मसूराची आमटी - Masoor Amti

Masoor Amti in English



वेळ: १५ ते २० मिनिटे

वाढणी: ४ जणांसाठी



साहित्य:

१/२ कप मसूर (टीप १)

फोडणीसाठी: १ टेस्पून तेल, २ चिमटी मोहोरी, २ चिमटी जिरे, १/८ टीस्पून हिंग, १/४ टीस्पून हळद, १/२ टीस्पून लाल तिखट, ५ ते ६ कढीपत्ता पाने

४ ते ५ लसणीच्या मोठ्या पाकळ्या, जाडसर चिरून

२ टेस्पून ओला नारळ

१ टीस्पून गोड मसाला

३ कोकमचे तुकडे

२ टीस्पून गूळ किंवा चवीनुसार

१/४ कप बारीक चिरलेली कोथिंबीर



कृती:

१) मसूर रात्रभर पाण्यात भिजत ठेवावे. नंतर पाणी काढून टाकावे. १/४ चमचा मीठ घालून प्रेशर कुकरमध्ये २ शिट्ट्या करून, पाणी न घालता शिजवून घ्यावे. वाफ जीरली कि मसूर बाहेर काढावेत आणि डावेने थोडेसे चेचून घ्यावे. आणि १ कप पाणी घालावे.

२) कढईमध्ये तेल गरम करावे. लसूण घालावी आणि कडा ब्राऊन होईतोवर परतावी (जळू देऊ नयेत). लसूण नीट परतली गेली नाही तर आमटीला लसणीचा कच्चट वास राहतो.

३) मोहोरी, जिरे, हिंग, हळद, लाल तिखट आणि कढीपत्ता घालून फोडणी करावी.

४) नारळ घालून काही सेकंद परतावे. आता मसूर घालून ढवळावे. लागल्यास पाणी घालावे. कोकम आणि गोडा मसाला घालावा. आमटीला उकळी काढावी. गूळ आणि मीठ घालून ३ ते ४ मिनिटे मध्यम आचेवर उकळी काढावी.

५) चव पाहून लागेल तो जिन्नस वाढवावा. कोथिंबीर घालून तूप भाताबरोबर आमटी सर्व्ह करावी.



टीप:

१) मसुराला मोडसुद्धा काढू शकतो. मोड काढण्यासाठी मसूर रात्रभर पाण्यात भिजवून ठेवावेत. पाणी निथळून घ्यावे. नंतर सुती कपड्यात घट्ट बांधून उबदार ठिकाणी किमान ८ तास तरी ठेवावेत. मोड आल्यावर वरील पद्धतीनेच आमटी करावी.

मुगाची उसळ - Mugachi usal

Mung beans Usal in English



वाढणी: २ ते ३ जणांसाठी

वेळ: २० ते २५ मिनिटे (मूग भिजवण्याचा कालावधी वगळून)



साहित्य:

३/४ कप मुग

फोडणीसाठी: २ टीस्पून तेल, २ चिमटी मोहोरी, १/८ टीस्पून हिंग, १/४ टीस्पून हळद, १/२ टीस्पून लाल तिखट, ४-५ कढीपत्ता पाने

२- ३ मोठ्या लसणीच्या पाकळ्या, जराशा ठेचून

१/४ कप बारीक चिरलेला कांदा

१/४ कप ताजा खोवलेला नारळ

२ ते ३ आमसूलं

१/२ टीस्पून गोड मसाला (ऐच्छिक)

चवीपुरते मीठ

१/२ टीस्पून साखर किंवा चवीनुसार



कृती:

१) मूग रात्रभर पाण्यात भिजत ठेवावे. नंतर सकाळी पाणी काढून टाकावे. मूग निवडून घ्यावे, जर खडा किंवा न भिजलेला कडक मूग असेल तर काढून टाकावा. सुती कापडात भिजलेले मूग घट्ट बांधून ठेवावे. मोड यायला साधारण १० तास तरी लागतील. आणि जर थंडीचा सिझन असेल तर अजून काही तास लागतील. मुगाला मोड आले कि उसळ बनवायच्या आधी पाण्यात घालून लगेच उपसावेत. यामुळे मूग थोडे ओलसर होतात आणि फोडणीला टाकल्यावर कोरडे राहत नाहीत. आणि करपण्याचा संभव टळतो.

२) कढईत तेल गरम करून. मोहोरी, हिंग, हळद, लाल तिखट, कढीपत्ता घालून फोडणी करावी. लसूण आणि कांदा नीट परतून घ्यावा.

