खजुराचे लाडू - Khajurache Ladoo

Dates Laddu in English

वेळ: १५ मिनिटे
१० ते १२ लहान लाडू

साहित्य:
२५ खजूर, बिया काढून (मिक्सरमध्ये भरडसर वाटून १ कप)
१/२ कप बदाम, भरडसर वाटून
१/२ कप किसलेले सुके खोबरे, गुलाबीसर भाजून
१ टेस्पून तूप
१ टीस्पून खसखस

कृती:
१) खजुराच्या बिया काढून खजूर मिक्सरमध्ये भरडसर वाटून घ्यावे. नॉनस्टिक पॅनमध्ये तूप गरम करावे त्यात खसखस घालून काही सेकंद परतावे. त्यात भरडसर वाटलेले बदाम, खोबरे आणि खजूर घालून मंद आचेवर गरम करावे.
२) नीट मिक्स झाले कि थाळीमध्ये काढून ठेवावे. हाताच्या तळव्यांना थोडे तूप लावून मिश्रण कोमटसर असतानाच लाडू बांधावेत.
शक्यतो एक ते दोन घासात संपेल इतपतच लाडूचा आकार असावा. खजूर उष्ण असतात एक लाडू आणि त्यावर ग्लासभर दुध प्यायल्यास शरीराला भरपूर उष्मांक मिळतात.

टीपा:
१) साध्या खजूराप्रमाणेच काळ्या खजूराचेही अशाप्रकारे लाडू करू शकतो.
२) मी फक्त बदामच वापरले होते. आवडीनुसार पिस्ता किंवा काजू असे सर्व मिळून अर्धा कप वापरू शकतो. जर जास्त ड्राय फ्रुट्स वापरायची असतील तर खजूराचे प्रमाणही वाढवावे. नाहीतर लाडू नीट बांधले जात नाहीत.
३) तुपाचे प्रमाण आवश्यकतेनुसार वाढवावे.
४) मी बदामाच्या रेडीमेड काप मिळतात ते वापरले होते. ते शक्यतो वापरू नयेत कारण लाडू बांधायला थोडे त्रासदायक पडते.
५) खजूराला ओलसरपणा असावा. कोरडे खडखडीत खजूर लाडवांसाठी चांगले लागत नाहीत.

फोडणीचा पाव - phodanicha paav

Bread chi Usal in English

वेळ: १० मिनिटे
वाढणी: २ जणांसाठी

साहित्य:
१० ब्रेडचे स्लाईसेस
२ टेस्पून तेल
फोडणीसाठी: २ चिमटी मोहोरी, १ चिमटी हिंग, १/८ टीस्पून हळद, ४-५ कढीपत्ता पाने
२ हिरव्या मिरच्या, उभ्या चिरून (किंवा २ सुक्या लाल मिरच्या मोडून)
१/४ कप कांदा, बारीक चिरून
चवीपुरते मीठ आणि साखर
कोथिंबीर सजावटीसाठी
१ टीस्पून लिंबाचा रस

कृती:
१) ब्रेडच्या स्लाईसेसचे छोटे चौकोनी तुकडे करून घ्यावे. किंवा हातानेच तुकडे करावे.
२) कढईत तेल गरम करून मोहोरी, हिंग, हळद, आणि कढीपत्ता घालून फोडणी करावी. हिरव्या मिरच्या आणि कांदा घालून परतावा.
३) कांदा परतताना मीठ घालावे आणि कांदा पारदर्शक होईस्तोवर परतावा.
४) ब्रेडचे तुकडे घालून २ चिमटी साखर पेरावी.
५) झाकण ठेवून मिडीयम आचेवर २-३ मिनिटे वाफ काढावी.
लिंबाचा रस आणि कोथिंबीर घालून गरमच सर्व्ह करावे.

टीपा:
१) ब्रेड मिक्सरमध्ये बारीक करून घेतला तरीही चालतो.

मसाला टोस्ट सॅंडविच - Potato Masala Sandwich

Masala Toast Sandwich in English

वेळ: पूर्वतयारी- १५ मिनिटे | पाकृ साठी वेळ- १० मिनिटे
४ सॅंडविचेस

साहित्य:
८ ब्रेडचे स्लाईस
२ ते ३ टेस्पून बटर, रूम टेम्परेचर
१/४ कप हिरवी चटणी
कांद्याचे पातळ गोल चकत्या
मसाला:
२ मोठे बटाटे, उकडलेले
३ टेस्पून हिरवे मटार (फ्रोझन)
१/४ कप बारीक चिरलेला कांदा
२ टीस्पून हिरवी मिरची पेस्ट
फोडणीसाठी: १ टीस्पून तेल, चिमूटभर मोहोरी (ऐच्छिक), चिमूटभर हिंग, १/४ टीस्पून हळद
४ ते ५ कढीपत्ता पाने, बारीक चिरून
दीड टीस्पून आलेलसूण पेस्ट
चवीपुरते मीठ

कृती:
मसाला
१) बटाटे सोलून मॅश करून घ्यावेत. कढईत तेल गरम करून मोहोरी, हिंग, हळद आणि कढीपत्ता घालून फोडणी करावी.
२) हिरवी मिरची पेस्ट आणि आलेलसूण पेस्ट घालून १५ सेकंद परतावे. कांदा घालून परतावे आणि झाकण ठेवून मिनिटभर शिजू द्यावे. नंतर मटार घालून झाकण ठेवून मटार शिजू द्यावे.
३) मॅश केलेले बटाटे घालावे. मिक्स करावे आणि झाकण ठेवून २-३ मिनिटे वाफ काढावी.

४) ब्रेड स्लाईसच्या एका बाजूला बटर लावावे. बटर लावलेल्या ८ पैकी ४ स्लाईस घेवून त्याला चटणी लावावी.
५) चटणी लावलेल्या ब्रेडवर तयार मसाल्याचा पातळ लेयर लावून घ्यावा. त्यावर कांद्याची एक चकती ठेवावी. वरती बटर लावलेला ब्रेड स्लाईस ठेवून किंचित प्रेस करावे.
६) बाहेरून थोडेसे बटर लावून सॅंडविच टोस्टरमध्ये सॅंडविच टोस्ट करून घ्यावे. जर टोस्टर नसेल तर सॅंडविच तव्यावर भाजावे. भाजताना किंचित दाब देउन दोन्ही बाजू लाईट ब्राऊन होईस्तोवर भाजावे.

