त्यामुळे मिठ अगदी थोडे घाला (२ चिमटी). पालक परतताना कढईवर झाकण ठेवू नये, पालकाचा रंग काळपट होतो.
२) चिज भरपूर घाला. पालक आणि चिज यांचे कॉंबिनेशन फार छान लागते. तसेच, जर चिज कमी घातले तर नुसता पालक आणि ब्रेड खुप चांगले लागत नाही.
३) लहान मुलांसाठी बनवताना मिरची घालू नये.

उकडपेंडी - Ukadpendi

ukadpendi in English

वेळ: १५ मिनीटे
वाढणी: २ जणांसाठी

साहित्य:
१/२ कप रवाळ कणिक
३ टेस्पून तेल
१/४ कप कांदा, बारीक चिरून
४ ते ५ कढीपत्ता पाने
फोडणीसाठी: चिमटीभर मोहोरी, १/४ टिस्पून हिंग, १/८ टिस्पून हळद, २ सुक्या लाल मिरच्या
१/२ कप दही, घोटलेले
१/४ कप पाणी (टीप १)
चवीपुरते मिठ

कृती:
१) कढईत तेल गरम करावे. कणिक मध्यम आचेवर गुलाबीसर भाजून घ्यावी (साधारण ५ ते ७ मिनीटे). भाजलेली कणिक लहान वाडग्यात काढून ठेवावी.
२) त्याच कढईत १ टेस्पून तेल घालावे. मोहोरी, हिंग, हळद, लाल मिरच्या आणि कढीपत्ता घालून फोडणी करावी. कांदा घालून गुलाबीसर होईस्तोवर परतून घ्यावा. मिठ घालून मिक्स करावे.
३) भाजलेली कणिक घालून एक-दोन मिनीट मिक्स करावे. दही आणि पाणी मिक्स करावे आणि हे मिश्रण कढईत ओतावे. आणि पटापट मिक्स करावे. मिश्रणाचा गोळा तयार होईल. एकदम व्यवस्थित मिक्स करावे, गुठळी होवू देऊ नये. झाकण ठेवून मंद आचेवर काही मिनीटे वाफ काढावी.
कोथिंबीरीने सजवून सर्व्ह करावे.

टीपा:
१) उकड पातळ किंवा घट्ट हवी असेल त्याप्रमाणे पाण्याचे प्रमाण कमी किंवा जास्त करावे. वरील कृतीमध्ये घट्ट उकड होईल एवढे पाण्याचे प्रमाण दिले आहे. पण उकड पातळ हवी असेल तर पाणी जास्त घालावे.
२) उकड ही कच्चं तेल घालून, चांगली मळून मग खातात. त्यासाठी घट्ट उकड करावी. गरमच असताना परातीत घेऊन थोडे तेल घालून लगेच मळावी. गरम मळताना चटका बसतो म्हणून उकड मळण्यासाठी लाकडी चकती मिळते ती वापरावी. ती जर नसेल तर खलबत्त्यातील खलायचे भांडे घ्यावे. त्याच्या तळाला तेल लावून त्याने मळावी. गरम गरम उकड सर्व्ह करावी.
३) लाल मिरची ऐवजी काहीजण हिरवी मिरची किंवा लाल तिखटही वापरतात.
४) कांदा हा ऐच्छिक आहे. पण चव चांगली येते कांद्यामुळे. तसेच कांद्याऐवजी लसूण वापरता येते. अधिक पौष्टीक बनवायची असल्यास मटार, गाजराचे तुकडे, भिजवलेली मूग-मटकीही घालू शकतो.
५) ही उकड तांदूळाची, बेसनाची, ज्वारीच्या पिठाची करता येते. पद्धत हीच फक्त पिठ वेगवेगळे वापरावे. किंवा मिश्र पिठाची सुद्धा उकड बनवता येते.

स्टफ पनीर पराठा - Stuffed Paneer Paratha

Stuffed Paneer Paratha in English

वेळ: ४० मिनीटे
नग: ६ ते ८ मध्यम पराठे

साहित्य:
स्टफिंग
२ कप किसलेले पनीर
३-४ हिरव्या मिरच्या, एकदम बारीक चिरून किंवा पेस्ट करून
१/४ कप कोथिंबीर, बारीक चिरून
१/२ टिस्पून जिरेपूड, १ टिस्पून धणेपूड, १/२ टिस्पून आमचूर पावडर, १/२ ते १ टिस्पून किसलेले आले
चवीपुरते मिठ
आवरणासाठी
३/४ कप मैदा
१ कप गव्हाचे पिठ
१/४ टिस्पून जिरे, १/४ टिस्पून हळद, १/४ टिस्पून लाल तिखट
१/४ कप दही
गरजेनुसार पाणी
२ टेस्पून तेल
२ टेस्पून कोथिंबीर, बारीक चिरलेली
१/२ टिस्पून मिठ
इतर साहित्य
बटर किंवा तेल पराठे भाजण्यासाठी
पराठे लाटायला थोडे कोरडे पिठ

