टोमॅटो राईस - Tomato Rice

Tomato Rice in English



वेळ: १० ते १५ मिनिटे

वाढणी: २ जणांसाठी



साहित्य:

२ कप भात (शक्यतो बासमती)

२ मोठे टोमॅटो, बारीक चिरून

३ ते ४ मोठ्या लसूण पाकळ्या, मध्यम तुकडे

२ टेस्पून तेल किंवा तूप, २ चिमटी जिरे, १/८ टीस्पून हिंग, २ हिरव्या मिरच्या, ७-८ कढीपत्ता पाने

चवीपुरते मीठ

कोथिंबीर बारीक चिरून

कृती:

१) कढईत तूप गरम करून त्यात सर्वात आधी लसूण घालावी. मोठ्या आचेवर परतावे. लसणीच्या कडा गडद ब्राऊन झाल्या पाहिजेत आणि लसणीचा कच्चा वास जावून छान सुगंध आला पाहिजे.

२) लसूण परतली गेली कि जिरे, हिंग, हिरवी मिरची आणी कढीपत्ता घालून थोडावेळ फ्राय करावे.

३) चिरलेले टोमॅटो फोडणीस घालावे, बरोबर मीठही घालावे. झाकण ठेवून मोठ्या आचेवर परतावे. टोमॅटो पूर्ण मऊ होउन कडेने तेल सुटले पाहिजे.

४) यात शिजलेला भात मोकळा करून घालावा आणि मिक्स करावे. टोमॅटोचा तयार मसाला सर्व भाताला व्यवस्थित लागला पाहिजे. झाकण ठेवून दोन-तीन मिनिटे मध्यम आचेवर वाफ काढावी.

कोथिंबिरीने सजवून गरमच सर्व्ह करावे.



टीपा:

१) हिरव्या मिरच्यांऐवजी लाल सुक्या मिरच्यासुद्धा वापरू शकतो.

२) लसूण व्यवस्थित परतली गेली पाहिजे (करपू देउ नये). जर लसूण कच्ची राहिली तर तेवढी चांगली चव भाताला येत नाही.

३) ताजे, लाल, आणि पूर्ण पिकलेले टोमॅटो वापरावेत. त्यामुळे रंग आणि चव दोन्ही छान येते.

४) आवडीप्रमाणे गरम मसाला घालू शकतो. चव छान लागते. पण गरम मसाल्याने टोमॅटोचा स्वाद नाहीसा होतो.

मसूर पुलाव - Masoor Pulao

Masoor Pulao in English

वाढणी: ३ जणांसाठी
वेळ: ४० ते ५० मिनीटे

साहित्य:
::भातासाठी ::
दिड कप बासमती राइस
३ कपा गरम पाणी
१ बादयाण (स्टार आनिस), २ तमालपत्र, 2 लवंगा
१ टेस्पून तूप
१/२ टीस्पून मिठ
::मसूर ग्रेवी ::
१/२ कप मसूर
१ टेस्पून तूप
२ वेलची, २-३ काळी मिरी
१/४ टीस्पून हळद
१ टीस्पून लाल तिखट (मी रंगासाठी १/२ टीस्पून काश्मीरी लाल तिखट आणि तिखटपणासाठी १/२ टीस्पून नेहमीचे लाल तिखट वापरले होते)
१/२ कप बारीक चिरलेला कांदा
१ टीस्पून आलं पेस्ट
१ टीस्पून लसूण पेस्ट
१/२ कप दही
१ टीस्पून धणे पूड
१/२ टीस्पून जिरे पूड
१ टीस्पून गरम मसाला
२ टेस्पून बेदाणे, थोडेसे काजू
चवीपुरते मिठ

कृती:
१) मसूर रात्रभर किंवा ७ ते ८ तास पाण्यात भिजत ठेवावे. कूकरमध्ये १ शिट्टी करून मसूर पाणी ना घालता शिजवून घ्यावे. शिजवताना थोडे मिठ घालावे.
२) पॅनमध्ये तूप गरम करून त्यात वेलची आणि मिरी घालावी. १० सेकंद परतावे. हळद, लाल तिखट आणि आलेलसूण पेस्ट घालून परतावे. कांदा घालून पारदर्शक होईतोवर परतावे.
३) आता शिजलेले मसूर आणि १/२ कप पाणी घालावे. थोडेसेच मिठ घालावे कारण आधी मसूर शिजताना मिठ घातले होते. थोडा वेळ शिजू द्यावे. आता गरम मसाला, धणे-जिरेपूड, बेदाणे, काजू घालून मिक्स करावे. चव पाहून गरजेनुसार मसाला घालावा. गॅसवरून बाजूला काढावे. ही ग्रेव्ही घट्टसरच असावी कारण थंड झाल्यावर यात नंतर दही घालायचे आहे.
४) ग्रेव्ही जरा गार झाली की त्यात घोटलेले दही घालून निट मिकस करावे. लागल्यास थोडे मिठ घालावे.
५) बासमती तांदूळ १० मिनीटे पाण्यात भिजवून ठेवावा. नंतर पाणी काढून टाकावे आणि तांदूळ २० मिनिट्स निथळत ठेवावा.
६) एक मिडीयम सॉसपॅन गरम करावा. त्यात तूप घालून वितळू द्यावे. स्टार आनिस, तमालपत्र, आणि लवंगा घालून १० सेकंद परतावे. निथळलेला तांदूळ घालून चांगला कोरडा होईस्तोवर परतावे. तांदूळ चांगला परतला गेला की तांदळाचे टेक्सचर बदलते.
७) तांदूळ चांगला परतला गेला की गरम पाणी घालावे. ढवळून झाकण न ठेवता मोठ्या आचेवर उकळू द्यावे. भाताच्या पृष्ठभागावर पाणी दिसायचे बंद झाले कि लगेच आच लहान करावी आणि झाकण ठेवून भाताला वाफ काढावी. भात नीट शिजू द्यावा.
शिजलेला भात थोडावेळ तसाच ठेवावा. कारण गरम भातात ग्रेव्ही मिक्स केली तर भाताची शीते मोडतील.
८) काट्याने (फोर्क) भात फ्लफ करून घ्यावा. एकूण ग्रेव्हीतील १/२ ग्रेव्ही घालून भात हलकेच मिक्स करावा. लागेल तशी ग्रेव्ही घालावी.
९) थोडे तूप घालून मिक्स करावे. आणि १० मिनीटे एकदम मंद आचेवर झाकण ठेवून भात गरम होऊ द्यावा.

गरम गरम पुलाव रायत्याबरोबर सेर्व्ह करावा. [रायत्याची रेसिपी]

टीपा:
१) तांदूळ मोठ्या आचेवर ६ ते ८ मिनीटे भाजल्याने भात मोकळा होतो.
२) जर मसूर भिजावायला जास्त वेळ नसेल तर २ तासा एकदम गरम पाण्यात मसूर भिजवावेत.
३) तूप जर कमी वापरायचे असल्यास ग्रेव्ही तेलात बनवावी आणि शेवटी जे तूप घालायचे आहे ते घालू नये.