३) कांदा छान परतला कि मूग घालून परतावे. आमसूल, मीठ घालावे आणि नीट मिक्स करावे. झाकण ठेवून मध्यम आचेवर झाकण ठेवून वाफ काढावी. मूग कोरडे पडू देवू नये. यासाठी मध्येमध्ये पाण्याचा हबका मारावा. एकाचवेळी खूप जास्त पाणी घालू नये. त्यामुळे चव बिघडते. मूग शिजायला १५ ते २० मिनिटे लागतील.

४) मूग साधारण ९०% शिजले कि त्यात नारळ, लागल्यास मीठ आणि गोड मसाला घालावा. उसळीला थोडा रस ठेवायचा असल्यास गरजेपुरते पाणी घालावे. साखर घालून उकळी काढावी.

गरम उसळ पोळीबरोबर सर्व्ह करावी.



टीप:

१) मुगाची उसळ कांदा आणि लसणीशिवाय सुद्धा करता येईल. पण, मुग आणि कांदा-लसूण यांचे कॉम्बिनेशन खूप छान लागते.

२) मी शक्यतो कोणताही मसाला (गोड/गरम) मुगाच्या उसळीला वापरत नाही. वापरल्यास अगदी थोडासा वापरते. पण आपल्या आवडीनुसार मसाल्याचा वापर करावा.

मटकीची उसळ - Matkichi usal

Matkichi Usal in English

वेळ: १/२ तास (मटकी भिजवून मोड आणणे वगळून)
वाढणी: ३ ते ४ जणांसाठी

साहित्य:
१/२ कप मटकी
फोडणीसाठी: २ टेस्पून तेल, २ चिमटी मोहोरी, १/८ टीस्पून हिंग, १/४ टीस्पून हळद, १/२ टीस्पून लाल तिखट
४ ते ५ कढीपत्त्याची पाने
१/२ टीस्पून गोड मसाला (ऐच्छिक)
२ ते ३ आमसूलं
१ टेस्पून गूळ
चवीपुरते मीठ
२ ते ३ टेस्पून ओला नारळ
२ टेस्पून चिरलेली कोथिंबीर

कृती:
१) मटकी रात्रभर किंवा ८ ते १० तास पाण्यात भिजवून ठेवावी. ८-१० तासानंतर चाळणीवर उपसून निथळत ठेवावी. नंतर बारीक खडे किंवा कडक मटकी निवडून काढून टाकावी.
२) सुती कपडा घेउन त्यात मटकी घट्ट बांधून उबदार ठिकाणी ठेवावे. मोड यायला किमान १० ते १२ तास जातात. आणि थंडीचा मोसम असल्यास अजून जास्त वेळ लागू शकतो. (जर घरी ओवन असेल तर २०० F वर २ मिनिटे गरम करावा आणि बंद करून टाकावा. मटकी बांधलेली पुरचुंडी एका काचेच्या ताटलीत ठेवून मधल्या रॅकवर ठेवून द्यावे. एवढ्या उबेवर छान मोड येतात.)
३) मोड आलेली मटकी पाण्यात घालून लगेच उपसावी. मटकी जरा ओलसर असली कि फोडणीला घालताना करपत नाही.
४) कढईत तेल गरम करून मोहोरी, हिंग, हळद, लाल तिखट, आणि कढीपत्ता फोडणीस घालावा. उपसलेली मटकी घालावी आणि थोडावेळ परतावे. थोडे मीठ घालावे.
५) झाकण ठेवून मटकी शिजू द्यावी. मध्येमध्ये पाण्याचा हबका मारावा किंवा पाण्याचे ताट कढईवर ठेवावे. मटकी कोरडी होवू देवू नये. तसेच खूप पाणी एकाचवेळी घालू नये. यामुळे पाणचट चव लागते.
६) मटकी अर्धवट शिजली कि कोकम आणि गोडा मसाला घालावा. मटकी शिजत आली कि गूळ आणि पाणी घालावे. थोडावेळ उकळी काढून मटकी शिजू द्यावी. ओला नारळ आणि कोथिंबीर घालून मिक्स करावे.
गरम पोळीबरोबर सर्व्ह करावे.

मसूर पुलाव - Masoor Pulao

Masoor Pulao in English

वाढणी: ३ जणांसाठी
वेळ: ४० ते ५० मिनीटे

साहित्य:
::भातासाठी ::
दिड कप बासमती राइस
३ कपा गरम पाणी
१ बादयाण (स्टार आनिस), २ तमालपत्र, 2 लवंगा
१ टेस्पून तूप
१/२ टीस्पून मिठ
::मसूर ग्रेवी ::
१/२ कप मसूर
१ टेस्पून तूप
२ वेलची, २-३ काळी मिरी
१/४ टीस्पून हळद
१ टीस्पून लाल तिखट (मी रंगासाठी १/२ टीस्पून काश्मीरी लाल तिखट आणि तिखटपणासाठी १/२ टीस्पून नेहमीचे लाल तिखट वापरले होते)
१/२ कप बारीक चिरलेला कांदा
१ टीस्पून आलं पेस्ट
१ टीस्पून लसूण पेस्ट
१/२ कप दही
१ टीस्पून धणे पूड
१/२ टीस्पून जिरे पूड
१ टीस्पून गरम मसाला
२ टेस्पून बेदाणे, थोडेसे काजू
चवीपुरते मिठ