कृती:
१) किसलेले पनीर एका बोलमध्ये घ्यावे. त्यात मिरची, कोथिंबीर, धणे-जिरेपूड, आमचूर, आलं आणि मिठ घालून हलक्या हाताने मिक्स करावे.
२) बाहेरील कव्हरसाठी मैदा, कणिक, जिरे, हळद, लाल तिखट, दही, कोथिंबीर, तेल आणि मिठ घालून मिक्स करावे. गरजेनुसार पाणी घालून मध्यमसर मळून घ्यावे. १५ मिनीटे झाकून ठेवावे.
३) कणकेचे ६ किंवा ८ समान गोळे करावेत. मिश्रणाचेसुद्धा तितकेच समान भाग करावेत.
४) कणकेचा १ गोळा ३ ते साडेतीन इंचाचा लाटून घ्यावा. त्याच्या मध्यभागी १ भाग मिश्रणाचा ठेवावा. सर्व बाजू एकत्र वरती आणाव्यात आणि गोळा बंद करावा. थोड्या पिठावर लाटून तेलावर किंवा बटरवर दोन्ही बाजूंनी भाजून घ्यावा.
गरमागरम पराठे चटणीबरोबर सर्व्ह करावे.

टीपा:
१) कोथिंबीरीबरोबर आवडत असल्यास पुदीन्याची पाने बारीक चिरून घातली तरी छान स्वाद लागतो.
२) जिरे घालण्याऐवजी ओवा घातला तरी चांगली चव येते.

वरी तांदूळ पुलाव - Samo Rice Pulav

Samo Rice Pulao in English

वेळ: २५ ते ३० मिनीटे
वाढणी: ३ ते ४ जणांसाठी

>साहित्य:
१ कप वरी तांदूळ
२ टिस्पून तूप
१/२ टिस्पून जिरे
२ हिरव्या मिरच्या
१/२ कप भोपळ्याचे मध्यम तुकडे (साल काढून टाकावे)
१/२ कप बटाट्याचे तुकडे (बटाटा सोलून)
२ टेस्पून शेंगदाण्याचा कूट
चवीपुरते मिठ
साधारण ३ कप उकळते पाणी

कृती:
१) जाड बुडाच्या पातेल्यात वरी तांदूळ थोडे भाजून घ्यावे, म्हणजे भात हलका होतो. तांदूळ एका भांड्यात तात्पुरता काढून ठेवावेत.
२) त्याच पातेल्यात तूप गरम करावे त्यात जिरे आणि मिरच्या घालून परतावे. गॅस मध्यम ठेवावा. बटाट्याच्या फोडी घालून एक वाफ काढावी. बटाटा जवळजवळ शिजला कि त्यात वरी तांदूळ घालावेत.
३) मिक्स करून त्यात गरम पाणी घालावे. मिठ घालावे. एक दोन मिनीटांनी भोपळ्याच्या पातळ फोडी आणि दाण्याचा कूट घालावा. मध्यम आचेवर वाफ काढावी.
गरमागरम वरीचा पुलाव दाण्याच्या आमटीबरोबर किंवा फोडणीच्या ताकाबरोबर सर्व्ह करावा.

इंस्टंट रवा इडली - Instant Rava Idli

Rava Idli in English

साधारण १५ ते १८ मध्यम इडल्या
वेळ: साधारण ३५ ते ४० मिनीटे (मिश्रण बनविण्यास १५ मिनीटे + इडली वाफवणे व वाफ जिरणे २० ते २५ मिनीटे)

साहित्य:
१ कप जाड रवा
१ टिस्पून तेल, चिमूटभर मोहोरी, चिमूटभर हिंग, १/२ टिस्पून उडीद डाळ, १/२ ते १ टिस्पून चणाडाळ, ४ ते ५ कढीपत्ता पाने
१/२ टिस्पून किसलेले आले
१/२ कप आंबट दही, घोटलेले
१/२ कप पाणी
चवीपुरते मिठ
१ टिस्पून इनो फ्रुट सॉल्ट (इनो सोडा)

कृती:
१) मध्यम आचेवर, कढईत तेल गरम करून त्यात मोहोरी, हिंग घालावे. आधी चणाडाळ घालून परतावे आणि थोडा रंग बदलला कि उडीद डाळ घालावी. उडीद डाळीचा रंग गुलाबीसर झाला कि कढीपत्ता पाने घालावीत आणि किसलेले आले घालावे. त्यावर १ कप जाड रवा घालून २ ते ३ मिनीटे मध्यम आचेवर भाजावे.
२) भाजलेला रवा एका खोलगट भांड्यात काढून घ्यावा. दुसर्‍या भांड्यात घोटलेले दही आणि पाणी मिक्स करून त्याचे घट्टसर ताक बनवावे. रवा थोडा कोमट झाला कि त्यात हे ताक घालावे (टीप २). चवीपुरते मिठ घालून निट मिक्स करून घ्यावे. मिक्स करून १० मिनीटे तसेच ठेवावे. कंसिस्टन्सी नेहमीच्या इडली पिठाएवढीच असावी, खुप घट्ट किंवा पातळ नसावी.
३) इडली कूकरमध्ये (महत्त्वाची टीप ४) तळाला साधारण दिड इंच पाण्याची पातळी ठेवावी आणि पाणी गरम करण्यास ठेवावे. इडली पात्राला तेलाचा किंचीत हात लावून घ्यावा (टीप ३). मिश्रणात इनो सोडा घालून एकाच दिशेने मिक्स करावे आणि मिश्रण इडली पात्रात भरावे.
४) पाण्याला उकळी फुटली कि इडली स्टॅंड कूकरमध्ये ठेवून १२ ते १५ मिनीटे इडल्या वाफवाव्यात. ८ ते १० मिनीटे वाफ जिरल्यावर कूकर उघडून इडल्या चमच्याच्या टोकाने व्यवस्थित सोडवून घ्याव्यात.