पालक राईस - Palak Rice

Spinach Rice in English

वेळ: ३० मिनीटे
वाढणी: २ जणांसाठी

साहित्य:
३/४ कप बासमती तांदूळ
१ ते दिड कप बारीक चिरलेली पालकाची पाने + १/२ कप पाणी
३/४ कप गरम पाणी
१ टेस्पून बटर
१ टिस्पून बारीक चिरलेले आले
१ टिस्पून बारीक चिरलेले लसूण
१/२ कप बारीक चिरलेला कांदा
१ लहान हिरवी मिरची
आख्खे गरम मसाले - २ तमालप्रत्र, १ हिरवी वेलची, २ लवंगा
चवीपुरते मिठ

कृती:
१) तांदूळ साध्या पाण्यात १० मिनीटे भिजवून ठेवावा. १० मिनीटांनी पाणी काढून टाकावे. आणि हा तांदूळ १० मिनीटे निथळत ठेवावा.
२) १/२ कप साधं पाणी आणि पालक एकत्र करून बारीक प्युरी करून घ्यावी.
३) नॉनस्टीक पॅनमध्ये १ टेस्पून बटर किंवा तूप गरम करावे. त्यात जिरे आणि आख्खे मसाले घालावे. ५ ते १० सेकंद परतून आले-लसूण आणि मिरची घालावी.
४) निथळत ठेवलेला तांदूळ आता घालून व्यवस्थित कोरडा होईस्तोवर परतावा. सतत परतत राहा म्हणजे तांदूळ जळणार नाही. तांदूळ पूर्ण कोरडा झाला पाहिजे आणि व्यवस्थित भाजला गेला पाहिजे.
५) ३/४ कप गरम पाणी, मिठ आणि पालकाची प्युरी घालून मोठ्या आचेवर भात शिजू द्यावा. भाताच्या पृष्ठभागावर (सरफेस) पाणी दिसायचे बंद झाले कि लगेच आच मिडीयम आणि लो च्यामध्यावर ठेवावी तसेच पॅनवर झाकण ठेवावे. साधारण १० मिनीटे वाफ काढावी.
भात तयार झाला कि काट्याने (fork) हलकेच मोकळा करून घ्यावा. गरम भात रायते आणि पापडाबरोबर सर्व्ह करावा.

टीपा:
१) भात अधिक पौष्टिक बनवण्यासाठी मटार, गाजर, फरसबी अशा भाज्याही घालू शकतो.
२) तांदूळ चांगला भाजला गेल्याने भात मोकळा होतो. तसेच भात मोकळा होण्यासाठी गरम पाणी वापरावे आणि स्टेप क्र. ५ चे नक्की अवलंबन करावे.
३) लहान मुलांना हा भात नक्की आवडेल. वाटल्यास मिरची घालू नये.

मूगतांदूळाची खिचडी - Moongdal Khichdi

Moong dal Khichdi in English

वाढणी: २ ते ३ जणांसाठी
वेळ: २० ते २५ मिनीटे

साहित्य:
१ कप तांदूळ
१/२ कप मूग डाळ (टीप १ व २)
तीन ते साडेतीन कप गरम पाणी (टीप ३)
फोडणीसाठी:- १ टेस्पून तेल, २ चिमटी मोहोरी, १/४ टिस्पून जिरे, १ चिमटी हिंग, १/४ टिस्पून हळद, १/४ टिस्पून लाल तिखट
१/२ कप मटार (टीप ५)
१ टिस्पून गोडा मसाला
चवीपुरते मिठ

कृती:
१) खिचडी करायच्या आधी तांदूळ आणि डाळ एकत्र करून पाण्याने स्वच्छ धुवावे. पाणी काढून १/२ तास निथळत ठेवावे.
२) लहान कूकरमध्ये (टीप ६) तेल गरम करावे त्यात मोहोरी, जिरे, हिंग, हळद, आणि तिखट घालून फोडणी करावी. नंतर डाळ आणि तांदूळ घालून परतावे. साधारण ३-४ मिनीटे परतावे. डाळ-तांदूळ चांगले कोरडे झाले पाहिजेत.
३) डाळ तांदूळ परतले कि मटार टाकून थोडासा वेळ आणखी परतावे. नंतर यात गरम पाणी घालावे. गोडामसाला आणि मिठ घालावे. ढवळून पाण्याची चव पाहावी. लागल्यास मिठ, किंवा लाल तिखट घालावे.
४) पाण्याला उकळी आली कि कूकरचे झाकण लावून ३ ते ४ शिट्ट्या होवू द्याव्यात. वाफ मुरली (साधारण १० मिनीटे) कि कूकर उघडून खिचडी सर्व्ह करावी.
खिचडीवर १ चमचा तूप घालावे.

टीप:
१) मूगाच्या पिवळ्या डाळीऐवजी, मूगाची सालासकट डाळ किंवा तूरडाळ, मसूर डाळही वापरता येते.
२) डाळीचे प्रमाण आवडीनुसार कमी-जास्त करता येते.
३) खिचडी जर मऊ हवी असेल तर पाण्याचे प्रमाण थोडे वाढवावे व फडफडीत हवी असल्यास किंचीत कमी करावे.
४) तांदूळ चांगले भाजल्याने खिचडीचा गोळा होत नाही आणि शितं वेगवेगळी राहतात. भाजताना फक्त ते जळणार नाहीत याची काळजी घ्यावी.
५) मटारऐवजी बटाटा, फ्लॉवर, भोपळी मिरची, कांदा, गाजर इत्यादी घालू शकतो.
६) खिचडी कूकर न वापरता थेट पातेल्यातही करता येते. पातेल्यात फोडणी करून त्यात तांदूळ परतावे आणि गरम पाणी व इतर साहित्य नेहमीसारखेच घालावे. फक्त पाणी साधारण तिप्पट लागते. भाजलेल्या तांदूळात पाणी घातले कि झाकण न ठेवता मोठ्या आचेवर शिजवावे आणि पाण्याचे बुडबूडे कमी झाले व पाणी कमी होवून तांदूळ दिसायला लागले कि आच बारीक करून पातेल्यावर झाकण ठेवावे आणि खिचडी शिजू द्यावी. फक्त तूरडाळ वापरणार असाल तर ती आधी पाण्यात भिजवून ठेवावी, कारण ती लगेच शिजत नाही.

वरी तांदूळ पुलाव - Samo Rice Pulav

Samo Rice Pulao in English

वेळ: २५ ते ३० मिनीटे
वाढणी: ३ ते ४ जणांसाठी

>साहित्य:
१ कप वरी तांदूळ
२ टिस्पून तूप
१/२ टिस्पून जिरे
२ हिरव्या मिरच्या
१/२ कप भोपळ्याचे मध्यम तुकडे (साल काढून टाकावे)
१/२ कप बटाट्याचे तुकडे (बटाटा सोलून)
२ टेस्पून शेंगदाण्याचा कूट
चवीपुरते मिठ
साधारण ३ कप उकळते पाणी

कृती:
१) जाड बुडाच्या पातेल्यात वरी तांदूळ थोडे भाजून घ्यावे, म्हणजे भात हलका होतो. तांदूळ एका भांड्यात तात्पुरता काढून ठेवावेत.
२) त्याच पातेल्यात तूप गरम करावे त्यात जिरे आणि मिरच्या घालून परतावे. गॅस मध्यम ठेवावा. बटाट्याच्या फोडी घालून एक वाफ काढावी. बटाटा जवळजवळ शिजला कि त्यात वरी तांदूळ घालावेत.
३) मिक्स करून त्यात गरम पाणी घालावे. मिठ घालावे. एक दोन मिनीटांनी भोपळ्याच्या पातळ फोडी आणि दाण्याचा कूट घालावा. मध्यम आचेवर वाफ काढावी.
गरमागरम वरीचा पुलाव दाण्याच्या आमटीबरोबर किंवा फोडणीच्या ताकाबरोबर सर्व्ह करावा.