कृती:
१) मसूर रात्रभर किंवा ७ ते ८ तास पाण्यात भिजत ठेवावे. कूकरमध्ये १ शिट्टी करून मसूर पाणी ना घालता शिजवून घ्यावे. शिजवताना थोडे मिठ घालावे.
२) पॅनमध्ये तूप गरम करून त्यात वेलची आणि मिरी घालावी. १० सेकंद परतावे. हळद, लाल तिखट आणि आलेलसूण पेस्ट घालून परतावे. कांदा घालून पारदर्शक होईतोवर परतावे.
३) आता शिजलेले मसूर आणि १/२ कप पाणी घालावे. थोडेसेच मिठ घालावे कारण आधी मसूर शिजताना मिठ घातले होते. थोडा वेळ शिजू द्यावे. आता गरम मसाला, धणे-जिरेपूड, बेदाणे, काजू घालून मिक्स करावे. चव पाहून गरजेनुसार मसाला घालावा. गॅसवरून बाजूला काढावे. ही ग्रेव्ही घट्टसरच असावी कारण थंड झाल्यावर यात नंतर दही घालायचे आहे.
४) ग्रेव्ही जरा गार झाली की त्यात घोटलेले दही घालून निट मिकस करावे. लागल्यास थोडे मिठ घालावे.
५) बासमती तांदूळ १० मिनीटे पाण्यात भिजवून ठेवावा. नंतर पाणी काढून टाकावे आणि तांदूळ २० मिनिट्स निथळत ठेवावा.
६) एक मिडीयम सॉसपॅन गरम करावा. त्यात तूप घालून वितळू द्यावे. स्टार आनिस, तमालपत्र, आणि लवंगा घालून १० सेकंद परतावे. निथळलेला तांदूळ घालून चांगला कोरडा होईस्तोवर परतावे. तांदूळ चांगला परतला गेला की तांदळाचे टेक्सचर बदलते.
७) तांदूळ चांगला परतला गेला की गरम पाणी घालावे. ढवळून झाकण न ठेवता मोठ्या आचेवर उकळू द्यावे. भाताच्या पृष्ठभागावर पाणी दिसायचे बंद झाले कि लगेच आच लहान करावी आणि झाकण ठेवून भाताला वाफ काढावी. भात नीट शिजू द्यावा.
शिजलेला भात थोडावेळ तसाच ठेवावा. कारण गरम भातात ग्रेव्ही मिक्स केली तर भाताची शीते मोडतील.
८) काट्याने (फोर्क) भात फ्लफ करून घ्यावा. एकूण ग्रेव्हीतील १/२ ग्रेव्ही घालून भात हलकेच मिक्स करावा. लागेल तशी ग्रेव्ही घालावी.
९) थोडे तूप घालून मिक्स करावे. आणि १० मिनीटे एकदम मंद आचेवर झाकण ठेवून भात गरम होऊ द्यावा.

गरम गरम पुलाव रायत्याबरोबर सेर्व्ह करावा. [रायत्याची रेसिपी]

टीपा:
१) तांदूळ मोठ्या आचेवर ६ ते ८ मिनीटे भाजल्याने भात मोकळा होतो.
२) जर मसूर भिजावायला जास्त वेळ नसेल तर २ तासा एकदम गरम पाण्यात मसूर भिजवावेत.
३) तूप जर कमी वापरायचे असल्यास ग्रेव्ही तेलात बनवावी आणि शेवटी जे तूप घालायचे आहे ते घालू नये.

चवळी आमटी - Chawli Amti

Chawli Amti in English

वाढणी: ३ ते ४ जणांसाठी
वेळ: २० मिनीटे (चवळी भिजलेली असल्यावर)

साहित्य:
१/२ कप चवळी
१/४ कप कांदा, बारीक चिरून
१ मोठा टोमॅटो, प्युरी करून
२ लसूण पाकळ्या, सोलून
फोडणीसाठी: ३ टिस्पून तेल, २ चिमटी मोहोरी, १/४ टिस्पून जिरे, १ हिरवी मिरची, ४ कढीपत्ता पाने, चिमूटभर हिंग, १/४ टिस्पून हळद, १/२ टिस्पून लाल तिखट
१/२ ते १ टिस्पून कांदा लसूण मसाला
१ टिस्पून चिंचेचा घट्ट कोळ
२ टेस्पून ताजा खवलेला नारळ
२ टेस्पून कोथिंबीर, बारीक चिरून + १ टिस्पून सजावटीसाठी
चवीपुरते मिठ