गरम सॅंडविच हिरवी चटणी आणि टोमॅटो केचपबरोबर सर्व्ह करावे.

टीपा:
१) शक्यतो व्हाइट ब्रेड वापरावा.
२) मसाला तिखटसरच असावा. कमी तिखट मसाला असेल तर सॅंडविच मुळमुळीत लागतं.
३) मसाला बनवताना कमीतकमी तेल वापरावे. मसाला तेलकट झाला तर सॅंडविच चांगले लागत नाही.
४) जर लहान मुलांसाठी बनवायचे असल्यास मिरची अगदी कमी घालावी किंवा घालू नये.
५) चटणीमध्ये पुदिना पानेही घालू शकतो.

गवार भोपळ्याची भाजी - Gawar Bhopla Bhaji

Cluster Beans with Pumpkin in English

श्राद्धपक्षात गवार आणि भोपळ्याची भाजी करायची पद्धत आहे.

वेळ: पूर्वतयारी १५ मिनीटे । पाकृसाठी १५ मिनीटे
वाढणी: २ ते ३ जणांसाठी
साहित्य:
पाव किलो गवार
फोडणीसाठी:- १ टेस्पून तेल, १०-१२ मेथी दाणे, २ चिमटी मोहोरी, १ चिमटी जिरे, २ चिमटी हिंग, १/४ टिस्पून हळद, १/४ टिस्पून लाल तिखट
१ वाटी लाल भोपळ्याच्या फोडी (टीप १ व २)
२ टेस्पून ताजा नारळ
१ टेस्पून दाण्याचा कूट
२ टिस्पून गूळ किंवा चवीपुरता
१/२ टिस्पून गोडा मसाला
चवीपुरते मिठ

कृती:
१) गवार स्वच्छ धुवून घ्यावी. प्रत्येक गवारीची दोन्ही बाजूची देठं मोडावीत आणि शिर असेल तर काढून टाकावी. गवारीचे १/२ ते १ इंचाचे तुकडे मोडून घ्यावेत.
२) गवार कूकरमध्ये २ शिट्ट्या करून वाफवून घ्यावी. वाफवताना गवारीमध्ये पाणी घालू नये. (वाफवण्यासाठी कूकरच्या तळाशी १ इंच पाणी असावे. गवार कूकरच्या आतील डब्यात ठेवावी व या डब्यात पाणी घालू नये.)
३) कढईत तेल गरम करावे. मेथीदाणे घालून थोडे लालसर होवू द्यावे. मग मोहोरी, जिरे, हिंग, हळद घालून फोडणी करावी. प्रथम भोपळ्याच्या फोडी फोडणीस टाकाव्यात. २-३ वाफा काढून भोपळा शिजू द्यावा. भोपळा ६० % शिजला कि वाफवलेली गवार घालावी. निट मिक्स करावे.
४) लाल तिखट, गोडा मसाला, नारळ, दाण्याचा कूट आणि थोडे मिठ घालावे. मध्यम आचेवर १-२ वाफा काढाव्यात. नंतर गूळ घालून १ वाफ काढावी.

टीप:
१) गवारीची भाजी इतरवेळी करताना शिजवलेला बटाटाही वापरू शकतो. फक्त बटाटा शिजवून थोडावेळ फ्रिजमध्ये ठेवावा. गवार आणि बटाटा एकत्रच फोडणीस घालावे, बटाटा शिजलेला असल्या कारणाने अजून शिजवायची गरज नाही.
२) बटाट्याऐवजी काळे वाटाणे गवारीच्या भाजीत अधिक छान लागतात. जर काळे वाटाणे वापरायचे असतील तर ७-८ तास वाटाणे पाण्यात भिजत ठेवावेत व कूकरमध्ये शिजवून घ्यावेत.
३) हि भाजी थेट कूकरमध्येही फोडणीस टाकू शकतो, म्हणजे गवार वेगळी शिजवायची गरज नाही. लहान कूकरमध्ये फोडणी करून घ्यावी. त्यात मोडलेली गवार, बटाटा/ भिजवलेले काळे वाटाणे फोडणीस टाकावे. इतर साहित्यही घालावे व थोडे पाणी घालावे. २ ते ३ शिट्ट्या होवू द्याव्यात. वाफ मुरली कि कूकर उघडून वाटल्यास १ उकळी काढावी.

घावन घाटले - Ghavan Ghatle

Ghavan Ghatle in English



चकलीच्या सर्व वाचकांना गणेश चतुर्थीच्या हार्दिक शुभेच्छा!!

गणपतीला नैवेद्य दाखवण्यासाठी खास रेसिपीज - इथे क्लिक करा



काही दिवसातच गौरींचे आगमन होईल. इतर गोड पदार्थांबरोबरच घावन आणि घाटले हा पारंपारिक पदार्थ गौरींना नैवेद्य म्हणून दाखवायची प्रथा आहे. त्याची कृती पुढील प्रमाणे. नक्की करून पहा!!



घावनाचे साहित्य आणि कृती



वेळ: पूर्वतयारी- ५ मिनिटे | पाकृसाठी - २५ मिनिटे

वाढणी: ८ ते ९ मध्यम घावने

साहित्य:

१ कप तांदुळाची पिठी

२ कप दुध / पाणी

चिमूटभर मीठ

घावन बनवण्यासाठी तूप



कृती:

१) तांदुळाचे पीठ, दुध, आणि मीठ एका वाडग्यात मिक्स करावे. गुठळ्या राहणार नाहीत याची काळजी घ्यावी.

२) नॉनस्टिक तवा मिडीयम फ्लेमवर गरम करावा. तवा गरम झाला कि थोडे तूप घालावे. आणि त्यावर डावभर मिश्रण घालून पसरावे. झाकण ठेवून एक बाजू किमान २ ते ३ मिनिटे शिजू द्यावी. बाजू पालटून झाकण ठेवून दुसरी बाजू शिजवावी. जर असे वाटले कि पूर्ण शिजले नाहीये तर अजून थोडावेळ झाकण ठेवून शिजवावे.

तयार घावन घाटल्याबरोबर सर्व्ह करावे.



टीप:

१) गोड घावन आवडत असल्यास मिश्रणात थोडा गुळ घालावा.