टीप:
१) वरील पाककृती साधी मसाला इडलीची आहे. जर हवे असल्यास किसलेले गाजर, मटार अशा भाज्याही इडलीत घालू शकतो. वरील फोटोत दाखवल्याप्रमाणे भाज्या दिसायला हव्या असतील तर, इडली साच्यात आधी चिरलेल्या किंवा किसलेल्या भाज्या ठेवून वर इडलीचे पिठ घालावे. तसेच इडली पिठात डायरेक्ट भाज्या मिक्स करू शकतो, पण त्यामुळे इडल्यांचा रंग बदलतो.
२) रवा जर थोडा जास्त भाजला गेला असेल तर पाणी शोषून घेतल्याने मिश्रण घट्ट होते, तेव्हा कदाचित थोडे पाणी जास्त घालावे लागेल. मिश्रणाची कंसिस्टन्सी नेहमीच्या इडली पिठाएवढीच असावी, खुप घट्ट किंवा पातळ नसावी.
३) जर तुमच्या इडली पात्रात कमी इडल्या बनत असतील तर मिश्रण २ भागात विभागून घ्यावे. एक भागात १/२ टिस्पून सोडा घालून इडल्या वाफवून घ्याव्यात आणि नंतर उरलेल्या मिश्रणात सोडा घालून इडल्या बनवाव्यात. अशाप्रकारे २ बॅचेस कराव्यात. सर्व मिश्रणात एकदम सोडा घालू नये.
४) जर साधा कूकर वापरणार असाल तर कूकरच्या झाकणाची शिट्टी काढून ठेवावी.

दलिया इडली - Daliya idli

Daliya Idli in English

वेळ: पूर्वतयारी- २० मिनीटे (दलिया भिजवणे वगळून) । पाकृसाठी- ३५ ते ४० मिनीटे
नग: १५ ते १७ मध्यम इडल्या

साहित्य:
१ कप दलिया रवा
२ कप गरम पाणी
फोडणीसाठी: १ टेस्पून तेल, २ चिमटी मोहोरी, २ चिमटी हिंग, २ हिरव्या मिरच्या
४ ते ५ कढीपत्ता पाने, बारीक चिरून
१/२ टिस्पून उडीद डाळ, १/२ टिस्पून चणाडाळ
१ टिस्पून किसलेले आले
१/२ कप आंबट दही
चवीपुरते मिठ
१ टिस्पून इनो सोडा
इडली स्टॅंड
इडल्या वाफवायला इडली कूकर किंवा साधा मोठा कूकर

कृती:
१) दलिया गरम पाण्यात ४ तास भिजत घालावा. दलिया भिजल्यानंतर त्यातील अधिकचे पाणी काढून ठेवावे, पुर्ण पाणी काढले नाही तरी चालेल (टीप १). पाणी काढलेला दलिया मिक्सरमध्ये मध्यम वाटून घ्यावा.
२) कढल्यात तेल गरम करावे. त्यात आधी डाळी घालून गुलाबी होईस्तोवर परताव्या. नंतर मोहोरी, हिंग, मिरची आणि कढीपत्ता घालून फोडणी करावी. हि फोडणी वाटलेल्या दलियामध्ये घालावी.
३) यामध्ये दही, किसलेले आले आणि मिठ घालून मिक्स करावे. मिश्रण तांदूळाच्या इडलीसाठी जे मिश्रण असते तितपतच दाट असावे. लागल्यास दलिया भिजवून जे पाणी ठेवले होते ते घालावे.
४) कूकरमध्ये तळाला अडीच ते ३ इंच पातळीपर्यंत पाणी घालावे. गॅस सुरू करावा. इडली पात्राला तेलाचा हात लावून घ्यावा.
५) मिश्रणाचे दोन भाग करावे (टीप ६). एका भागात १/२ टिस्पून सोडा घालावा. मिक्स करून इडली पात्रात भरावे.
६) कूकरमधील पाण्याला उकळी आली कि इडली स्टॅंड कूकरमध्ये ठेवावा. वरून झाकण लावावे. साधा कूकर वापरत असाल तर झाकणावरची शिट्टी काढून ठेवावी.
७) १२ ते १५ मिनीटे वाफवावे. गॅस बंद करून ७-८ मिनीटे वाफ जिरू द्यावी.
८) नंतर इडल्या चमच्याने काढाव्यात (टीप २). परत कूकरमध्ये पाणी गरम करून वरीलप्रमाणेच इडल्यांची दुसरी बॅच करावी.