कृती:
१) चवळी साधारण ३ तास कोमट पाण्यात भिजवावी. कूकरमध्ये १ ते २ शिट्ट्या करून वाफवून घ्यावी.
२) कढईमध्ये ३ पैकी २ टिस्पून तेल गरम करावे. मोहोरी, जिरे, हिंग, हळद, हिरवी मिरची, कढीपत्ता, लाल तिखट आणि कोथिंबीर घालून फोडणी करावी. काही सेकंद परतून कांदा घालावा. कांदा पारदर्शक होईस्तोवर परतावा.
३) कांदा परतल्यावर टोमॅटो प्युरी घालावी. मध्यम आचेवर काही मिनीटे शिजू द्यावी. टोमॅटोचा कच्चा वास गेला आणि टोमॅटो शिजला कि शिजलेली चवळी घालावी. कपभर पाणी घालून ढवळावे. नंतर कांदा लसूण मसाला, चिंचेचा कोळ, नारळ आणि मिठ घालावे.
४) गरज पडल्यास पाणी वाढवून पातळपणा अडजस्ट करावा. मध्यम आचेवर काही मिनीटे उकळी काढावी.
आमटी तयार झाली कि कढल्यात १ टिस्पून तेल गरम करावे. त्यात लसूण पाकळ्या ठेचून घालाव्यात आणि चिमूटभर हिंग घालावे. हि फोडणी आमटीवर घालावी. आमटी ढवळून कोथिंबीरीने सजवावी आणि गरमागरम भाताबरोबर सर्व्ह करावी.

टीप:
१) या आमटीमध्ये भरीला उकडून सोललेला बटाटा फोडी करून घालावा आणि थोडावेळ उकळी काढावी.
२) हि आमटी गोडा मसाला वापरूनही करता येते. त्यासाठी कांदालसूण मसाला न वापरता गोडा मसाला वापरावा आणि जोडीला २ टिस्पून किसलेला गूळ घालावा.

Labels:
Chawli Amti, Chavlichi amti, चवळीची आमटी, black-eyed beans curry

तोंडली डाळींबी -Tendali Dalimbi

Tondali Dalimbya in English

३ जणांसाठी
वेळ: साधारण ३० मिनीटे

साहित्य:
एक ते सव्वा कप सोललेल्या डाळींब्या (स्टेप १)
१२ ते १५ तोंडली
फोडणीसाठी:
१ टेस्पून तेल, १/४ टिस्पून मोहोरी, १/२ टिस्पून जिरे, चिमूटभर हिंग, १/४ टिस्पून हळद, १/२ टिस्पून लाल तिखट
४ कढीपत्ता पाने
२ टेस्पून सुका नारळ
१ टिस्पून जिरे
१ टिस्पून गूळ
२ आमसुलं
१/४ कप कोथिंबीर
२ टेस्पून ओला नारळ
चवीनुसार मिठ

कृती:
१) साधारण ३/४ कप वाल कोमट पाण्यात १० ते १२ तास भिजत ठेवावे. नंतर पाणी काढून टाकून भिजलेले वाल मोड आणण्यासाठी पंच्यात ८ ते १० तास गच्च बांधून उबदार ठिकाणी ठेवावे. वालाची पुरचूंडी एखाद्या भांड्यात झाकून ठेवावी. डाळींब्यांना मोड आले कि कोमट पाण्यात १० मिनीटे टाकून ठेवावे. डाळींब्या सोलून घ्याव्यात. मोड आलेल्या डाळींब्या हाताळताना त्या अख्ख्या राहतील याची काळजी घ्यावी. साधारण सव्वा ते दिड कप डाळींब्या होतील.
२) तोंडली स्वच्छ धुवून घ्यावीत. प्रत्येक तोंडल्याचे उभे ४ ते ५ काप करावेत आणि गार पाण्यात ठेवून द्यावे.
३) कढईत किसलेला सुका नारळ मध्यम आचेवर भाजून घ्यावे. नंतर जिरे खरपूस भाजून घ्यावे. नंतर भाजलेला नारळ आणि भाजलेले जिरे निट कुटून घ्यावे.
४) कढईत तेल गरम करावे. त्यात मोहोरी घालून तडतडू द्यावी. नंतर जिरे, हिंग, हळद, आणि लाल तिखट घालून फोडणी करावी. कढीपत्ता आणि कोथिंबीर घालावी. थोडावेळ परतून प्रथम चिरलेली तोंडली घालावीत. २ मिनीटे मध्यम आचेवर वाफ काढावी. नंतर डाळींब्या घालाव्यात. हलक्या हाताने परतावे. कढईवर पाण्याची ताटली ठेवून वाफ काढावी. हे शक्य नसेल तर गरजेनुसार पाण्याचा हबका मारावा आणि वाफ काढावी. आमसुलं आणि मिठ घालून वाफ काढावी. तसेच भाजलेले जिरे-खोबरेही घालावे.
५) डाळींब्या आणि तोंडली साधारण शिजत आले कि गूळ घालून वाफ काढावी. डाळींब्या खुप नाजुक असतात पटकन मोडल्या जातात म्हणून हलक्या हाताने परतावे.
भाजी तयार झाली कि ओला नारळ घालावा. गरमागरम पोळ्यांबरोबर सर्व्ह करावे.