पनीर बिर्याणी - Paneer Biryani

Paneer Biryani In English

वाढणी : ५ ते ६ जणांसाठी
वेळ: साधारण १ ते दिड तास

साहित्य:
२ कप बासमती तांदूळ
३-४ वेलची, ३-४ तमालपत्र, ३-४ लवंगा, १ लहान दालचिनीची काडी
चवीपुरते मिठ
पनीर मॅरीनेशन
२५० ग्राम पनीर, १/२ कप दही, १ टिस्पून आलेलसूण पेस्ट, १/४ टिस्पून मिठ
ग्रेव्ही
१ कप कांदा, उभा पातळ चिरून
५ टोमॅटो, २ टिस्पून आलेलसूण पेस्ट, २ टिस्पून तूप
खडा गरम मसाला - २ वेलची, ३-४ लवंगा, ३-४ मिरीदाणे, २-३ तमालपत्र
१ टिस्पून धणेपूड, १ टिस्पून जिरेपूड, १ टिस्पून गरम मसाला, १/२ टिस्पून लाल तिखट
१ कप मिल्क पावडर (किंवा १/२ कप क्रिम) (टीप ५)
चवीपुरते मिठ
साधारण पाऊण ते एक कप भाज्यांचे तुकडे :- मटार + गाजर लहान तुकडे + फरसबी तुकडे
इतर साहित्य
४ टेस्पून तूप + अजून तूप ऐच्छिक, १ कप कांद्याचे पातळ उभे काप, ८ ते १० काजूबी, ८ ते १० बेदाणे, १/४ कप पुदीना बारीक चिरून, १/४ कप कोथिंबीर बारीक चिरून, २ टिस्पून दूध + ३ ते ४ केशराच्या काड्या (टीप ६)

कृती:
पनीर
दही फेटून घ्यावे. त्यात आलेलसूण पेस्ट आणि मिठ घालून मिक्स करावे. पनीरचे तुकडे या मिश्रणात १/२ तास घोळवून ठेवावे.
भात
१) तांदूळ स्वच्छ धुवून १/२ तास निथळत ठेवावेत. पातेल्यात ६ कप पाणी गरम करण्यास ठेवावे. त्यात वेलची, लवंगा, दालचिनी, तमालपत्र आणि मिठ घालून पाण्याला उकळी येऊ द्यावी. पाणी उकळले कि त्यात धुतलेले तांदूळ घालावे. भात साधारण ६० ते ७० % शिजला कि चाळणीमध्ये ओतावा आणि अधिकचे पाणी काढून टाकावे. तयार भात परातीत मोकळा करून गार होण्यास ठेवावा.
ग्रेव्ही
१) पाणी उकळवावे. त्यात टोमॅटो घालून २ मिनीटांनी गार पाण्यात सोडावे. सालं सुटली कि काढून टाकावी. आतील गराच्या मध्यम फोडी कराव्यात.
२) कढईत २ टिस्पून तूप गरम करून त्यात खडा गरम मसाला काही सेकंद परतावा. आलेलसूण पेस्ट परतावी. कांदा घालून तो गुलाबी रंग येईस्तोवर परतावा. नंतर चिरलेल्या टोमॅटोच्या फोडी घालून त्या नरम होईस्तोवर परतावे. लाल तिखट घालावे.
३) हे मिश्रण थोडे गार होवू द्यावे. मिक्सरमध्ये पाणी न घालता प्युरी करावी.
४) कढईत साधारण २ टेस्पून तूप गरम करावे. यामध्ये काजूबी आणि बेदाणे परतून बाजूला काढून ठेवावे. याच तुपात हि प्युरी परत कढईत घ्यावी. मध्यम आचेवर गरम करण्यास ठेवावी. त्यात धणेजिरेपूड, गरम मसाला घालावा. मिल्क पावडर घालावी. भाज्या घालाव्यात. निट ढवळून हे मिश्रण घट्टसर करावे. चवीपुरते मिठ घालावे. हि ग्रेव्ही एकदम पातळ किंवा एकदम घट्टही नसावी (टीप १). ग्रेव्ही दाटसर होत आली कि पनीरचे मॅरीनेट केलेले तुकडे घालून थोडा वेळ उकळी काढावी.
तळलेला कांदा
तुपात किंवा तेलात कांद्याचे पातळ काप (१ कप) खरपूस तळून काढावेत. हा तळलेला कांदा सजावटीसाठी वापरावा.
बिर्याणी (टीप २, ३, ४)
एकदा भात आणि ग्रेव्ही तयार झाली कि भाताचे ४ आणि ग्रेव्हीचे ३ असे समसमान भाग करून घ्यावे. एका खोलगट नॉनस्टिक पॅनमध्ये पहिले तूप सोडावे आणि पसरवून घ्यावे. प्रथम भाताचा एक भाग घेऊन समान पसरावा. त्यावर ग्रेव्हीचा १ भाग समान पसरवून घ्यावा. थोडा चिरलेला पुदीना आणि कोथिंबीर घालावी. ३-४ काजू, बेदाणे घालावे. अशाप्रकारे सर्व थर पूर्ण करावे. भाताचा शेवटचा थर दिला कि त्यावर तळलेला कांदा, उरलेले काजू बेदाणे आणि दूधात कालवलेले केशर असे पसरावे. वरती घट्ट झाकण ठेवावे, वाफ बाहेर जाता कामा नये. एकदम मंद आचेवर १५ ते २० मिनीटे वाफ काढावी. गरम गरम बिर्याणी रायत्याबरोबर सर्व्ह करावी.

टीप:
१) ग्रेव्ही पातळ नसावी. पातळ ग्रेव्हीमुळे बिर्याणी बनवताना भाताची शिते मोडतात आणि भात मोकळा न होता ओलसट आणि गच्च होतो. बिर्याणीचे थर करताना पसरता येईल इतपत दाट ठेवावी.
२) जर ओव्हनमध्ये बिर्याणीला वाफ काढायची असेल ओव्हन २५० डीग्री F वर प्रिहीट करावा. नंतर बेकिंग पॅनमध्ये वरीलप्रमाणेच थर करावे. वरती ओव्हनसेफ झाकण ठेवावे किंवा अल्युमिनीयम फॉईलने घट्ट सिल करावे आणि १५-२० मिनीटे वाफ काढावी.
३) जर नॉनस्टिक पॅन नसेल तर जाड बुडाच्या पातेल्यात तूप घालून वरीलप्रमाणेच थर करावे. आणि डायरेक्ट गॅसवर न ठेवता खाली एक तवा ठेवावा त्यावर भांडे ठेवावे म्हणजे भात करपणार नाही.
४) प्रत्येक थरामध्ये पातळ केलेले तूप गरजेनुसार घालावे. यामुळे बिर्याणीला खुपच छान चव येते.
५) शक्यतो मिल्क पावडर वापरावी म्हणजे ग्रेव्हीला दाटपणा लगेच येतो. तसेच क्रिम वापरणार असाल तर क्रिम घातल्यावर ते ग्रेव्हीमध्ये निट मिक्स होईस्तोवर ढवळा म्हणजे ते ग्रेव्हीत फुटणार नाही.
६) जर केशर नसेल तर चिमूटभर खायचा केशरी रंग २ टिस्पून दूधात घालून तो वापरावा.

नारळी भात - Narali Bhat

Narali Bhat in English

वेळ: साधारण ४५ ते ५० मिनीटे(पूर्वतयारी: २० ते ३० मिनीटे । पाककृतीस लागणारा वेळ: २५ मिनीटे)
वाढणी: २ ते ३ जणांसाठी

साहित्य:
३/४ कप तांदूळ
दिड कप पाणी
२ + १ टेस्पून साजूक तूप
२ ते ३ लवंगा
१/४ टिस्पून वेलची पूड
१ कप गूळ, किसलेला (टीप २)
१ कप ताजा खोवलेला नारळ
८ ते १० काजू
८ ते १० बेदाणे

कृती:
१) तांदूळ धुवून चाळणीत अर्धा ते पाऊण तास निथळत ठेवावेत.
२) पातेल्यात २ टेस्पून तूप गरम करावे. लवंग घालून काही सेकंद परतावे. निथळलेले तांदूळ घालून २-३ मिनीटे मध्यम आचेवर परतावे.
३) तांदूळ परतत असतानाच दुसर्‍या गॅसवर दिड कप पाणी गरम करावे.
४) गरम पाणी परतलेल्या तांदूळात घालावे. पातेल्यावर झाकण ठेवून मध्यम आचेवर भात शिजवावा. भात शिजला कि हलक्या हाताने एका थाळीत काढून मोकळा करावा. शिते मोडणार नाहीत याची खबरदारी घ्यावी.
५) नारळ आणि गूळ एकत्र मिक्स करावे. भात गार झाला कि हे मिश्रण भातात अगदी हलक्या हाताने मिक्स करावे.
६) जाड बुडाचे पातेले गरम करावे. त्यात तूप गरम करून काजू आणि बेदाणे गुलाबी रंगावर तळून घ्यावे.
७) झार्‍याने काजू आणि बेदाणे दुसर्‍या वाटीत काढावे. गॅस मंद करून उरलेल्या तूपात भात-नारळ-गूळ यांचे मिश्रण घालावे. वेलचीपूड घालावी. घट्ट झाकण ठेवून ३-४ वाफा काढाव्यात. मधून मधून हलकेच भात वरखाली करावा. साधारण १० ते १५ मिनीटे शिजवावे.
८) भात सुरूवातीला थोडा पातळ होईल आणि काही मिनीटांनी आळेल. शेवटची २-३ मिनीटे झाकण न ठेवता भात शिजवा. तळलेले काजू, बेदाणे घालावे. सर्व्ह करताना तूप घालून सर्व्ह करावे.