==================================



घाटल्याचे साहित्य आणि कृती:



वेळ: १० मिनिटे

दीड कप (साधारण ३ जणांसाठी)



साहित्य:

दीड कप नारळाचे घट्ट दुध

१ टेस्पून तांदूळ पीठ

२ ते ३ चिमटी वेलची पूड

गूळ, गरजेनुसार (मी २ टेस्पून गुळ वापरला होता)



कृती:

१) सर्व साहित्य एकत्र करा. तांदूळ पिठाच्या गुठळ्या राहणार नाहीत याची दक्षता घ्या.

२) तयार मिश्रण लहान पातेल्यात घ्या. मंद आचेवर ढवळून शिजवा. मिश्रण दाटसर झाले कि गॅस बंद करा.

तयार घाटले गरम घावानाबरोबर सर्व्ह करा.



टीप:

१) घाटल्यामध्ये काजू पिस्त्याचे काप घातले तरीही चालतील.

२) गुळाचे प्रमाण गरजेनुसार कमी-जास्त करावे.

मसूराची आमटी - Masoor Amti

Masoor Amti in English



वेळ: १५ ते २० मिनिटे

वाढणी: ४ जणांसाठी



साहित्य:

१/२ कप मसूर (टीप १)

फोडणीसाठी: १ टेस्पून तेल, २ चिमटी मोहोरी, २ चिमटी जिरे, १/८ टीस्पून हिंग, १/४ टीस्पून हळद, १/२ टीस्पून लाल तिखट, ५ ते ६ कढीपत्ता पाने

४ ते ५ लसणीच्या मोठ्या पाकळ्या, जाडसर चिरून

२ टेस्पून ओला नारळ

१ टीस्पून गोड मसाला

३ कोकमचे तुकडे

२ टीस्पून गूळ किंवा चवीनुसार

१/४ कप बारीक चिरलेली कोथिंबीर



कृती:

१) मसूर रात्रभर पाण्यात भिजत ठेवावे. नंतर पाणी काढून टाकावे. १/४ चमचा मीठ घालून प्रेशर कुकरमध्ये २ शिट्ट्या करून, पाणी न घालता शिजवून घ्यावे. वाफ जीरली कि मसूर बाहेर काढावेत आणि डावेने थोडेसे चेचून घ्यावे. आणि १ कप पाणी घालावे.

२) कढईमध्ये तेल गरम करावे. लसूण घालावी आणि कडा ब्राऊन होईतोवर परतावी (जळू देऊ नयेत). लसूण नीट परतली गेली नाही तर आमटीला लसणीचा कच्चट वास राहतो.

३) मोहोरी, जिरे, हिंग, हळद, लाल तिखट आणि कढीपत्ता घालून फोडणी करावी.

४) नारळ घालून काही सेकंद परतावे. आता मसूर घालून ढवळावे. लागल्यास पाणी घालावे. कोकम आणि गोडा मसाला घालावा. आमटीला उकळी काढावी. गूळ आणि मीठ घालून ३ ते ४ मिनिटे मध्यम आचेवर उकळी काढावी.

५) चव पाहून लागेल तो जिन्नस वाढवावा. कोथिंबीर घालून तूप भाताबरोबर आमटी सर्व्ह करावी.



टीप:

१) मसुराला मोडसुद्धा काढू शकतो. मोड काढण्यासाठी मसूर रात्रभर पाण्यात भिजवून ठेवावेत. पाणी निथळून घ्यावे. नंतर सुती कपड्यात घट्ट बांधून उबदार ठिकाणी किमान ८ तास तरी ठेवावेत. मोड आल्यावर वरील पद्धतीनेच आमटी करावी.

अळूचं फदफदं - Aluchi Patal Bhaji

Aluchi Patal Bhaji in English



वेळ: २५ मिनिटे

वाढणी: ७ ते ८ मध्यम वाट्या (३ ते ४ जणांसाठी)



साहित्य:

७ ते ८ अळूची मध्यम पाने

३ ते ४ टेस्पून शेंगदाणे

२ ते ३ टेस्पून चणा डाळ

फोडणीसाठी: १ टेस्पून तेल, २ चिमटी मोहोरी, १/८ टीस्पून हिंग, १/४ टीस्पून हळद, १/४ टीस्पून लाल तिखट

३ टेस्पून बेसन

१ टीस्पून चिंच

२ टीस्पून गोडा मसाला

२ टीस्पून गूळ

चवीपुरते मीठ



कृती:

१) शेंगदाणे आणि चणा डाळ किमान २ तास पाण्यात भिजत घालावी. नंतर प्रेशर कुकरमध्ये १ किंवा २ शिट्ट्या करून शिजवून घ्यावे.

२) चिंच १/२ कप पाण्यात १० मिनिटे भिजत ठेवावी. नंतर चिंच कुस्करून कोळ काढून घ्यावा.

३) अळूची पाने धुवून पुसून घ्यावी. देठं वेगळी काढावीत आणि सोलून घ्यावीत. नंतर पानं बारीक चिरून घ्यावी. देठंही चिरून घ्यावीत.

४) कढईत तेल गरम करून मोहोरी, हिंग, हळद, तिखट घालून फोडणी करून घ्यावी. यात चिरलेली अळूची पाने आणि देठं घालावीत. १/२ टीस्पून मीठही घालावे. झाकण ठेवून ६ ते ७ मिनिटे शिजवावे. अळू जर कोरडा वाटत असेल तर थोडे पाणी शिंपडावे.

५) चिंचेचा कोळ घालून अजून ३-४ मिनिटे शिजू द्यावे. १/२ कप पाण्यात २ टेस्पून बेसन गुठळी न होता मिक्स करून घ्यावे.हे मिश्रण कढईत घालून ढवळावे.

६) यात शिजवलेली चणा डाळ आणि शेंगदाणे घालावे. गरजेनुसार थोडे पाणी घालावे. (भाजी पळीवाढी करावी, प्रचंड घट्टही नको आणि पातळही नको.)

७) गोडा मसाला, गूळ, आणि लागल्यास मीठ घालून मिक्स करावे. बेसन शिजेस्तोवर उकळी काढावी.

गरमागरम तूप भाताबरोबर किंवा भाकरीबरोबर सर्व्ह करावे.



टीपा:

१) अळूची पाने फोडणीला टाकून मग शिजवण्याऐवजी आधी प्रेशर कुकरमध्ये शिजवली तरीही चालतात. चिरलेली पाने शिजवून मग फोडणीस टाकावी.