टीप:
१) आमसुलाऐवजी चिंचेचे पाणी वापरू शकतो.
२) काही जणांना हि भाजी रसदार आवडते तेव्हा शिजवताना गरजेपुरते पाणी घालावे.
३) या भाजीला थोडा गोडा मसाला (महाराष्ट्रीयन मसाला) घातल्यास छान स्वाद येतो.

Labels:
Tondli Dalimbya usal bhaji, gherkins sabzi, ivy gourd

समोसा चाट - Samosa Chat

Samosa Chat in English

वेळ: ३० ते ४० मिनीटे (समोसे तयार असल्यास)
सर्व्हींग - ३ जणांसाठी

साहित्य:
६ तयार समोसे (मध्यम आकाराचे) - समोसा रेसिपीसाठी इथे क्लिक करा
१/४ कप हिरवी चटणी
१/४ कप चिंचगूळाची चटणी किंवा खजूराची चटणी (कृतीसाठी इथे क्लिक करा)
१/२ कप घोटलेले दही + चिमूटभर मिठ
१ टिस्पून चाट मसाला
१/२ टिस्पून सैंधव मिठ (काळे मिठ)
१/२ टिस्पून लाल तिखट
१/२ कप बारीक चिरलेला कांदा
१/२ कप बारीक चिरलेला टोमॅटो
२ टेस्पून बारीक चिरलेली कोथिंबीर
१/४ बारीक शेव
चना मसाला ग्रेव्ही
१ कप शिजलेले पांढरे चणे (काबुली चणे)
फोडणीसाठी: १ टिस्पून तेल, दोन चिमटी जिरे, चिमूटभर हिंग, १/४ टिस्पून हळद, १ टिस्पून लाल तिखट
१/२ कप चिरलेला कांदा + २ लसूण पाकळ्या + १/२ इंच आले + १ हिरवी मिरची ची पेस्ट
१ मध्यम टोमॅटोची प्युरी
१ टिस्पून छोले मसाला
१/४ टिस्पून आमचुर पावडर
चवीपुरते मिठ



कृती:
चना मसाला ग्रेव्ही
१) कढईत तेल गरम करून त्यात जिरे, हिंग, हळद, आणि लाल तिखट घालून फोडणी करावी. त्यात कांदा+ लसूण + आले + हिरवी मिरची यांची पेस्ट घालून परतावे. कांदा परतला गेला कि त्यात टोमॅटोची प्युरी घालून एक उकळी काढावी. शिजलेले चणे, आमचुर पावडर, छोले मसाला आणि चवीपुरते मिठ घालावे. थोडे पाणी घालून कढईवर झाकण ठेवून ५ ते ७ मिनीटे चणे शिजवावे.
समोसा चाटसाठी
२) ३ प्लेट्स तयार कराव्यात. प्रत्येक प्लेटमध्ये २ समोसे ठेवावे आणि किंचीत फोडून घ्यावे. त्यावर १ डाव चण्याची ग्रेव्ही घालावी. त्यावर चिरलेला कांदा आणि टोमॅटो घालावा. चाट मसाला आणि सैंधव मिठ भुरभूरावे. नंतर हिरवी चटणी आणि गोड चटणी घालावी. घोटलेले दही घालावे. परत गोड चटणी आणि हिरवी चटणी घालावी. थोडे लाल तिखट भुरभूरावे. कोथिंबीर आणि शेव घालून सजावट करावी.

Labels:
Samosa Chat,Indian Chaat Recipe, Samosa Chaat

उडदाचे डांगर - Urad Dangar

Urad Dal Dangar (Powder) in English

कोकणात हे डांगर तोंडीलावणी म्हणून वापरतात.