टीप्स:
१) गूळ-नारळ-भात यांचे मिश्रण शिजवताना गूळ वितळल्याने सुरूवातीला ते पातळ होते. काहीवेळ शिजवल्यावर ते आळत जाईल. तसेच नारळीभात तयार झाल्यावर शेवटची काही मिनीटे झाकण न ठेवता शिजवावे म्हणजे अधिकचा ओलसरपणा निघून जाईल.
२) जर नारळीभात खुप गोड नको असेल तर गूळाचे प्रमाण १ कप ऐवजी पाऊण कप वापरा.
३) जर नारळीभात तयार झाल्या झाल्या लगेच चव पाहिली तर प्रचंड गोड लागेल, पण काही कालावधीनंतर गुळाचा पाक भातात मुरल्याने गोडपणा काहीप्रमाणात कमी होतो.
४) तांदूळ परफेक्ट शिजवावा. कमी शिजलेल्या भाताची शिते, गूळाच्या संपर्कात आल्यामुळे कडकडीत होतात. तसेच जास्त शिजलेल्या भाताचा, गूळ आणि नारळ घालून शिजवल्यावर गोळा होतो आणि शिते आख्खी राहात नाहीत.
५) भात शिजवताना थोडे केशर घातल्यास स्वाद आणि रंग छान येतो.

Labels:
coconut rice, narali bhat, narali paurnima, raksha bandhan

मायक्रोवेव तोंडली भात - Tondali Bhat

Tondli Rice in English

२ ते ३ जणांसाठी
वेळ: ५ ते ७ मिनीटे मसाला आणि फोडणी बनविण्यास + २० मिनीटे मायक्रोवेव

साहित्य:
१ कप बासमती तांदूळ
२ कप पाणी
१५ ते १८ कोवळी तोंडली
मसाला: १ टिस्पून तेल किंवा तूप, १ इंच काडी दालचिनी, २ वेलची, ४ मिर्‍या, ४ लवंगा, १/४ टिस्पून जिरे, ३ लाल सुक्या मिरच्या, २ टेस्पून ताजा खोवलेला नारळ (सुके खोबरे असल्यास १ टेस्पून वापरावे)
फोडणीचे साहित्य: १ टेस्पून तूप, १/८ टिस्पून मोहोरी, १/४ टिस्पून जिरे, २ चिमटी हिंग, १/४ टिस्पून हळद, ५ ते ६ कढीपत्ता पाने
७-८ काजू पाकळ्या
चवीपुरते मिठ
सजावटीसाठी बारीक चिरलेली कोथिंबीर, ताजा खोवलेला नारळ गरजेप्रमाणे
भातावर वाढण्यासाठी साजूक तूप

कृती:
१) तांदूळ गार पाण्याने धुवून पाणी काढून टाकावे व १५ मिनीटे निथळत ठेवावे.
२) तोंडली स्वच्छ धुवून घ्यावीत. चिरतना बाजूला एक गार पाण्याचे भांडे घ्यावे ज्यात चिरलेली तोंडली ठेवता येतील. प्रत्येक तोंडल्याची देठं कापून उभे चार भाग करावे. अशाप्रकारे सर्व तोंडली चिरून घ्यावीत आणि पाण्यात बुडवून ठेवावीत म्हणजे काळी पडणार नाहीत.
३) नंतर मसाला बनवून घ्यावा. १ टिस्पून तेलात दालचिनी, वेलची, मिरे, लवंगा परतून घ्याव्यात. नंतर जिरे घालावे. ते तडतडले कि सुक्या मिरच्या आणि नारळ घालून २ मिनीटे मंद आचेवर परतावे. हा परतलेला मसाला जरा गार झाला कि मिक्सरमध्ये वाटून घ्यावा.
४) पॅनमध्ये तूप गरम करून त्यात मोहोरी, जिरे, हिंग, हळद आणि कढीपत्ता घालून फोडणी करावी. गॅस एकदम मंद करावा यात काजूबी घालून तेवढ्याच उष्णतेवर परतावे. तसेच तोंडलीही मिनीटभर परतावीत. गॅस बंद करावा.
५) तुम्ही ज्या मायक्रोवेव सेफ भांड्यात भात बनवणार आहात त्या भांड्यात २ कप पाणी घ्या. मायक्रोवेवमध्ये हाय पॉवरवर २ मिनीटे गरम करून घ्यावे. त्यात निथळलेले तांदूळ, मिठ, फोडणीस घातलेली तोंडली (क्रमांक ४) आणि मिक्सरमध्ये वाटलेला मसाला (क्रमांक ३) हे सर्व मिक्स करावे.
६) हे मिश्रण प्रथम हाय (१००) पॉवरवर ५ मिनीटे मायक्रोवेव करावीत. भांडे बाहेर काढून एकदा ढवळून घ्यावे. आणि मिडीयम लो (४०) पॉवरवर साधारण १५ मिनीटे भात शिजू द्यावा.
गरमागरम भात सर्व्हींग प्लेटमध्ये घालून त्यावर कोथिंबीर, नारळ आणि साजूक तूप घालून सर्व्ह करावे.

टीप:
१) १ कप तांदूळाला २ कप पाणी पुरेसे होते पण थोडा फडफडीत होतो. म्हणून वाटल्यास अजून १/४ कप पाणी घातले तरी भात छान होतो.
२) वरील कृतीत फोडणीसुद्धा मायक्रोवेवमध्ये करता येते, पण गॅसवर केलेल्या फोडणीचा खमंगपणा येत नाही.
३) हा भात गॅसवरही करता येतो. फोडणी (क्र. ४) करून त्यात भात २ मिनीटे परतावा त्यात अडीच कप गरम पाणी घालावे. तयार केलेला मसाला आणि मिठ घालून शिजू द्यावे.

Labels:
Tondli bhat, Tondalee bhaat, tondli rice, tendli rice

वरी तांदूळ - Vari Tandul Bhat

Vari Tandulacha Bhat in English

वेळ: १० ते १५ मिनीटे
वाढणी: २ ते ३ जणांसाठी

वरी तांदूळाचा भात शेंगदाण्याच्या आमटीबरोबर अतिशय सुरेख लागतो. शेंगदाणा आमटीच्या कृतीसाठी इथे क्लिक करा.
इतर संबंधित पाककृती : उपासाची बटाटा भाजी । उपासाच्या इतर पाककृती.

साहित्य:
३/४ कप वरी तांदूळ (उपासाची भगर)
अडीच कप गरम पाणी
१ टिस्पून तूप
१/४ टिस्पून जिरे
चवीपुरते मिठ

कृती:
१) पातेल्यात तूप गरम करावे, त्यात जिरे घालून थोडे तडतडू द्यावे. वरी तांदूळ घालून थोडावेळ परतावे.
२) तांदूळ जरासे गुलाबीसर झाले कि अडीच कप गरम पाणी घालावे. चवीनुसार मिठ घालून ढवळावे आणि पातेल्यावर झाकण ठेवून मंद आचेवर वरी तांदूळ शिजू द्यावा.