२) पारंपारिक पद्धतीनुसार या भाजीत आंबट चुका आणि मुळा घालतात. आवडत असल्यास १/४ ते १/२ कप बारीक चिरलेला आंबट चुका अळूबरोबरच फोडणीला टाकावा. याला चव फार आंबट असते त्यामुळे जर आंबट चुका वापरणार असाल तर चिंच घालू नये. आणि घातल्यास आधी चव पाहून मगच घालावी. तसेच १/२ मुळा बारीक चिरून फोडणीस घालावा.

३) ओल्या नारळाच्या पातळ चकत्या शेंगादाण्याबरोबर घालाव्यात.

४) तिखट मीठ गुळ चिंच आणि गोड मसाला आवडीप्रमाणे कमी किंवा जास्त करावा. पण या भाजीला मसाले आणि आंबट गोडपणा थोडा पुढे असल्यास भाजी लज्जतदार लागते.

वांगी बटाटा काचऱ्या - Vangi Batata Kacharya

Aloo Baingan Stir Fry in English

वेळ: २० मिनिटे
वाढणी: ३ जणांसाठी

साहित्य:
८ ते १० लहान वांगी (टीप १)
२ मध्यम बटाटे
१/२ कप बारीक चिरलेला कांदा
फोडणीसाठी: २ टेस्पून तेल, चिमूटभर मोहोरी, १/८ टीस्पून हिंग, १/४ टीस्पून हळद, १/२ टीस्पून लाल तिखट
४ ते ५ कढीपत्ता पाने
२ टेस्पून शेंगदाण्याचा कूट
२ टेस्पून ताजा खोवलेला नारळ
चवीपुरते मीठ
१/२ टीस्पून साखर किंवा चवीनुसार

कृती:
१) वांगी धुवून घ्यावीत आणि देठं कापून टाकावीत. प्रत्येक वांग्याच्या उभ्या चार फोडी कराव्यात. आणि चतकोर आकाराच्या काचऱ्या कराव्यात. गार पाण्यात बुडवून ठेवाव्यात.
२) बटाटे सोलून उभे चार भाग करून पातळ काचऱ्या कराव्यात.
३) कढईत तेल गरम करावे. मोहोरी, हिंग, हळद, लाल तिखट आणि कढीपत्ता घालून फोडणी करावी. कांदा आणि बटाटा घालावा. थोडे मीठ घालावे. झाकण ठेवून बटाटे ५०% शिजवावे.
४) वांग्यातील पाणी पूर्णपणे काढून टाकावे. वांग्याच्या काचऱ्या कढईत घालाव्यात. झाकण न ठेवता वांगी परतत राहावी. वांगी पटकन शिजतात, म्हणून कढईवर झाकण ठेवू नये.
५) वांगी शिजली कि चव पाहून लागल्यास मीठ घालावे. आता शेंगदाण्याचा कूट, साखर, आणि नारळ घालून मिक्स करावे. एक दोन मिनिटे भाजी परतावी आणि गरमच पोळीबरोबर किंवा आमटी भाताबरोबर वाढावी.

टीपा:
१) मोठे वांगेसुद्धा वापरता येईल. तेव्हा वांगं-बटाट्याचे प्रमाण १ कप वांग्याच्या काचऱ्यांना ३/४ कप बटाट्याच्या काचऱ्या असे असावे.
२) आंबटपणासाठी १ टीस्पून लिंबाचा रस भाजी तयार झाल्यावर शेवटी घालावा.

दुधी भोपळ्याचे थालीपीठ - Dudhi Thalipeeth

Lauki Thalipeeth in English

वेळ: ३० मिनिटे
वाढणी: ३ ते ४ मध्यम थालीपीठे

साहित्य:
१ कप सोलून किसलेला दुधी भोपळा
दीड ते दोन कप उपवासाची भाजणी किंवा गरजेनुसार
३ हिरव्या मिरच्या, ठेचून
१/४ चूप बारीक चिरलेली कोथिंबीर
१/४ कप भाजलेल्या शेंगदाण्याचा कूट
चवीनुसार मीठ
तूप किंवा शेंगदाण्याचे तेल थालीपीठ भाजताना

कृती:
१) किसलेल्या दुधीमध्ये हिरवी मिरची, मीठ, शेंगदाण्याचा कूट, आणि कोथिंबीर घालून मिक्स करावे. गरजेनुसार भाजणी घालून कणकेला भिजवतो तेवढे घट्ट भिजवून घ्यावे. भिजवलेल्या पिठाचे टेनिसच्या बॉलएवढे गोळे करून घ्यावे.
२) नॉनस्टिक तव्याला तूप लावून घ्यावे. हाताला चिकटू नये म्हणून हातालाही थोडेसे तूप लावावे. हाताने एकसारखे थालीपिठ थापावे. मध्याभागी तेल सोडायला बोटाने छिद्रं करावे.
३) मिडीयम आणि हायच्या मध्ये गॅस अडजस्ट करावा. झाकण ठेवून थालीपीठ शिजू द्यावे. मिनिटभराने झाकण काढून कडेने तूप सोडावे. झाकून एक बाजू नीट शिजू द्यावी. कालथ्याने उलथून, झाकण ठेवून दुसरी बाजूही शिजवावी.
गरमगरम थालीपीठ वाढताना दही आणि लिंबाचे गोड लोणचे बरोबर खायला द्यावे.

टीप:
१) दुधी बिनबियांचा आणि कोवळा असावा, म्हणजे किसायला सोपा जातो.
२) थालीपिठ शिजायला वेळ लागतो. जास्त थालीपीठं बनवताना वेळ वाचवण्यासाठी दोन शेगड्यावर दोन तवे वापरून थालीपीठं बनवावी.
३) काहीजण दुधी भोपळा उपवासाला खात नाहीत. म्हणून दुधीऐवजी काकडी किसून घालावी.