टीप:
१) दलिया भिजवल्यावर जर जास्त पाणी उरले तर ते फेकून न देता सांबार बनवायला वापरावे. मी वापरले होते, चवीत फरक पडत नाही.
२) या इडल्या अख्ख्या गव्हाच्या असल्याने थोड्या चिकट राहतात व जास्त फुलत नाही. म्हणून पूर्ण वाफ मुरल्यावरच इडल्या चमच्याने काढाव्यात. थंड झाल्या तरी मायक्रोवेव्हमध्ये गरम करू शकतो.
३) या इडल्या जरा सालट लागतात. म्हणून शक्यतो या इडल्या फक्त चटणीबरोबर खाऊ नयेत. जोडीला सांबारही बनवावे.
४) डायबेटीस पेशंट्स किंवा ज्यांना तांदूळ न खायचे पथ्य आहे त्यांच्यासाठी न्याहारीचा उत्तम उपाय.
५) यामध्ये आवडीनुसार भाज्याही घालू शकतो.
६) माझ्याकडे असलेला इडली स्टॅंड लहान आहे आणि त्यात नऊच इडल्या होतात. तुमच्याकडे जर १२ किंवा १६ कप्प्यांचा स्टॅंड असेल तर एकाच वेळी तुम्ही सर्व इडल्या करू शकता.

मायक्रोवेव्ह उपमा - Microwave Upma

Microwave Upma in English

वेळ: साधारण २० मिनीटे
वाढणी: ३ जणांसाठी

साहित्य:
३/४ कप रवा
१ ते २ टेस्पून तूप
फोडणीसाठी - १ टेस्पून तूप, चिमूटभर मोहोरी, १/४ टिस्पून जिरे, १/२ टिस्पून उडीद डाळ, चिमूटभर हिंग, ३ हिरव्या मिरच्या, ४-५ कढीपत्ता पाने, १/४ टिस्पून आले
१/२ कप कांदा, बारीक चिरलेला
१/४ कप मटार (ऐच्छिक)
१/२ कप टोमॅटो, बारीक चिरलेला (ऐच्छिक)
मिठ, साखर चवीनुसार
१ टेस्पून तूप (ऐच्छिक)
सजावटीसाठी कोथिंबीर, लिंबू, ताजा खोवलेला नारळ
मायक्रोवेव्ह सेफ ग्लास बाऊल विथ ग्लास लिड

कृती:
रवा भाजणे
१) ३/४ कप रवा मायक्रोवेव्ह सेफ झाकणात समान पसरवून हाय पॉवरवर दिड मिनीट मायक्रोवेव्ह करा. डीश बाहेर काढून चमच्याने रवा ढवळावा. परत दिड मिनीट मायक्रोवेव्ह करावा. डीश बाहेर काढून ढवळावा. नंतर अजून २ मिनीटे मायक्रोवेव्ह करावा. (दिड मिनीट + दिड मिनीट + १ मिनीट + १ मिनीट) (महत्त्वाची टिप १)
फोडणी:
२) आता मायक्रोवेव्ह सेफ काचेच्या वाडग्यात १ टेस्पून तूप घ्या. हाय हाय पॉवरवर दिड मिनीट मायक्रोवेव्ह करा. त्यात मोहोरी, जिरे आणि उडीदडाळ घालून दिड मिनीट ते दोन मायक्रोवेव्ह करा. वाटल्यास मध्येच भांडे बाहेर काढून ढवळा.
३) आता हिंग, चिरलेल्या मिरच्या, कढीपत्ता, ठेचलेले आले घालून ३० ते ४० सेकंद मायक्रोवेव्ह करा.
४) बारीक चिरलेला कांदा घालून मिक्स करा. साधारण दिड मिनीट असे ३ वेळा मायक्रोवेव्ह करा.
५) आता चिरलेला टोमॅटो, मटार घालून मिक्स करा. दिड मिनीट असे दोनदा मायक्रोवेव्ह करा. मधे भांडे बाहेर काढून ढवळा.
६) सव्वा कप पाणी घाला. चवीपुरते मिठ आणि साखर घालून पाण्याची चव पाहून लागल्यास मिठ किंवा साखर अड्जस्ट करा. १ मिनीट मायक्रोवेव्ह करा.
७) भाजलेला रवा घालून मिक्स करा. झाकण ठेवून २ मिनीटे मायक्रोवेव्ह करा. भांडे बाहेर काढून थोडे तूप घाला आणि मिक्स करा. परत २ मिनीटे मायक्रोवेव्ह करा. आणि थोडावेळ वाफ मुरावी म्हणून तसाच आत ठेवा. ३ ते ४ मिनीटांनी तयार उपमा बाहेर काढून कोथिंबीर, लिंबू, ओला नारळ यांनी सजवून सर्व्ह करा.