टीप:
१) वरी तांदूळ आपापल्या चवीनुसार बनवता येतो. काही जण प्लेन वरी तांदूळ बनवतात. ज्यामध्ये तूपात फक्त तांदूळ परतून मिठ घालून शिजवतात.
२) वरी तांदूळ शिजताना एखादे आमसुल घातल्यास छान आंबटसर चव येते.
३) जर एकदम मऊसर भगर (वरी तांदूळ) हवी असेल तर पाण्याचे प्रमाण पाऊण कपाने वाढवावे.

Labels:
vari Tandul, Bhagar, Samo seeds rice, fasting recipes,

सिंगापूर नूडल्स राईस - Singapore Noodles Rice

Singapore Noodles Rice in English

वाढणी: २ जणांसाठी
वेळ: ३५ मिनीटे

साहित्य:
३/४ कप तांदूळ (बासमती)
५० ग्राम नुडल्स
१/४ कप गाजराचे लहान चौकोनी तुकडे
१/४ कप भोपळी मिरची, लहान चौकोनी तुकडे
१/४ कप वाटाणे
१/४ कप कांदा, उभा पातळ चिरून
१ पाती कांद्याची काडी, बारीक चिरून (हिरवा भाग सजावटीसाठी)
१ इंच आले, किसून
५ ते ६ लसूण पाकळ्या, ठेचून
२ हिरव्या मिरच्या, उभ्या चिरून
१ टिस्पून सोयासॉस
१ टिस्पून व्हिनेगर
१/४ टिस्पून मिरपूड
१ टिस्पून साखर
१ टेस्पून करी पावडर (मी मद्रास करी पावडर वापरली होती)
२ टेस्पून तेल
चवीपुरते मिठ

कृती:
१) तांदूळ धुवून घ्यावा आणि १५ मिनीटे निथळत ठेवावा. पातेल्यात साधारण ४ कप पाणी उकळावे त्यात १ टिस्पून मिठ घालावे. पाणी उकळायला लागले कि धुतलेला तांदूळ त्यात घालून मोठ्या आचेवरच तांदूळ ९० % शिजेस्तोवर उकळू द्यावे. तांदूळ शिजला कि चाळणीत ओतून त्यातील पाणी काढून टाकावे आणि हलकेच गार पाणी सोडावे. भात तसाच चाळणीत निथळत ठेवावा.
२) नूडल्स हाताने थोड्या क्रश करून घ्याव्यात, साधारण १ ते २ इंचाचे तुकडे करावेत. २ ते ३ कप पाणी उकळण्यास ठेवावे. नूडल्स पाकिटावरील सुचना वाचून नुडल्स शिजवाव्यात. शिजलेल्या नुडल्स गाळून घ्याव्यात.
३) पॅनमध्ये १ टेस्पून तेल गरम करावे. त्यात आले, लसूण, हिरव्या मिरच्या आणि कांदा साधारण २० ते ३० सेकंद परतावा. नंतर त्यात गाजर घालून मिनीटभर परतावे. त्यात भोपळी मिरचीचे तुकडे घालून साधारण ३० सेकंद परतावे. लगेच पातीकांदा घालून थोडावेळ परतावे.
४) परतलेल्या भाज्यांमध्ये १ टेस्पून तेल घालून गरम होवू द्यावे. त्यात करी पावडर घालून ढवळावे. निट मिक्स करावे. आता भात, सोयासॉस, मिरपूड, व्हिनेगर, आणि साखर घालून मिक्स करावे. भाताची शिते मोडणार नाहीत याची काळजी घ्यावी. नंतर शिजलेल्या नूडल्सही घालाव्यात. लागल्यास थोडे मिठ घालावे. भाज्या आणि मसाला भाताला सर्व ठिकाणी लागेल अशाप्रकारे मिक्स करावे.
पातीकांद्याने सजवावे आणि गरमागरम सर्व्ह करावे.

Labels:
Singapore fried Rice, Singapore Noodles rice, Asian Rice recipes

लेमन राईस - Lemon Rice

Lemon Rice in English

२ जणांसाठी
वेळ: १० मिनीटे

साहित्य:
अडीच कप शिजलेला मोकळा भात (शिळा भात चालेल)
२ टिस्पून तूप
१/२ टिस्पून जिरे
१/८ ते १/४ टिस्पून हिंग
१/२ टिस्पून किसलेले आले
४ ते ६ कढीपत्ता पाने
मूठभर शेंगदाणे
१/२ टिस्पून उडीद डाळ
३ लाल सुक्या मिरच्या, तोडून
दिड टेस्पून लिंबाचा रस
चवीपुरते मिठ
कोथिंबीर, बारीक चिरून

कृती:
१) भात हाताने मोकळा करून घ्यावा. त्यात मिठ आणि लिंबाचा रस घालून हलक्या हाताने मिक्स करावे. शितं अख्खी राहू द्यावीत.
२) कढईत तूप गरम करावे, त्यात शेंगदाणे ब्राऊन होईस्तोवर परतावे. शेंगदाणे परतले कि त्यात जिरे, हिंग, आले, कढीपत्ता, उडीद डाळ, लाल मिरच्या घालून परतावे आणि भात फोडणीस घालावा. व्यवस्थित परतावे. कोथिंबीर पेरून गरमा गरम सर्व्ह करावे.

टीप:
१) जर ताज्या भाताचा लेमन राईस बनवायचा असेल तर भात मोकळा शिजवावा आणि मोठ्या ताटात पसरवावा, थोडा गार झाला कि अर्धा तासभर फ्रिजमध्ये ठेवावे आणि नंतर फोडणीस घालावा.
२) उरलेल्या भातापासून फोडणीभात, टॅमरिंड राईस करता येतो, तसेच इतर भाताचे प्रकार इथे पाहा.
Label:
Lemon Rice, South Indian lemon rice recipe

कॉर्न आणि मेथी पुलाव

Corn and Methi Pulao in English

कॉर्न आणि मेथी पुलाव

वाढणी : २ जणांसाठी



साहित्य:
३/४ कप बासमती तांदूळ
३/४ कप मेथीची पाने
३/४ कप कांदा, पातळ उभा चिरून
२ हिरव्या मिरच्या, उभ्या चिरून
१/२ कप मक्याचे दाणे, उकडून
१ टिस्पून किसलेले आले
३ टेस्पून तेल
३/४ कप दही
२ तमाल पत्र
४ लवंगा
२ वेलची
दिड कप पाणी
चवीपुरते मिठ
१ टेस्पून तूप
चिमूटभर कसूरी मेथी, पूड करून घ्यावी
थोडी कोथिंबीर, सजावटीसाठी

कृती:
१) मेथी साफ करण्यासाठी, बारीक चिरून १/२ तास मिठाच्या पाण्यात भिजवून ठेवावी. बासमती तांदूळ धुवून, पाण्यात २० मिनीटे भिजवून ठेवावा.
२) धुतलेली मेथी पाण्यातून काढून पिळून घ्यावी म्हणजे मेथीचा कडवटपणा कमी होईल. भिजवलेले तांदूळही निथळून १० मिनीटे ठेवावे.
३) एका खोलगट पातेल्यात तेल गरम करावे. त्यात तमालपत्र, वेलची आणि लवंगा घालून काही सेकंद परतावे. नंतर त्यात उभा चिरलेला कांदा घालून मिडीयम हाय गॅसवर ५ मिनीटे किंवा लालसर होईस्तोवर परतावे. नंतर त्यात आलं आणि हिरव्या मिरच्या घालून परतावे.
४) आता पिळून घेतलेली मेथी घालून २ मिनीटे परतावे. त्यात घोटून घेतलेले दही घालून ढवळत राहावे. दही घट्टसर झाले कि त्यात उकडलेले कॉर्न घालावे. छान मिक्स करून पाणी घालावे. पाण्याला उकळी येऊ द्यावी.
५) एकदा पाणी उकळू लागले कि त्यात धुतलेले तांदूळ घालावे. मध्यम आचेवर, झाकण न ठेवता तांदूळ शिजू द्यावे. ६० % पर्यंत तांदूळ शिजेपर्यंत झाकण ठेवू नये. नंतर झाकण ठेवून मंद आचेवर तांदूळ पूर्ण शिजू द्यावा. फक्त गरज असेल तेव्हाच हलक्या हाताने भात ढवळावा. खुप जास्तवेळा ढवळू नये, त्यामुळे भाताची शिते तुटतात आणि भात निट बनत नाही.
भात व्यवस्थित शिजला कि वरून १ टेस्पून तूप घालावे आणि हलक्या हाताने सर्व्हींग प्लेटमध्ये वाढावा. फ्लेवरसाठी थोडी कसूरी मेथी भुरभूरावी. थोडी कोथिंबीर पेरून सजवावे.