भरली कारली - Bharli Karli

Stuffed Karela in English

वाढणी: २ ते ४ जणांसाठी
वेळ: २५ मिनिटे


साहित्य:
४ कोवळी कारली
तळण्यासाठी तेल
::सारण::
२ टेस्पून भाजलेले तिळ
२ टेस्पून भाजलेले बेसन (१ टेस्पून तेलावर भाजावे)
२ टेस्पून भाजलेले खोबरे
१ टिस्पून धणेपूड
१ टिस्पून जिरेपूड
१/२ टिस्पून आमचूर
१/२ टिस्पून लाल तिखट
१/४ टिस्पून हिंग
१/४ टिस्पून हळद
१ टिस्पून बडिशेप
१ टिस्पून साखर
१ टिस्पून खसखस (ऐच्छिक)
चवीनुसार मिठ

कृती:
१) कारली धुवून घ्यावी. कारल्याची खरखरीत पाठ हलकेच किसणीने किसून प्लेन करून घ्यावी. प्रत्येक कारल्याला उभा छेद करून घ्यावा आणि बिया काढून साफ करावे. आतल्या बाजूने मिठ चोळून ठेवावे.
२) तिळ खोबरं एकत्र कुटून घ्यावे. त्यात धणेजिरेपूड, आमचूर, तिखट, साखर, भाजून कुटलेली खसखस, तेलावर भाजलेले बेसन आणि अगदी थोडे मिठ घालून मिक्स करावे (कारल्याला चोळलेले मिठ लक्षात ठेवावे)
३) मिश्रण कारल्यात भरून कारल्याला गच्च दोरा बांधावा आणि कारली कुरकूरीत तळावी.
वाढण्यापूर्वी दोरा काढून टाकावा. भरली कारली आमटी भाताबरोबर छान लागते. पोळीबरोबर खायचे झाल्यास बरोबर आमटी किवा तत्सम पातळ पदार्थ घ्यावा.

टीप:
१) कारली लहान पॅनमध्ये थोडे जास्त तेल घालून शालो फ्राय करता येतात. जास्त तेलाची फोडणी करून त्यात कारली परतून झाकावी. १० मिनीटे अधून मधून बाजू बदलावी आणि चमच्याने जरा प्रेस करत राहावे म्हणजे निट शिजले जाईल.
२) शक्यतो लहान व कोवळी कारली वापरावीत. लहान कारली लवकर शिजतात आणि वाढायला सोपी जातात. साधारण एक कारले एका व्यक्तीसाठी पुरेसे होते.

मटकीची उसळ - Matkichi usal

Matkichi Usal in English

वेळ: १/२ तास (मटकी भिजवून मोड आणणे वगळून)
वाढणी: ३ ते ४ जणांसाठी

साहित्य:
१/२ कप मटकी
फोडणीसाठी: २ टेस्पून तेल, २ चिमटी मोहोरी, १/८ टीस्पून हिंग, १/४ टीस्पून हळद, १/२ टीस्पून लाल तिखट
४ ते ५ कढीपत्त्याची पाने
१/२ टीस्पून गोड मसाला (ऐच्छिक)
२ ते ३ आमसूलं
१ टेस्पून गूळ
चवीपुरते मीठ
२ ते ३ टेस्पून ओला नारळ
२ टेस्पून चिरलेली कोथिंबीर

कृती:
१) मटकी रात्रभर किंवा ८ ते १० तास पाण्यात भिजवून ठेवावी. ८-१० तासानंतर चाळणीवर उपसून निथळत ठेवावी. नंतर बारीक खडे किंवा कडक मटकी निवडून काढून टाकावी.
२) सुती कपडा घेउन त्यात मटकी घट्ट बांधून उबदार ठिकाणी ठेवावे. मोड यायला किमान १० ते १२ तास जातात. आणि थंडीचा मोसम असल्यास अजून जास्त वेळ लागू शकतो. (जर घरी ओवन असेल तर २०० F वर २ मिनिटे गरम करावा आणि बंद करून टाकावा. मटकी बांधलेली पुरचुंडी एका काचेच्या ताटलीत ठेवून मधल्या रॅकवर ठेवून द्यावे. एवढ्या उबेवर छान मोड येतात.)
३) मोड आलेली मटकी पाण्यात घालून लगेच उपसावी. मटकी जरा ओलसर असली कि फोडणीला घालताना करपत नाही.
४) कढईत तेल गरम करून मोहोरी, हिंग, हळद, लाल तिखट, आणि कढीपत्ता फोडणीस घालावा. उपसलेली मटकी घालावी आणि थोडावेळ परतावे. थोडे मीठ घालावे.
५) झाकण ठेवून मटकी शिजू द्यावी. मध्येमध्ये पाण्याचा हबका मारावा किंवा पाण्याचे ताट कढईवर ठेवावे. मटकी कोरडी होवू देवू नये. तसेच खूप पाणी एकाचवेळी घालू नये. यामुळे पाणचट चव लागते.
६) मटकी अर्धवट शिजली कि कोकम आणि गोडा मसाला घालावा. मटकी शिजत आली कि गूळ आणि पाणी घालावे. थोडावेळ उकळी काढून मटकी शिजू द्यावी. ओला नारळ आणि कोथिंबीर घालून मिक्स करावे.
गरम पोळीबरोबर सर्व्ह करावे.

पालकाची भाजी - Palakachi Bhaji

Palakachi Bhaji in English

वेळ: १५ मिनिटे
वाढणी: २ ते ३ जणांसाठी

साहित्य:
३ कप बारीक चिरलेली पालकाची पाने
१ लहान कांदा, बारीक चिरून (साधारण १/४ कप)
१/२ टीस्पून उडीद डाळ (ऐच्छिक)
फोडणीसाठी: १ टीस्पून तेल, चिमूटभर मोहोरी, एक चिमटी जिरे, १/८ टीस्पून हिंग, १/८ टीस्पून हळद
१ हिरवी मिरची, उभी चिरून
चवीपुरते मीठ

कृती:
१) कढईत तेल गरम करावे. उडीद डाळ घालून गुलाबीसर होईस्तोवर थांबावे. नंतर मोहोरी, जिरे, हिंग, हळद आणि शेवटी हिरवी मिरची घालावी. १० सेकंद परतून घ्यावे.
२) चिरलेला कांदा घालून २ ते ३ चिमटी मीठ घालावे. कांदा लालसर होईतोवर परतावा.
३) आता चिरलेला पालक घालून झाकण न ठेवता परतावे. पालक आळेस्तोवर परतावे. पालाकातील बहुतांश पाणी निघून गेले कि चव पहूल लागल्यास मीठ घालावे.
पोळीबरोबर किंवा भाकरीबरोबर हि भाजी गरमच वाढावी.

टीप:
१) उडदाच्या डाळीने चवीमध्ये फरक पडत नाही. फक्त मध्येमध्ये दिसायला छान दिसते. त्यामुळे नको असल्यास घातली नाही तरी चालेल.