टीप:
१) प्रत्येक मायक्रोवेव्हची पॉवर वेगवेगळी असते त्यामुळे वर दिलेल्या कालावधी एखाद मिनीट कमी किंवा जास्त होवू शकते याची नोंद घ्यावी.
२) तूपाऐवजी तेलही वापरू शकतो. तूपामुळे खुप छान चव येते.
३) आवडीनुसार काजूही घालू शकतो.
४) वेळ व्यवस्थित वापरल्यास २०-२२ मिनीटांत उपमा बनतो. म्हणजे रवा भाजताना कांदा, टोमॅटो चिरून घ्यावा तसेच बाकीची तयारी घ्यावी.
५) १ ते ६ स्टेप्स काचेचे भांडे न झाकता फॉलो करा, आणि फक्त ७ व्या स्टेपमध्ये भांड्यावर झाकण ठेवावे.

उपम्याच्या इतर रेसिपीज
रवा उपमा - शेगडी वापरून
शेवई उपमा

Labels:
Upma, rava upma, Microwave upma

मायक्रोवेव्ह सुरळी वडी - Microwave Surali Vadi

Surali Vadi in English

साधारण १२ ते १५ वड्या
वेळ: पूर्वतयारी:- १५ ते २० मिनीटे । मायक्रोवेव्ह:- ५ ते ७ मिनीटे

साहित्य:
१ कप बेसन
१ कप आंबट ताक (जरा घट्ट)
दिड ते पावणेदोन कप पाणी
पाउण ते एक टिस्पून मिरचीचा ठेचा
१/२ टिस्पून हळद
१/२ टिस्पून हिंग
फोडणीसाठी : २ टेस्पून तेल, १/४ टिस्पून मोहोरी, २ ते ३ चिमटी हिंग
खवलेला ताजा नारळ, गरजेनुसार
वरून पेरायला थोडे लाल तिखट
बारीक चिरलेली कोथिंबीर
मीठ
मिश्रण पसरवण्यासाठी कालथा
जाड प्लास्टिकचा लांब कागद

कृती:
१) बेसन, ताक, पाणी एकत्र करावे. बेसनाच्या गुठळ्या न होता मिश्रण भिजवावे. त्यात मिरचीचा ठेचा, हळद आणि हिंग घालावे. चवीपुरते मीठ घालावे. सर्व मिश्रण एकदम स्मूद करून घ्यावे.
२) बेसनाचे हे मिश्रण शिजवण्यापुर्वी प्लास्टिकचा कागद ओट्यावर किंवा टेबलावर पसरवून ठेवावा.
३) मायक्रोवेवसेफ भांड्यात सर्व मिश्रण घालावे. हाय पॉवरवर ५० सेकंद मिश्रण शिजवावे. भांडे बाहेर काढून व्यवस्थित ढवळावे. किंचीत गुठळ्या होण्याची शक्यता असते तेव्हा एगबिटरने मिश्रण निट एकजीव करून घ्यावे. मिश्रण शिजेस्तोवर ३०-४० सेकंद मायक्रोवेव करत राहावे. साधारण २ ते ३ वेळा मिश्रण मायक्रोवेव करावे लागते. मिश्रण खुप दाट नाही आणि खुप पातळ नाही असे झाले कि मिश्रण शिजले असे समजावे.
४) मिश्रण थंड होवू देवू नये. लगेच कालथ्याने मिश्रणाचा पातळ थर प्लास्टिक कागदावर पसरावा. थोडे थंड होवू द्यावे.
५) कढल्यात तेल गरम करावे त्यात मोहोरी, हिंग घालून फोडणी करावी. आणि मिश्रणाच्या पातळ थरावर चमच्याने फोडणी पसरावी. म्हणजे फोडणी नीट पसरली जाते.
६) त्यावर खवलेला नारळ आणि बारीक चिरलेली कोथिंबीर पेरावी. थोडे लाल तिखट पेरावे. नंतर सुरीने ५ इंच पट्ट्या कापाव्यात. त्याची सुरळी (गुंडाळी)करावी आणि मग त्या सुरळीचे ३-४ भाग करावेत.
७) सर्व्ह करताना सुरळीच्या वड्यांवर थोडी कोथिंबीर आणि खवलेला नारळ घालावा.

सुरळीच्या वड्या - शेगडी (गॅस) वापरून

टीप:
१) मिश्रणाचा पातळ थर करण्यासाठी स्टीलची ताटेसुद्धा वापरू शकतो पण त्यामुळे खुप ताटे वापरली जातात.
२) जर फोडणी फक्त वड्यांवर आवडत असेल तर आपल्या आवडीनुसार सुरळ्या केल्यानंतर त्यावर फोडणी घालावी.
३) सुरळीच्या वड्या करताना नारळ आणि कोथिंबीर आपण आधीच पेरले आहे त्यामुळे चव छान येते. पण सुरळी करताना थोडा त्रास होवू शकतो. अशावेळी मिश्रणाचा पातळ थर केल्यावर त्यावर फक्त फोडणीच घालावी. सुरळी करून मग वरून कोथिंबीर आणि नारळ पेरावे.