टीप:
१) आवडीनुसार मेथीचे प्रमाण कमीजास्त करावे.

Labels:
methi corn pulao, Pilaf, Corn Pulav

पाइनॅपल फ्राईड राईस - Pineapple Fried Rice

Pineapple Fried Rice in English

वाढणी: २ ते ३ जणांसाठी

साहित्य:
३/४ कप बासमती तांदूळ
१/२ टिस्पून + १ टेस्पून तेल
१ टेस्पून किसलेले आले
१-२ हिरव्या मिरच्या
३ पाती कांदा बारीक चिरून (चिरलेल्यातील थोडा पातीकांदा गार्निशींगसाठी ठेवावा)
१/२ कप अननसाचे बारीक तुकडे
१ टिस्पून सोयासॉस
१/२ वेजिटेबल स्टॉकची क्युब (ऑप्शनल) वेजिटेबल स्टॉक बनवण्यासाठी

हा भात चायनिज स्टर फ्राईड वेजिटेबल्स बरोबर छान लागतो.

कृती:
१) बासमती तांदूळ धुवून घ्यावा. एका पातेल्यात तांदूळाच्या दुप्पट ते सव्वा दोनपट पाणी गरम करत ठेवावे. त्यात उपलब्ध असल्यास वेजिटेबल स्टॉकची १/२ क्युब घालावी. ती विरघळली कि तांदूळ घालावे. थोडे मिठ आणि १/२ टिस्पून तेल घालावे. भात मोकळा शिजवावा.
२) शिजवलेला भात एका ताटात काढून थंड होवू द्यावा. आणि भाताच्या ताटावर दुसरे ताट ठेवून हा भात थोडा वेळ (२० मिनीटे) फ्रिजमध्ये ठेवावा. म्हणजे भाताला चिकटपणा येणार नाही आणि अजून मोकळा होईल.
३) नंतर कढईत १ टेस्पून तेल गरम करून त्यात १/२ टेस्पून किसलेले आले घालावे, उभ्या चिरलेल्या मिरच्या घालाव्यात. पाती कांदा घालून अगदी १० सेकंद परतावे. सोयासॉस घालून लगेच भात घालावा. १-२ मिनीटे परतावे. गरजेनुसार मिठ घालावे.
४) गॅस मंद करून त्यात अननसाचे तुकडे घालून मिनीटभर परतावे. उरलेले आले घालून मिक्स करावे.
हा भात गरम गरम सर्व्ह करावा. सर्व्ह करताना गार्निशींगसाठी वरून थोडा चिरलेला पाती कांदा घालावा.

Labels:
Pineapple fried Rice, Fried Rice recipe

मेक्सिकन राईस - Mexican Rice

Mexican Rice in English

वाढणी २ जणांसाठी

Mexican Cuisine is famous for flavorful and colorful dishes. Previously I had posted few Mexican recipes like Mexican Salad, Red Beans with Rice and Quesadilla which are little Indianised way. Today I am posting recipe of Mexican Rice which is sauteed in Pure Ghee. Because of Ghee Rice becomes more flavorful and delectable.


साहित्य:
१/२ कप तांदूळ
३ कप वेजिटेबल स्टॉक
२ टेस्पून तूप
१ टेस्पून लसूणपेस्ट
१ कप कांदा, पातळ उभा चिरून (लांबी एक इंच)
१/२ कप भोपळी मिरची, लहान चौकोनी तुकडे
१/२ टिस्पून लाल तिखट
१ मोठा किंवा २ मध्यम टॉमेटो [१/२ ते ३/४ कप Canned Chopped Tomatoes]
१/२ कप कोबी, उभी चिरून
१/२ कप पाती कांदा, बारीक चिरून
१/४ कप ड्राय रेड बिन्स [१/२ कप कॅन्ड बिन्स]
२ टेस्पून उकडलेले मक्याचे दाणे [२ टेस्पून कॅन्ड मक्याचे दाणे]
१ तमालपत्र
चवीनुसार मिठ
किसलेले चिज (ऐच्छिक)


कृती:
१) जर कॅनमधील बिन्स वापरणार असाल तर तुम्ही लगेच हा भात करू शकता. पण ड्राय रेड बिन्स वापरणार असाल तर ६ ते ७ तास बिन्स भिजवून ठेवाव्यात. नंतर थोडे मिठ घालून प्रेशर कूकरमध्ये मध्यम शिजवून घ्याव्यात. बिन्स अख्ख्या राहिल्या पाहिजेत.
२) तांदूळ स्वच्छ धुवून घ्यावा. पॅनमध्ये स्टॉक गरम करावा. त्यात धुतलेले तांदूळ घालावे. थोडे मिठ आणि तेल घालून तांदूळ मोकळा शिजवून घ्यावा. भात शिजला कि गाळून घ्यावा. परातीत किंवा ताटलीत मोकळा करून गार करावा.
३) खोलगट पॅनमध्ये पाणी गरम करावे. उकळत्या पाण्यात टॉमेटो घालावे. ४५ सेकंदांनंतर गॅस बंद करावा. लगेच टॉमेटो बाहेर काढून गार पाण्यात घालावेत, यामुळे टॉमेटोची साले निघतील. ती काढून आतला गर अलगद काढून सुरीने बारीक चिरून घ्यावा.
४) नॉनस्टिक पॅनमध्ये तूप गरम करावे त्यात तमालपत्र आणि लसूणपेस्ट परतावी. लाल तिखट आणि कांदा घालून परतावे. कांदा १/२ मिनीटंच परतावा आणि लगेच भोपळी मिरची घालावी. अर्धवट शिजवावे आणि त्यात टॉमेटो घालून थोडावेळ परतावे. तमालपत्र काढून टाकावे.
५) नंतर शिजवलेल्या बिन्स आणि मक्याचे दाणे घालून १/२ ते १ मिनीट परतावे. शिजवलेला भात घालून मोठ्या आचेवर परतावे. गरजेपुरते मिठ घालावे.
६) कोबी आणि थोडा पाती कांदा घालून परतावे. सर्व्ह करताना किसलेले चिज आणि पाती कांदा घालावा.

टीप:
१) वेजिटेबल स्टॉक नसेल किंवा करायला वेळ नसेल तर तांदूळ साध्या पाण्यातही शिजवू शकतो.

Labels:
Mexican Corn and beans rice, Mexican veg Red rice, texmex food

तवा पुलाव - Tava Pulav

Tawa Pulao (English Version)

वाढणी : २ जणांसाठी


हा चमचमीत तवा पुलाव चविष्ट अशा रायत्याबरोबर खा आणि खिलवा !!!