साहित्य:
दिड कप उडीद डाळ (शक्यतो सालासकट)
१ टेस्पून जिरे
१/२ टेस्पून हिंग
५-६ लाल सुक्या मिरच्या
१/२ टेस्पून तेल

कृती:
१) उडीद डाळ खमंग भाजून घ्यावी. लाल मिरच्यांचे तुकडे १/२ चमचा तेलावर भाजून घ्यावे. जर बिया नको असतील तर त्यातील बिया काढून टाकाव्यात.
२) भाजलेली उडीदडाळ, १ टेस्पून जिरे, १/२ टेस्पून हिंग आणि भाजलेल्या लाल मिरच्या एकत्र करून बारीक दळून आणावे.

१ चमचा डांगरात दही, कांदा किंवा लसूण आणि मिठ घालून तोंडीलावणी म्हणून खायला छान लागते.

डोसा पोडी - Dosa Podi

Dosa Podi in English

साधारण १/२ कप
वेळ: २० मिनीटे



संबंधित पाककृती:
मसाला डोसा
उडीपी सांबार
मूगाचा डोसा

साहित्य:
१/४ कप उडीद डाळ
१/४ कप चणा डाळ
७ ते ८ सुक्या लाल मिरच्या
६ ते ७ कढीपत्ता पाने
१ टिस्पून तेल
चवीपुरते मिठ

कृती:
१) चणाडाळ आणि उडीद डाळ वेगवेगळ्या भाजून घ्याव्या. गुलाबी रंग येईस्तोवर परतावे. खुप जास्त गडद भाजू नये.
२) १ टिस्पून तेल गरम करून त्यात लाल मिरच्या आणि कढीपत्ता घालून काही सेकंद परतावे.
३) चणाडाळ, उडीद डाळ, लाल मिरच्या कढीपत्ता आणि मिठ मिक्सरमध्ये बारीक करावे. एकदम पिठ करू नये अगदी किंचीत भरड ठेवावे. डाळीचा बारीक रवा डोशाबरोबर चांगला लागतो.
हि पूड डोशावर भुरभूरावी.

टीप:
१) जर तुम्हाला डोसा पूड अजून तिखट हवी असेल तर १ टीस्पून लाल तिखट घालून मिक्स करावे.

Labels:
Dosa Podi recipe, South Indian Podi recipe

डाळींबी आमटी - Dalimbi Amti

Dalimbi Amti in English

२ ते ३ जणांसाठी
वेळ: १५ मिनीटे

साहित्य:
१ कप मोड आलेले आणि सोललेले वाल
१ टेस्पून तेल
१/४ कप सुके खोबरे, किसून
१/२ टिस्पून जिरे, भाजण्यासाठी
१/२ टिस्पून जिरे, फोडणीसाठी
१/८ टिस्पून हिंग
१/४ टिस्पून हळद
१/२ टिस्पून तिखट
३-४ कढीपत्ता पाने
२ टिस्पून कोथिंबीर
२ आमसुलं
१ टिस्पून गूळ किंवा १ टिस्पून साखर
चवीपुरते मिठ

कृती:
१) किसलेले सुके खोबरे खरपूस भाजून घ्यावे. जिरे खमंग भाजावे. भाजलेले खोबरे हातानेच चुरून घ्यावे. भाजलेले जिरे खलबत्त्यात कुटून घ्यावे.
२) डाळींब्या मिठ घालून अगदी किंचीत वाफवून घ्याव्यात. पुर्ण लगदा होवू देवू नये. वाफवलेल्या डाळींब्यातील थोड्या डाळींब्या चेचून घ्याव्यात.
३) पातेल्यात तेल गरम करावे. जिरे, हिंग, हळद, तिखट आणि कढीपत्ता घालून फोडणी करावी. त्यात डाळींब्या घालाव्यात. कपभर पाणी घालावेत. आमसुलं घालावीत. कुटलेले जिरे आणि भाजलेले खोबरे घालावे. मध्यम आचेवर २ मिनीटे उकळी काढावी. पातळपणासाठी गरजेनुसार पाणी घालावे. नंतर गूळ घालून १-२ मिनीटे उकळी काढावी. गरज वाटल्यास मिठ घालावे. एकदम मंद आच ठेवून थोडावेळ झाकण ठेवून आमटी मुरू द्यावी. कोथिंबीर घालून सजवावे.
गरमागरम तूपभाताबरोबर हि आमटी मस्त लागते.

टीप:
१) मी शिजवलेल्या डाळींब्या ५०% चेचून घेते आणि थोडया आख्ख्या ठेवते म्हणजे आमटी छान मिळून येते. फक्त फोटोत डाळींब्या दिसाव्यात म्हणून आख्ख्या ठेवल्या आहेत.