Labels:
Surali Vadi, Khandvi, Gujrati Snack

मोकळी भाजणी - Mokali Bhajni

Mokali Bhajni in English

वाढणी: ३ जणांसीठी
वेळ: १५ ते २० मिनीटे

साहित्य:
१ कप थालिपीठाची भाजणी (कृतीसाठी इथे क्लिक करा)
२ टेस्पून तेल
फोडणीसाठी: चिमूटभर मोहोरी, १/४ टिस्पून जिरे, चिमूटभर हिंग, ३ ते ४ कढीपत्ता पाने
१ मध्यम कांदा, बारीक चिरून
इतर साहित्य: १ टिस्पून लाल तिखट, १/४ टिस्पून हळद, चिमूटभर हिंग
चवीपुरते मिठ
१ टेस्पून कोथिंबीर, बारीक चिरून
१/४ टिस्पून खोवलेला ताजा नारळ

कृती:
१) परातीत किंवा मिक्सींग बोलमध्ये थालिपीठ भाजणी, लाल तिखट, हळद, हिंग आणि चवीपुरते मिठ घालून मिक्स करावे. त्यात गरजेनुसार पाणी घालून एकदम मऊसर गोळा मळून घ्यावा. मळलेल्या गोळ्याची चव पाहावी आणि मिठ कमी असेल तर आताच घालून परत मळावे.
२) कढईत किंवा पॅनमध्ये तेल गरम करावे. त्यात मोहोरी, जिरे, हिंग, कढीपत्ता घालून फोडणी करावी. त्यात चिरलेला कांदा घालून परतावे.
३) कांदा चांगला परतला गेला कि त्यात भाजणीचा मळलेला गोळा हाताने मोकळा करून घालावा. गॅस मध्यम आचेवर ठेवावा आणि कालथ्याने निट मिक्स करावे. जमतील तेवढी भाजणी कालथ्याने मोकळी करावी. झाकण ठेवून ७ ते ८ मिनीटे वाफ काढावी. दर २ ते ३ मिनीटांनी तळापासून ढवळावी. वाफेवर भाजणी व्यवस्थित शिजू द्यावी.
कोथिंबीर आणि नारळाने सजवून सर्व्ह करावी. हि भाजणी दह्याबरोबर किंवा ताकाबरोबर उत्तम लागते.

Labels:
mokali bhajni, Maharashtrian Breakfast, Marathi breakfast,

माणिकमोती - Manikmoti

Manikmoti in English

२ जणांसाठी
वेळ: १५ मिनीटे

साहित्य:
४ आदल्या दिवशीच्या पोळ्या (चपात्या)
१ कप शिजलेला भात (आदल्या दिवशीचा)
फोडणीसाठी: २ टेस्पून तेल, १/८ टिस्पून मोहोरी, १/४ टिस्पून जिरे, चिमूटभर हिंग, १/८ टिस्पून हळद, १/४ टिस्पून लाल तिखट, ३-४ कढीपत्ता पाने
२ टेस्पून शेंगदाणे
२ ते ३ टेस्पून मटार
१/४ कप बारीक चिरलेला कांदा
१ टिस्पून लिंबाचा रस
चवीपुरते मिठ
१/२ टिस्पून साखर
सजावटीसाठी बारीक चिरलेली कोथिंबीर आणि खोवलेला नारळ

कृती:
१) पोळ्यांचा हाताने कुस्कारा करून घ्यावा किंवा मिक्सरमध्ये भरडसर बारीक करावे. भात हाताने मोकळा करून घ्यावा.
२) कढईत तेल गरम करून आधी त्यात शेंगदाणे परतून घ्यावे. नंतर त्यातच मोहोरी, जिरे, हिंग, हळद, लाल तिखट आणि कढीपत्ता पाने घालून फोडणी करावी. त्यात कांदा आणि मटार घालून परतावे. अंदाजे मिठ घालावे.
३) कांदा निट परतला गेला गॅस मध्यम करून त्यात भात घालावा. निट मिक्स करून बारीक केलेल्या पोळ्या घालून निट परतावे. साखर घालून १ वाफ काढावी. लिंबाचा रस चवीनुसर घालावा.
कोथिंबीर आणि ओल्या खोबर्‍याने सजवावे. गरमागरम सर्व्ह करावे.