साहित्य:
:::: भातासाठी ::::
१ टिस्पून + १ टिस्पून बटर
३/४ कप बासमती तांदूळ
दिड ते पाउणेदोन कप पाणी
मिठ
:::: मसाला ::::
गाजर : १/८ कप पातळ चिरलेले (१ इंच तुकडे)
भोपळी मिरची: १/४ कप पातळ उभी चिरलेली (१ इंच तुकडे)
फ्लॉवरचे तुरे अर्धे शिजवलेले : १/४ कप
कांदा : १/४ कप बारीक चिरून १/८ कप उभा चिरून
टॉमेटो : १/२ कप बारीक चिरून
शिजवलेला बटाटा : १/८ कप बारीक फोडी
वाफवलेले मटार : १/४ कप
दिड टिस्पून लसूण पेस्ट
१/२ टिस्पून जिरे
दिड टिस्पून लाल तिखट
२ टिस्पून बटर
१ टिस्पून पावभाजी मसाला
खडा मसाला : १ लहान तुकडा दालचिनी, २ लवंगा, १ तमाल पत्र, १ वेलची
सजावटीसाठी चिरलेली कोथिंबीर

कृती:
१) बासमती तांदूळ धुवून १० मिनीटे निथळत ठेवावा. नंतर १ टिस्पून बटर नॉनस्टिक भांड्यात गरम करावे त्यावर बासमती तांदूळ २ ते ३ मिनीटे परतावा. नंतर दिड ते पाउणेदोन कप पाणी घालावे. थोडे मिठ घालावे. मिडीयम लो फ्लेमवरती झाकण न ठेवता भात शिजवावा. मधेमधे ढवळावा. भात शिजला कि एका ताटात किंवा परातीत तो मोकळा करावा. थोडे बटर शिजलेल्या भाताला लावून घ्यावे. वरून बटर घातल्याने भाताला छान तकाकी येते. हे करताना भाताची शिते मोडणार नाहीत याची काळजी घ्यावी.
२) नंतर नॉनस्टिक तवा मध्यम आचेवर गरम करावा. त्यात २ टिस्पून बटर घालावे. लगेच जिरे घालावे. जिरे तडतडले कि लसूण पेस्ट आणि लाल तिखट घालावे. ३० सेकंद परतावे.
३) कांदा घालून थोडे परतावे. कांदा थोडा शिजला कि भोपळी मिरची आणि गाजर घालावे. साधारण २ ते ३ मिनीटे परतावे. भाज्या अगदी पूर्ण शिजवू नयेत.
४) नंतर फ्लॉवरचे तुरे, टॉमेटो घालून १-२ मिनीटे परतावे. नंतर मटार, बटाटा आणि पावभाजी मसाला घालावा. चवीनुसार मिठ घालावे. पावभाजीला करतो तशा या भाज्या आपण मॅश करणार नाही आहोत कारण पुलावमध्ये भाज्या दिसल्या पाहिजेत.
५) हि भाजी तयार झाली कि ती तव्याच्या एका कडेला करून घ्यावी. तव्याच्या रिकाम्या भागात १/२ टिस्पून बटर घालावे त्यात खडामसाला घालावा. १० - १५ सेकंद परतून भाजी त्यात मिक्स करावी. जर आपण खडा मसाला आधीच फोडणीत घातला असता तर त्याचा स्वाद गरजेपेक्षा जास्त उतरला असता. म्हणून भाजी झाल्यावर शेवटी खडा मसाल्याची फोडणी करून भाजीत मिक्स करावी.
६) भाजी झाली कि गॅस मिडीयम हायवर ठेवावा. या भाजीत तयार भात घालावा. भाताचे ४ भाग करून एकेक भाग भाजीत घालावा म्हणजे सर्व भाताला भाजी लागेल आणि निट मिक्स होईल. तव्यावर हा भात छान परतून रायत्याबरोबर गरम गरम सर्व्ह करावा.

Labels: tawa Pulao, Mumbai Tawa Pulav, Pulav recipe, Tawa recipe, pavbhaji pulav, spicy pulao recipe

फोडणी भात - Phodni Bhat

Phodani Bhat (English Version)

बरेचवेळा भात उरला कि आपण त्याचा फोडणीभात बनवतो. एखादा पदार्थ नेहमीच्या पद्धतीने न बनवता थोड्या वेगळ्या पद्धतीने बनवली तर खायलासुद्धा मजा येते. खाली दिलेली कृती फोडणीभाताचीच आहे पण थोडी वेगळी आणि सर्वांनाच आवडेल अशी आहे.


साहित्य:
२-३ वाट्या मोकळा भात
१/२ वाटी गाजराचे तुकडे
१ वाटी मटार
१ लहान भोपळी मिरची उभी चिरून
१/४ वाटी फरसबी
३-४ लाल सुक्या मिरच्या
३-४ चमचे तेल
१/२ लहान चमचा हिंग,१ लहान चमचा जिरे
कढीपत्ता
२ चमचे लिंबाचा रस
थोडी चिरलेली कोथिंबीर
मीठ

कृती:
१) आदल्या दिवशीचा भात असेल तर तो मोकळा करून घ्यावा.
२) सर्व भाज्या बारीक चिरून घ्याव्यात. कढईत / नॉनस्टीक फ्राईंग पॅनमध्ये तेल गरम करावे. हिंग जिरे कढीपत्ता घालून फोडणी करावी. लाल मिरच्यांमधल्या बिया नको असतील तर मिरच्या तोडून त्यातील बिया काढाव्यात. मिरच्या फोडणीत घालाव्यात.
३) फोडणीत आधी मटार आणि फरसबी थोडी परतून २ मिनीटे वाफ काढावी. नंतर भोपळी मिरची आणि गाजराचे बारीक तुकडे घालून वाफ काढावी. भाज्या अर्धवटच शिजवाव्यात, खुप शिजू देवू नयेत. भाज्या शिजताना थोडे मिठ घालावे.
४) नंतर त्यात मोकळा भात घालावा. थोडा परतून वाफ काढावी. लिंबाचा रस घालावा भाज्या शिजताना थोडे मिठ घातलेलेच आहे त्यामुळे आवश्यक असल्यासच मिठ घालावे. कोथिंबीर घालावी
हा भात गरम गरम खायला छान लागतो.

टीप:
१) बर्याचजणांना फोडणी भातात लसणीची चव आवडते तेव्हा फोडणी करताना त्यात १-२ लसूण पाकळ्या ठेचून घालाव्यात.
२) आवडीनुसार भाज्या घालू शकतो.
३) या भाताच्या फोडणीत थोडे आले ठेचून घातले तरी छान चव येते.

Labels:
Leftover rice recipe, healthy rice recipe, rice and vegetables, fried rice and veggies, Fried Rice, Leftover Rice, Fried Leftover Rice, Phodanicha bhat, phodni bhat

कोबीभात - Kobibhat

Cabbage Rice in English

३ जणांसाठी
वेळ: ३० मिनीटे

साहित्य:
१ वाटी तांदूळ
२ वाट्या लांबट आणि पातळ चिरलेली कोबी
फोडणीसाठी: २-३ चमचे तेल, जिरे, हिंग, कढीपत्ता, २ मिरच्या, १/२ लहान चमचा दालचिनी पावडर
१ चिमूट मोहोरी पावडर
मिठ
अडीच वाट्या गरम पाणी

कृती:
१) तांदूळ धुवून त्यातील पाणी काढून घ्यावे. तांदूळ निथळत ठेवावे. पातेल्यात २ चमचे तेल गरम करावे. त्यात जिरे, हिंग, कढीपत्ता, २ चिरलेल्या मिरच्या आणि दालचिनी पावडर फोडणीत घालावे.
२) फोडणीत चिरलेली कोबी घालून परतावी. १ वाफ काढून त्यात धुतलेले तांदूळ घालावे. मध्यम आचेवर चांगले परतून घ्यावे. त्यात अडीच वाट्या गरम पाणी घालावे.
३) १ उकळी आल्यावर त्यात १ चिमूटभर मोहोरी पावडर घालावी. चवीपुरते मिठ घालावे. मध्यम आचेवर भात शिजेस्तोवर वाफ काढावी.
हा भात टोमॅटो सूप आणि पापडाबरोबर गरम गरम खायला छान लागतो.