Labels:
Dalimbyanchi Amti, Dalimbi Amti

मूगडाळ हलवा - Moong dal halwa

Moong Dal Halwa in English

वेळ: साधारण १ ते दिड तास
२ ते ३ जणांसाठी

साहित्य:
३/४ कप पिवळी मूग डाळ
१/२ कप दूध, गरम
साधारण ३/४ ते १ कप पाणी (टीप ३)
१/४ ते १/२ कप खवा, भाजलेला
४ टेस्पून साजूक तूप
१/२ ते ३/४ कप साखर
१/२ टिस्पून वेलचीपूड
२ ते ३ बदाम

मूगडाळ हलव्याच्या स्टेप्सचे काही फोटो

कृती:
१) मूगडाळ मध्यम आचेवर साधारण गुलाबी-लालसर परतावे. साधारण ३० ते ३५ मिनीटे सतत ढवळावे. डाळ जळू देऊ नये किंवा खुप डार्क भाजू नये. तसेच एकसारखी भाजली गेली पाहिजे. मूगडाळ जरा कोमट झाली कि मिक्सरमध्ये बारीक पावडर करून घ्यावी. अगदी किंचीत भरड राहू द्यावी.
२) कढईत तूप गरम करून त्यात मूगडाळ पावडर घालून मध्यम आचेवर छान केशरी रंग येईस्तोवर भाजून घ्यावी. साधारण १० मिनीटे. नंतर १/२ कप गरम दुध थोडे थोडे घालून वाफ काढावी. बदामाचे काप घालावे. गॅस मंद करावा सर्व दुध घालावे आणि अगदी मंद आचेवर वाफ काढावी. मधेमधे ढवळावे, तळाला डाळ चिकटू देवू नये. नंतर गरम पाण्याचा हबका मारून ढवळत राहावे. डाळ पूर्ण शिजेस्तोवर मंद आचेवर वाफ काढावी.
३) डाळीचा रवा निट शिजला आणि थोडा फुलून आला कि त्यात १/२ साखर घालावी आणि खवा घालावा, वेलचीपूड घालावी. ढवळून अजून थोडावेळ वाफ काढावी. खवा निट मिक्स झाला पाहिजे, गुठळ्या राहू देवू नये.
गरमागरम मूगडाळीचा हलवा वरती बदामाचे काप घालून सर्व्ह करावा.

टीप:
१) शेवटी आपण पाण्याचा हबका देतो त्याऐवजी दुध आणि पाण्याचे मिश्रणही वापरू शकतो.
२) वाफ व्यवस्थित काढावी, घाई करू नये. एकदा साखर घातली कि काहीच करता येत नाही, म्हणून साखर घालायच्या आधी डाळ शिजली आहे कि नाही ते तपासावे.
३) जोवर डाळ शिजत नाही तोवर थोडे थोडे पाणी किंवा दूध + पाणी घालून ढवळत राहावे. यासाठी नक्की प्रमाण नाही, गरजेनुसार अंदाजाने घालत राहावे.

मूगाचे पॅटीस - Moong Patties with Soya Granules

Moong Patties in English

८ पॅटीस
वेळ: ३० मिनीटे (सर्व साहित्य तयार असल्यास)

साहित्य:
१/२ कप मुग
१/२ कप सोया ग्रॅन्युल्स (Soya Granules)
१ मध्यम बटाटा, उकडून मॅश करून घेणे
१/२ कप ब्रेड क्रम्स
२ हिरव्या मिरच्या, बारीक चिरून
१ टिस्पून गार्लिक पावडर
१ टिस्पून जिरे
१/२ टिस्पून गरम मसाला
१/२ ते १ टिस्पून चाट मसाला
चवीपुरते मिठ
तेल

कृती:
१) मूग १० तास भिजवून घ्यावेत, त्यातील कडक राहिलेले मूग काढून टाकावेत. मोड येण्यासाठी साधारण ६ ते ८ तास सुती कपड्यात बांधून ठेवावे. मोड आलेले मूग प्रेशर कूकरमध्ये दोनच शिट्टया करून शिजवून घ्यावे. शिजवताना कूकरमध्ये पाणी घालावे आणि कूकरच्या आतील डब्यात पाणी न घालता मूग आणि मीठ घालावेत.
२) सोया ग्रॅन्युल्स उकळत्या पाण्यात घालून ५ मिनीटे शिजवावेत. गार झाल्यावर ग्रॅन्युल्स पिळून घ्यावेत.
३) एका मोठ्या बोलमध्ये शिजवलेले मूग, सोया ग्रॅन्युल्स, ब्रेड क्रम्स, शिजवलेला बटाटा, गार्लिक पावडर, जिरे, गरम मसाला, चाट मसाला, हिरव्या मिरच्या आणि चवीनुसार मिठ असे घालून मिक्स करावे. मिडीयम साईजचे पॅटीस बनवा.
४) तवा तापवावा. प्रत्येक पॅटीसला तेल लावून तव्यावर मध्यम आचेवर ब्राऊन करून घ्यावे.
हे पॅटीस बर्गरमध्ये खुप छान लागतात.