labels:
phodnicha bhat, phodnichi poli, fodani chi poli

शेवई उपमा - Sevai upma

Sevai (vermicelli) Upma in English

वाढणी: २ जणांसाठी
वेळ: १५ मिनीटे
साहित्य:
दिड कप शेवया (उपमा शेवई) [मी Bombino च्या शेवया वापरल्या होत्या]
१ ते सव्वा कप गरम पाणी
१ टेस्पून तूप
फोडणीसाठी: चिमूटभर मोहोरी, १/४ टिस्पून जिरे, चिमूटभर हिंग, १/२ टिस्पून उडीद डाळ, १/२ टिस्पून किसलेले आले
२ ते ३ हिरव्या मिरच्या, चिरलेल्या
३ ते ४ कढीपत्ता पाने
१/४ कप गाजर, एकदम लहान चौकोनी तुकडे
१/४ कप मटार, फ्रोजन
२ टेस्पून तळलेले शेंगदाणे / भाजलेले शेंगदाणे
चवीपुरते मिठ
१/२ टिस्पून साखर
कोथिंबीर सजावटीसाठी

कृती:
१) पॅनमध्ये तूप गरम करावे. त्यात शेवया मध्यम आचेवर गोल्डन रंग येईस्तोवर परताव्यात.
२) भाजलेल्या शेवया पॅनमधून काढाव्यात. उरलेल्या तूपात फोडणीसाठी मोहोरी, जिरे, हिंग, उडीद डाळ, मिरच्या, आले आणि कढीपत्ता घालून परतावे.
३) तयार फोडणीत गाजराचे तुकडे आणि मटार घालून परतावे. २ वाफा काढून मध्यम आचेवर शिजवावे.
४) आता तळलेले शेंगदाणे आणि परतलेल्या शेवया घालाव्यात. मिनीटभर परतावे. आच मध्यम ठेवावी.
५) गरम पाण्यातील अर्धे पाणी घालावे. चवीनुसार साखर आणि मिठ घालावे. झाकण ठेवून मध्यम आचेवर शेवया शिजू द्याव्यात. पाणी शोषले गेले उरलेले गरम पाणी गरजेनुसार घालून शेवया व्यवस्थित शिजू द्याव्यात.
कोथिंबीरीने सजवून गरमागरम शेवयांचा उपमा सर्व्ह करावा.

टीप:
१) शेंगदाण्याबरोबर/ ऐवजी थोडे काजूचे तुकडे घातल्यास छान चव येते.
२) हा उपमा कांदा घालून आणि कांद्याशिवायही छान लागतो. मी शक्यतो कांदा घालत नाही, पण घालायचा असेल तर वरील प्रमाणासाठी १/४ कप बारीक चिरलेला कांदा फोडणीत घालून परतावा. तसेच फरसबीचे तुकडे वा इतर आवडीच्या भाज्याही घालता येतील.

Labels:
sevai Upma, Vermicelli upma, Vermicelli pulav

फोडणीची पोळी - Phodnichi Poli

Phodanichi Poli in English

२ ते ३ जणांसाठी
वेळ: १५ मिनीटे

साहित्य:
७ ते ८ पोळ्या (आदल्या दिवशीच्या)
फोडणीसाठी: २ टिस्पून तेल, चिमूटभर मोहोरी, १/४ टिस्पून जिरे, चिमूटभर हिंग, १/४ टिस्पून हळद, १/२ टिस्पून लाल तिखट, २ कढीपत्ता पाने
१/४ कप कांदा, बारीक चिरलेला
२ टेस्पून तळलेले शेंगदाणे
१/२ टिस्पून लिंबाचा रस
चवीपुरते मिठ
२ चिमटी साखर
सजावटीसाठी चिरलेली कोथिंबीर

कृती:
१) आदल्या दिवशीच्या पोळ्या मिक्सरमध्ये बारीक करून घ्याव्यात.
२) कढईत २ टिस्पून तेल गरम करावे. त्यात मोहोरी, जिरे, हिंग, हळद, तिखट आणि कढीपत्ता घालून फोडणी करावी. त्यात कांदा घालून परतावे. शेंगदाणे घालावे.
३) तयार फोडणीत मिक्सरमध्ये बारीक केलेल्या पोळ्या घालाव्यात आणि मध्यम आचेवर परतावे. मिठ आणि साखर घालून २ मिनीटे मंद आचेवर वाफ काढावी.
फोडणीची पोळी तयार झाली कि लिंबाचा रस आणि कोथिंबीर घालून घालून गरमच सर्व्ह करावे.

टीप:
१) जर पोळ्या मिक्सरमध्ये बारीक करायची नसेल तर हातानेच बारीक तुकडे करूनही फोडणीस घालून शकतो.
२) फोडणीच्या पोळीबरोबर दही आणि लोणचे खुप छान लागते.
३) फोडणीची पोळी जर थोडी नरम पाहिजे असेल तर वाफ काढताना थोड्या ताकाचा हबका मारावा.
४) फोडणीमध्ये थोडे मटार घातल्यास फोडणीची पोळी छान लागते.