Labels:
Cabbage Rice, Indian Rice Recipe, Pulao Recipe, Spiced Rice Recipe

वेजिटेबल फ्राईड राईस - Vegetable Fried Rice

Veg Fried Rice In English

वाढणी: २ ते ३ जणांसाठी
लागणारा वेळ: भाज्या चिरण्यास २० मिनीटे + भात तयार करायला २० मिनीटे



साहित्य:
१ कप तांदूळ (बासमती)
४ कप वेजिटेबल स्टॉक
१ कप बारीक चिरलेली कोबी
पाउण कप पातळ कापलेली भोपळी मिरची
पाउण कप बारीक चिरलेला पाती कांदा + गार्निशिंगसाठी
अर्धा कप अगदी पातळ चिरलेले गाजर
१/४ कप बारीक चिरलेली फरसबी
दिड टिस्पून लसूण पेस्ट
१ टिस्पून आले पेस्ट
२ बारीक चिरलेल्या मिरच्या
२ टेस्पून सोयासॉस
१ टेस्पून व्हिनेगर
२ टिस्पून तेल
मीठ

कृती:
१) प्रथम वेजिटेबल स्टॉक बनवून घ्यावा.
२) ३ कप वेजिटेबल स्टॉकमध्ये १ कप तांदूळ घालून भात बाहेर शिजवून घ्यावा. शिजवताना थोडे मिठ घाला.(क्युबपासून बनवलेल्या स्टॉकमध्ये मीठ असते त्यामुळे चव बघुनच मीठ घालावे). भात पूर्ण न शिजवता किंचीत कच्चा ठेवावा. नंतर चाळणीत अलगदपणे निथळून ठेवावा. पाचएक मिनीटांनी एखाद्या ताटात किंवा परातीत मोकळा करून ठेवावा. हलक्या हाताने थोडे तेल लावावे. (टीप १)
३) कढईत २ चमचे तेल गरम करावे. गॅस हायवर ठेवावा. त्यात मिरची, आले-लसूण पेस्ट घालून फ्राय करावे. मिश्रण भातात घालावे.
४) तेल न घालता प्रत्येक चिरलेली भाजी (except पातीकांदा)अर्धा-अर्धा मिनीट गॅस मोठा ठेवूनच फ्राय करून घ्यावी. यातील भोपळी मिरची परतताना १ टेस्पून सोयासॉस आणि किंचीत मिठ घालावे. १/२ टेस्पून सोयासॉस घालून कोबी परतावी आणि १/२ टेस्पून सोयासॉस घालून गाजर परतावे. यामुळे भाज्यांना सोयासॉसचा फ्लेवर येतो आणि भातामध्ये सोयासॉस व्यवस्थित सर्वठिकाणी लागतो. इतर सर्व भाज्या नुसत्याच परताव्या. सर्वात शेवटी १०-१५ सेकंद पाती कांदा फ्राय करावा. सर्व भाज्या आणि भात एकत्र करावे.
कढईत हाय गॅसवर भात (भाज्या आणि आलेलसूण पेस्ट सहित), व्हिनेगर आणि लागल्यास मिठ घालावे. भात छानपैकी फ्राय करावा. भाताची चव बघून वाटल्यास भात परतताना १/२ टिस्पून सोयासॉस घालावा.

टीप:
१) जर फ्राईड राईस संध्याकाळी बनवायचा असेल तर शक्यतो भात सकाळीच वरीलप्रमाणे बनवून ठेवावा. भात शिजवून हवेवरती गार झाल्यावर ताटामध्येच ठेवावा व त्यावर अजून एक ताट ठेवून फ्रिजमध्ये ३-४ तास गार करावा. यामुळे भाताची शिते मोकळी राहतात आणि भात छान फडफडीत बनतो.
२) बर्‍याचवेळा सोयासॉसमध्ये मिठाचे प्रमाण जास्त असल्याने भाताची चव खारट होवू शकते. म्हणून शेवटी मिठ घालताना आधी भाताची चव पाहावी, गरज वाटल्यासच मिठ घालावे.

वेज मंचुरीयन बरोबर हा भात मस्त लागतो.


Labels:
Vegetable Fried Rice, Indo chinese food, spicy fried rice, chinese food, chinese recipe, vegetable fried rice recipe, veg fried rice recipe

टॅमरिंड राईस - Tamarind Rice

Tamarind Rice


साहित्य:
सव्वा कप वाटी तांदूळ
पाउण कप चिंचेचा कोळ
३-४ भरल्या सांडगी मिरच्या
२ लाल सुक्या मिरच्या
२ टिस्पून लाल तिखट
१ टेस्पून उडीद डाळ
पाव कप शेंगदाणे
फोडणीसाठी: २ चमचे तेल, १/४ टिस्पून मोहोरी, १/४ टिस्पून जिरे,१/४ टिस्पून हिंग, १/२ टिस्पून हळद, ३-४ कढीपत्ता पाने
मीठ

कृती:
१) सर्वप्रथम सव्वा वाटी तांदूळाचा फडफडीत भात शिजवून घ्यावा. भात थंड होवू द्यावा. भात थंड झाला कि त्याला चवीपुरते मिठ आणि लाल तिखट लावून मिक्स करावे.
२) कढईत तेल गरम करावे, मोहोरी, जिरे, हिंग, हळद कढीपत्ता घालावी. लाल मिरच्यांचे तुकडे करून घालाव्या. सांडगी मिरच्या घालून ढवळावे. शेंगदाणे आणि उडीद डाळ घालून परतावे. उडीद डाळ गोल्डन ब्राउन झाली कि चिंचेचा कोळ घालावा. १५-२० सेकंदाने भात घालून ढवळावे. २ मिनीटे वाफ काढावी.

Labels:
Tamarind Rice, South Indian Rice, Indian Spicy Rice, Tamarind Rice recipe, Chinchecha bhat, Imali Rice, Imli Rice

मसाले भात - Masalebhat

Masale Bhat in English

वाढणी: २ जणांसाठी

साहित्य:

पाउण कप बासमती/ साधा तांदूळ

वाटण : २ टिस्पून धणे, २ टिस्पून जिरे, १/२ कप कोथिंबीर, ३-४ मिरी, ४-५ लाल सुक्या मिरच्या हे सर्व मिक्सरवर वाटून घ्यावे.

६-७ काजू बी

दिड टिस्पून गोडा मसाला (काळा मसाला)

१ टिस्पून साखर

१ टिस्पून गूळ

चवीपुरते मीठ

२ टिस्पून तेल

१/४ टिस्पून मोहोरी

१/४ टिस्पून हळद
तांदूळाच्या अडीचपट पाणी

कृती:

१) तांदूळ धुवून १० मिनीटे निथळत ठेवणे.

२) नॉनस्टीक फ्राईंग पॅनमध्ये २ चमचे तेल गरम करून मोहोरी, हळद, काजू घालून तांदूळ परतून घ्यावे. तांदूळ परतताना दुसर्या गॅसवर २ कप पाणी गरम करत ठेवावे.

३) तांदूळ चांगले परतले गेल्यावर त्यात गरम केलेले पाणी घालावे. बारीक गॅसवर उकळी काढावी.

४) उकळी आल्यावर तयार केलेले वाटण, गोडा मसाला, चवीपुरते मीठ, साखर, गूळ घालावा. भांड्यावर झाकण ठेवून मंद गॅसवर वाफ काढावी.

५) खाताना भातावर साजूक तूप आणि खवलेला ओला नारळ घ्यावा.

Labels:
Masala Rice, Masale Bhat, Maharashtrian masala Bhat recipe, Indian Spiced Rice recipe