केळ्याचे रायते - Kelyache Raite

Banana Raita in English

४ जणांसाठी
वेळ: १० मिनिटे

साहित्य:
२ मध्यम केळी, जरा जास्त पिकलेली
१/२ कप दही, घुसळलेले
१ हिरवी मिरचीची पेस्ट (किंवा चवीनुसार)
१ टेस्पून बारीक चिरलेली कोथिंबीर
१/४ टिस्पून मोहोरी पावडर
१ टिस्पून साखर किंव चवीनुसार
चवीनुसार मिठ

कृती:
१) केळं सोलून घ्यावी आणि त्याचे मध्यम तुकडे करावे
२) दह्यामध्ये १ ते २ चमचे पाणी घालून थोडे घोटून घ्यावे.
३) कोथिंबीर आणि थोडे मिठ एकत्र करून हाताने चुरडून घ्यावे. आणि दह्यात मिक्स करावे
४) दह्यात मोहोरी पावडर, साखर, मिरची पेस्ट, चुरडलेली कोथिंबीर घालून मिक्स करावे. आता चिरलेले केळं घालून मिक्स करावे.
जेवताना तोंडीलावणी म्हणून हे रायते सर्व्ह करता येते.

Kakadicha Kayras

Kakdicha Kayras in Marathi

Time: 10 to 15 minutes
Serves: 3 to 4 persons

Ingredients:
1 cup finely chopped cucumber (peeled)
1 tbsp tamarind pulp
3 to 4 tbsp grated jaggery or to taste
2 tbsp roasted peanuts powder (coarsely ground)
For tempering: 1 tbsp oil, 1/8 tsp cumin seeds, 2 pinches asafoetida, 1/8 tsp turmeric powder, 1/4 tsp red chili powder
2 tbsp finely chopped cilantro
salt to taste

Method:
1) Take tamarind pulp into a medium bowl. Add around 1/2 cup water and mix well. Add salt, jaggery and mix until dissolve. [Taste should be sweet and sour, so do not hesitate to add some more jaggery if you want to.]
2) Add chopped cucumber to tamarind water. We want runny consistency, so add some more water if required. Also, add roasted peanuts.
3) Heat oil into a tadka pan. Add cumin, hing, turmeric powder, red chili powder. Pour this tempering over kayras. Garnish with cilantro.
Cucumber kayras can be served as a side dish.

काकडीचा कायरस - Kakdicha Kayras

Kakdi Kayras in English

वेळ: १० ते १५ मिनिटे
वाढणी: ३ ते ४ जणांसाठी

साहित्य:
१ कप बारीक चिरलेली काकडी (सोलून)
१ टेस्पून चिंचेचा घट्ट कोळ
३ ते ४ टेस्पून किसलेला गूळ किंवा चवीनुसार
२ टेस्पून शेंगदाण्याचा कूट (थोडा भरडसर)
फोडणीसाठी: १ टेस्पून तेल, १/८ टिस्पून जिरे, २ चिमटी हिंग, १/८ टिस्पून हळद, १/४ टिस्पून लाल तिखट
२ टेस्पून बारीक चिरलेली कोथिंबीर
चवीपुरते मिठ

कृती:
१) चिंचेचा कोळ एका मध्यम वाडग्यात घ्यावा. त्यात साधारण १/२ कप पाणी घालून मिक्स करावे. मिठ, गूळ घालून गूळ विरघळेस्तोवर मिक्स करावे. (पाण्याची चव आंबटगोड असली पाहिजे, त्यानुसार चिंच किंवा गूळ आवडीनुसार वाढवावा)
२) चिंचेच्या पाण्यात काकडी घालावी. मिश्रण पातळसरच असावे, तेव्हा लागल्यास अजून थोडे पाणी घालावे. दाण्याचा कूटही घालावा.
३) कढल्यात तेल गरम करावे. जिरे, हिंग, हळद, लाल तिखट घालून फोडणी करावी. हि फोडणी कायरसावर घालावी. कोथिंबीर घालून मिक्स करावे.
काकडी कायरस जेवणात तोंडीलावणी म्हणून घ्यावे.

टीप:
१) आवडीनुसार चिंचेचा कोळ किंवा गूळ कमी जास्त करू शकतो.

लसूण चटणी - Garlic Chutney

Garlic Chutney in English

वेळ: १० मिनिटे
साधारण १/२ कप चटणी

साहित्य:
१० मोठ्या लसूण पाकळ्या किंवा १ मध्यम लसणीचा गड्डा
चवीपुरते मीठ (साधारण १/२ टीस्पून)
४ ते ५ टेस्पून भाजलेल्या शेंगदाण्याचा कूट (भरड)
१/२ टीस्पून आमचूर पावडर
१ टीस्पून लाल तिखट
२ टेस्पून तेल

कृती:
१) लसूण सोलून चिरून घ्यावी. खलबत्ता तयार ठेवावा. त्यात १ टीस्पून लाल तिखट घालून ठेवावे.
२) फोडणीसाठी लहान कढले घेऊन त्यात तेल गरम करावे. तेलात लसूण घालून लसूण थोडी ब्राऊन होईस्तोवर परतावी. हि फोडणी लाल तिखटावर घालावी आणि चमच्याने ढवळावे. (टीप १)
३) या मिश्रणात मीठ, शेंगदाणे कूट, आमचूर पावडर घालावी आणि चांगले कुटून काढावे.
हि चटणी पराठा, डोसा, किंवा नेहमीच्या जेवणात तोंडीलावणी म्हणून खाऊ शकतो.

टीप:
१) लाल तिखट फोडणीत घालू नये कारण तेल आणि कढले दोन्ही गरम असल्याने लाल तिखट करपण्याची शक्यता असते. म्हणून लाल तिखट खलबत्त्यात घालून त्यावर तेल ओतावे.