Labels:
Phodanichi poli, phodnichi poli, leftover chapati snack

भाजणीचे थालिपीठ - Bhajaniche Thalipith

Bhajani Thalipith in English

साधारण ४ मध्यम थालिपीठे
वेळ: ३० ते ४० मिनीटे

साहित्य:
१ कप थालिपीठाची भाजणी
१ कप पाणी
चवीपुरते मिठ
१ टिस्पून लाल तिखट
१/२ टिस्पून जिरे
२ चिमूट हिंग
१/४ टिस्पून हळद
१ टेस्पून तेल
१/४ कप चिरलेली कोथिंबीर
१/२ कप बारीक चिरलेला कांदा
१/४ कप तेल थालिपीठ भाजताना तव्यावर सोडण्यासाठी

कृती:
१) प्रथम भाजणीची उकड काढून घ्यावी त्यासाठी,
१ कप पाणी नॉनस्टिक भांड्यात उकळवण्यास ठेवावे. त्यात तिखट, मिठ, हिंग, हळद, जिरे, १ टेस्पून तेल घालून मिक्स करावे. पाणी उकळले कि गॅस मंद करून पाण्यात भाजणी घालावी आणि लगेच चमच्याने ढवळावे. थोडे मिक्स करून वरती झाकण ठेवून ५ मिनीटे मंद आचेवर वाफ काढावी. गॅस बंद करून वाफ अजून ५ मिनीटे मुरू द्यावे.
२) उकड थोडी कोमट झाली कि पाण्याचा हात लावून मळून घ्यावे. मळतानाच चिरलेला कांदा आणि कोथिंबीर त्यात घालून एकत्र करावे. थोडावेळ झाकून ठेवावे. नंतर ४ ते ५ मध्यम आकाराचे सारखे गोळे करून घ्यावे.
३) जाडसर प्लास्टिकचा तुकडा घ्यावा (२ फुट x १ फुट). लांबड्या बाजूकडून बरोबर अर्धा असा दुमडून घ्यावा. त्याला अगदी थोडा पाण्याचा हात लावावा. मधे १ भाजणीचा गोळा ठेवून वरती अर्धा प्लास्टीकच्या भागाने कव्हर करून लाटावे. कडेला जर भेगा पडत असतील तर बोटांनी जरा आत ढकलून सारख्या करून घ्याव्यात. मध्यम लाटावे.
४) तवा गरम करून तेल घालून त्यावर थालिपीठ घालून मध्यम आचेवर झाकण ठेवून दोन्ही बाजू खरपूस भाजून घ्यावे. (प्रत्येक बाजू साधारण २ ते ३ मिनीटे)
फक्त दह्याबरोबर किंवा दही-मिरची लोणच्याबरोबर आणि कैरी लोणच्याबरोबर थालिपीठ अप्रतिम लागते.

टीप:
१) उकड काढल्याने भाजणी चिकट होत नाही.
२) हाताने थापण्याऐवजी जर लाटण्याने लाटले तर दोन्ही बाजू प्लेन होतात आणि सर्व ठिकाणहून व्यवस्थित भाजल्या जातात.
३) बरेच जण तव्यावरच थालिपीठ थापतात, पण त्यासाठी तवा गार होण्याची वाट पाहावी लागते म्हणून लाटण्याची आयडिया उपयोगी पडते.
४) जर उकड काढायची नसेल तर भाजणीत इतर साहित्य घालून गरम पाण्याने पिठ भिजवावे आणि तव्यावर हाताने थापावे.

Labels:
Thalipith, Bhajaniche thalipeeth, bhajniche thalipith

लेमन राईस - Lemon Rice

Lemon Rice in English

२ जणांसाठी
वेळ: १० मिनीटे

साहित्य:
अडीच कप शिजलेला मोकळा भात (शिळा भात चालेल)
२ टिस्पून तूप
१/२ टिस्पून जिरे
१/८ ते १/४ टिस्पून हिंग
१/२ टिस्पून किसलेले आले
४ ते ६ कढीपत्ता पाने
मूठभर शेंगदाणे
१/२ टिस्पून उडीद डाळ
३ लाल सुक्या मिरच्या, तोडून
दिड टेस्पून लिंबाचा रस
चवीपुरते मिठ
कोथिंबीर, बारीक चिरून

कृती:
१) भात हाताने मोकळा करून घ्यावा. त्यात मिठ आणि लिंबाचा रस घालून हलक्या हाताने मिक्स करावे. शितं अख्खी राहू द्यावीत.
२) कढईत तूप गरम करावे, त्यात शेंगदाणे ब्राऊन होईस्तोवर परतावे. शेंगदाणे परतले कि त्यात जिरे, हिंग, आले, कढीपत्ता, उडीद डाळ, लाल मिरच्या घालून परतावे आणि भात फोडणीस घालावा. व्यवस्थित परतावे. कोथिंबीर पेरून गरमा गरम सर्व्ह करावे.

टीप:
१) जर ताज्या भाताचा लेमन राईस बनवायचा असेल तर भात मोकळा शिजवावा आणि मोठ्या ताटात पसरवावा, थोडा गार झाला कि अर्धा तासभर फ्रिजमध्ये ठेवावे आणि नंतर फोडणीस घालावा.
२) उरलेल्या भातापासून फोडणीभात, टॅमरिंड राईस करता येतो, तसेच इतर भाताचे प्रकार इथे पाहा.
Label:
Lemon Rice, South Indian lemon rice recipe