पडवळ डाळिंब्या - Padwal Dalimbya

Padwal dalimbi in english

वेळ: २५ ते ३० मिनिटे
वाढणी: ३ ते ४ जणांसाठी


साहित्य:
दीड कप चिरलेले पडवळ (स्टेप २)
१ कप सोललेल्या डाळिंब्या (स्टेप १)
फोडणीसाठी: २ टीस्पून तेल, २ चिमटी मोहोरी, २ चिमटी हिंग, १/८ टीस्पून हळद, १/२ टीस्पून लाल तिखट, ४-५ कढीपत्ता पाने
२ ते ३ टेस्पून ताजा खवलेला नारळ
२ टेस्पून गूळ
चवीपुरते मीठ
इतर ऐच्छिक साहित्य: २ कोकमचे तुकडे, १ टीस्पून गोडा मसाला, १/२ टीस्पून जिरे भाजून केलेली ताजी पुड

कृती:
१) १/२ कप वाल पाण्यात साधारण १२ तास भिजत ठेवावे. वाल भिजले कि पाणी काढून चाळणीत निथळत ठेवावे. नंतर स्वच्छ सुती कपड्यात घट्ट बांधून उबदार जागी ठेवावे. मोड यायला किमान १० तास तरी लागतील. जर हवामान थंड असेल तर अजून वेळ लागू शकतो. मोड आले कि वाल कोमट पाण्यात घालावे. १० मिनिटानी सोलावेत. वाल खूप नाजूक असतात, आणि काळजीपूर्वक सोलले नाहीत तर ते तुटू शकतात. १/२ कप वालाच्या साधारण १ कप डाळिंब्या तयार होतात.
२) पडवळ मधोमध उभे चिरून आतील बिया काढून टाकाव्यात. आणि १ सेमीचे तुकडे करावे.
३) तेल तापवून मोहोरी, हिंग, हळद, लाल तिखट, आणि कढीपत्ता घालून फोडणी करावी. डाळिंब्या आणि पडवळ घालावे. थोडे पाणी शिंपडावे आणि थोडे मीठ घालावे.
४) झाकण ठेवून मोठ्या आचेवरच शिजू द्यावे. मध्येमध्ये थोडे पाणी घालावे म्हणजे कढईच्या तळाला भाजी चिकटून करपणार नाही. तरीही खूप जास्त पाणी एकावेळी घालू नये. यामुळे भाजीचा स्वाद कमी होतो. मध्येमध्ये गरजेपुरतेच थोडेसे पाणी घालावे.
५) एक डाळिंबी घेउन बोटाने चेपून पहावी. जर शिजली असेल तर नारळ, गूळ, मीठ आणि रस राहील इतपत पाणी घालावे. या भाजीला थोडा रस चांगला लागतो. खूप सुकी झाली भाजी तर तेवढी चविष्ट लागत नाही.
भाजी शिजली कि पोळीबरोबर सर्व्ह करावी.

टिप्स:
१) जर ऐच्छिक साहित्य वापरायचे असेल तर कोकम डाळिंबी-पडवळ बरोबरच घालावे. आणि गोड मसाला व जिरेपूड नारळ घालताना त्याबरोबर घालावी.
२) पडवळ आणि डाळिंब्यांचे प्रमाण आवडीनुसार बदलता येईल. माझ्या घरी या भाजीत डाळिंब्या पडवळापेक्षा जास्त असलेल्या आवडतात. जर पडवळ जास्त असावे असे वाटत असेल तर पडवळाचे प्रमाण जास्त ठेवावे.

मसूर पुलाव - Masoor Pulao

Masoor Pulao in English

वाढणी: ३ जणांसाठी
वेळ: ४० ते ५० मिनीटे

साहित्य:
::भातासाठी ::
दिड कप बासमती राइस
३ कपा गरम पाणी
१ बादयाण (स्टार आनिस), २ तमालपत्र, 2 लवंगा
१ टेस्पून तूप
१/२ टीस्पून मिठ
::मसूर ग्रेवी ::
१/२ कप मसूर
१ टेस्पून तूप
२ वेलची, २-३ काळी मिरी
१/४ टीस्पून हळद
१ टीस्पून लाल तिखट (मी रंगासाठी १/२ टीस्पून काश्मीरी लाल तिखट आणि तिखटपणासाठी १/२ टीस्पून नेहमीचे लाल तिखट वापरले होते)
१/२ कप बारीक चिरलेला कांदा
१ टीस्पून आलं पेस्ट
१ टीस्पून लसूण पेस्ट
१/२ कप दही
१ टीस्पून धणे पूड
१/२ टीस्पून जिरे पूड
१ टीस्पून गरम मसाला
२ टेस्पून बेदाणे, थोडेसे काजू
चवीपुरते मिठ

कृती:
१) मसूर रात्रभर किंवा ७ ते ८ तास पाण्यात भिजत ठेवावे. कूकरमध्ये १ शिट्टी करून मसूर पाणी ना घालता शिजवून घ्यावे. शिजवताना थोडे मिठ घालावे.
२) पॅनमध्ये तूप गरम करून त्यात वेलची आणि मिरी घालावी. १० सेकंद परतावे. हळद, लाल तिखट आणि आलेलसूण पेस्ट घालून परतावे. कांदा घालून पारदर्शक होईतोवर परतावे.
३) आता शिजलेले मसूर आणि १/२ कप पाणी घालावे. थोडेसेच मिठ घालावे कारण आधी मसूर शिजताना मिठ घातले होते. थोडा वेळ शिजू द्यावे. आता गरम मसाला, धणे-जिरेपूड, बेदाणे, काजू घालून मिक्स करावे. चव पाहून गरजेनुसार मसाला घालावा. गॅसवरून बाजूला काढावे. ही ग्रेव्ही घट्टसरच असावी कारण थंड झाल्यावर यात नंतर दही घालायचे आहे.
४) ग्रेव्ही जरा गार झाली की त्यात घोटलेले दही घालून निट मिकस करावे. लागल्यास थोडे मिठ घालावे.
५) बासमती तांदूळ १० मिनीटे पाण्यात भिजवून ठेवावा. नंतर पाणी काढून टाकावे आणि तांदूळ २० मिनिट्स निथळत ठेवावा.
६) एक मिडीयम सॉसपॅन गरम करावा. त्यात तूप घालून वितळू द्यावे. स्टार आनिस, तमालपत्र, आणि लवंगा घालून १० सेकंद परतावे. निथळलेला तांदूळ घालून चांगला कोरडा होईस्तोवर परतावे. तांदूळ चांगला परतला गेला की तांदळाचे टेक्सचर बदलते.
७) तांदूळ चांगला परतला गेला की गरम पाणी घालावे. ढवळून झाकण न ठेवता मोठ्या आचेवर उकळू द्यावे. भाताच्या पृष्ठभागावर पाणी दिसायचे बंद झाले कि लगेच आच लहान करावी आणि झाकण ठेवून भाताला वाफ काढावी. भात नीट शिजू द्यावा.
शिजलेला भात थोडावेळ तसाच ठेवावा. कारण गरम भातात ग्रेव्ही मिक्स केली तर भाताची शीते मोडतील.
८) काट्याने (फोर्क) भात फ्लफ करून घ्यावा. एकूण ग्रेव्हीतील १/२ ग्रेव्ही घालून भात हलकेच मिक्स करावा. लागेल तशी ग्रेव्ही घालावी.
९) थोडे तूप घालून मिक्स करावे. आणि १० मिनीटे एकदम मंद आचेवर झाकण ठेवून भात गरम होऊ द्यावा.

गरम गरम पुलाव रायत्याबरोबर सेर्व्ह करावा. [रायत्याची रेसिपी]

टीपा:
१) तांदूळ मोठ्या आचेवर ६ ते ८ मिनीटे भाजल्याने भात मोकळा होतो.
२) जर मसूर भिजावायला जास्त वेळ नसेल तर २ तासा एकदम गरम पाण्यात मसूर भिजवावेत.
३) तूप जर कमी वापरायचे असल्यास ग्रेव्ही तेलात बनवावी आणि शेवटी जे तूप घालायचे आहे ते घालू नये.

कैरीचे लोणचे - Kairiche Lonche

Mango Pickle in English

वेळ: १५ मिनीटे
साधारण २ कप लोणचे

साहित्य:
२ कप कैरीच्या लहान फोडी (३ लहान कैर्‍या)
दिड टिस्पून मिठ
१/२ टिस्पून हिंग
१/४ ते १/२ टिस्पून तळलेल्या मेथी दाण्याची पावडर (स्टेप २)
१ टेस्पून मोहोरी पावडर
२ टेस्पून लाल तिखट
फोडणीसाठी: ४ टेस्पून तेल, १/२ टिस्पून मोहोरी, १/२ टिस्पून हळद, १/४ टिस्पून हिंग

कृती:
१) कैर्‍या धुवून निट कोरड्या करून मगच त्याच्या फोडी कराव्यात. कैरीच्या फोडींना तासभर मिठ, लाल तिखट आणि हिंग लावून ठेवावे.
२) १२-१५ मेथी दाणे तेलात तळून घ्यावे. खलबत्त्यात कुटून बारीक पूड करावी.
३) कढल्यात तेल गरम करून त्यात मोहोरी, हिंग, आणि हळद घालून फोडणी करावी. हि फोडणी एखाद्या काचेच्या किंवा स्टीलच्या वाटीत काढून गार होवू द्यावी.
४) कैरीच्या फोडींमध्ये मेथीपूड, मोहोरी पूड आणि गार झालेली फोडणी घालून मिक्स करावे.
हे लोणचे लहान काचेच्या बरणीत भरून ठेवावे.

टीपा:
१) जर खार जास्त हवा असेल तर थोडी मोहोरी पावडर घालावी.
२) मेथीची पावडर आधी १/४ टिस्पूनच टाकावी. २-३ तासांनी चव पाहून जर लागली तर अजून थोडी घालावी.
३) मिठाचे प्रमाणही आवडीनुसार कमी किंवा जास्त करता येईल.
४) मी २ टेस्पून लाल तिखटापैकी १/२ टेस्पून तिखट हे रंगाचे (काश्मिरी) लाल तिखट वापरले होते व उरलेले दिड टेस्पून साधं तिखट वापरलं होतं.
५) वरील लोणच्यात मोहोरी पावडर बरोबर थोडी मोहोरीची डाळ वापरल्यास लोणचे दिसायला आणि चवीलाही छान होते.

पालक राईस - Palak Rice

Spinach Rice in English

वेळ: ३० मिनीटे
वाढणी: २ जणांसाठी

साहित्य:
३/४ कप बासमती तांदूळ
१ ते दिड कप बारीक चिरलेली पालकाची पाने + १/२ कप पाणी
३/४ कप गरम पाणी
१ टेस्पून बटर
१ टिस्पून बारीक चिरलेले आले
१ टिस्पून बारीक चिरलेले लसूण
१/२ कप बारीक चिरलेला कांदा
१ लहान हिरवी मिरची
आख्खे गरम मसाले - २ तमालप्रत्र, १ हिरवी वेलची, २ लवंगा
चवीपुरते मिठ

कृती:
१) तांदूळ साध्या पाण्यात १० मिनीटे भिजवून ठेवावा. १० मिनीटांनी पाणी काढून टाकावे. आणि हा तांदूळ १० मिनीटे निथळत ठेवावा.
२) १/२ कप साधं पाणी आणि पालक एकत्र करून बारीक प्युरी करून घ्यावी.
३) नॉनस्टीक पॅनमध्ये १ टेस्पून बटर किंवा तूप गरम करावे. त्यात जिरे आणि आख्खे मसाले घालावे. ५ ते १० सेकंद परतून आले-लसूण आणि मिरची घालावी.
४) निथळत ठेवलेला तांदूळ आता घालून व्यवस्थित कोरडा होईस्तोवर परतावा. सतत परतत राहा म्हणजे तांदूळ जळणार नाही. तांदूळ पूर्ण कोरडा झाला पाहिजे आणि व्यवस्थित भाजला गेला पाहिजे.
५) ३/४ कप गरम पाणी, मिठ आणि पालकाची प्युरी घालून मोठ्या आचेवर भात शिजू द्यावा. भाताच्या पृष्ठभागावर (सरफेस) पाणी दिसायचे बंद झाले कि लगेच आच मिडीयम आणि लो च्यामध्यावर ठेवावी तसेच पॅनवर झाकण ठेवावे. साधारण १० मिनीटे वाफ काढावी.
भात तयार झाला कि काट्याने (fork) हलकेच मोकळा करून घ्यावा. गरम भात रायते आणि पापडाबरोबर सर्व्ह करावा.

टीपा:
१) भात अधिक पौष्टिक बनवण्यासाठी मटार, गाजर, फरसबी अशा भाज्याही घालू शकतो.
२) तांदूळ चांगला भाजला गेल्याने भात मोकळा होतो. तसेच भात मोकळा होण्यासाठी गरम पाणी वापरावे आणि स्टेप क्र. ५ चे नक्की अवलंबन करावे.
३) लहान मुलांना हा भात नक्की आवडेल. वाटल्यास मिरची घालू नये.