मी ७ ते ८ पॅटीस बनवून झिप लॉक बॅगमध्ये ठेवून डिप फ्रिझरमध्ये ठेवले. साधारण १५-२० दिवस हे पॅटीस फ्रिजरमध्ये छान राहतात. हवे तेव्हा मायक्रोवेवमध्ये गरम करून बर्गर बनवावे.

टीप:
१) थंड हवामानाच्या ठिकाणी कडधान्याला मोड चटकन येत नाहीत. यासाठी भिजवलेले मूग सुती कपड्यात घट्ट बांधून ठेवावेत. ओव्हन २५० F वर २-३ मिनीटे गरम होवू द्यावा आणि बंद करावा. ओव्हन स्विच ऑफ करूनच मधल्या जाळीवर बांधलेले मूग ठेवावेत, ६ ते ८ तासात मोड येतात. ओव्हन खुप गरम करू नये नाहीतर सुती कापड जळण्याची शक्यता असते आणि मूग कोरडे होवून कडक होतात.
२) जर गार्लिक पावडर नसेल तर लसूणपेस्ट १/४ टिस्पून तेलात परतून घ्यावी आणि मग वापरावी.

Labels:
Mung Patties, Moong Burger, homemade burger

सांबार मसाला - Sambar Masala

सांबार मसाला

वेळ: १५ मिनीटे
साधारण १/४ ते १/२ कप मसाला

साहित्य:
१/२ टिस्पून मेथी दाणे
१ टिस्पून उडीद डाळ
१ टिस्पून चणाडाळ
६ ते ७ सुक्या मिरच्या
२ टिस्पून धणे
१/२ कप ताजा खोवलेला नारळ
१५-२० पाने कढीपत्ता पाने

कृती:
१) मेथी दाणे, उडीद डाळ, चणा डाळ, धणे (टीप) मंद आचेवर गुलाबीसर भाजावी. किंचीत रंग बदलला कि सुक्या मिरच्या, कढीपत्ता आणि नारळ घालून २ मिनीटे परतावे. गार झाले कि मिक्सरमध्ये वाटून घ्यावे.

टीप:
१) धणेपूड वापरली तरीही चालेल, फक्त किंची परतून घ्यावी

सांबार पाककृती

मेदू वडा - Medu Vada Sambhar

Medu Vada Sambhar in English

मेदू वडा

वाढणी: साधारण ४ प्लेट (१२ मध्यम वडे)


साहित्य:
दिड कप उडीद डाळ
४ ते ६ मिरे, भरड कुटलेले
२ टेस्पून खोबर्‍याचे पातळ काप (१ सेंमी)
२ हिरव्या मिरच्या, बारीक चिरून
५ ते ६ कढीपत्ता पाने, बारीक चिरून
१/२ टिस्पून जाडसर किसलेले आले
चवीपुरते मिठ

Click here to see how to prepare vada step by step


कृती:
१) उडीद डाळ धुवून ४ ते ५ तास पाण्यात भिजत घालावी. नंतर त्यातील पाणी काढून टाकावे आणि मिक्सरमध्ये व्यवस्थित वाटावे. वाटताना पाणी अजिबात घालू नये (टीप १ आणि ३).
२) मिक्सरमधून वाटण एका खोलगट वाडग्यात काढावे. हॅण्ड मिकसरने, एग बिटरने किंवा चमच्याने ३ ते ४ मिनीटे घोटावे. यामुळे उडीद डाळीचे वाटण हलके होते, तसा फरक लगेचच जाणवतो. नंतर मिरे, खोबर्‍याचे काप, हिरव्या मिरच्या, आले, कढीपत्ता पाने आणि चवीपुरते मिठ असे घालून मिक्स करावे.
३) वडे तळायला घ्यायच्या आधी एका बोलमध्ये पाणी घ्यावे. उडदाचे मिश्रण हाताळताना आधी हात ओला करावा, म्हणजे वड्याला मध्यभागी भोक पाडून तेलात सोडताना पिठ हाताला चिकटणार नाही.
४) तळणीसाठी तेल गरम करावे आणि गॅस मिडीयम हायवर ठेवावा. (टीप २)


Click here to see मेदू वडा बनवण्याच्या 3 पद्धती

वडे सोनेरी किंवा गडद सोनेरी रंगावर तळून घ्यावे. चटणी आणि सांबाराबरोबर गरम गरम सर्व्ह करावे.

टीप:
१) मिश्रण खुप घट्ट वाटत असेल आणि हलके वाटत नसेल अशावेळी एक वडा तळून बघावा, वडा आतून गच्चं लागत असेल तर अगदी किंचीत पाणी घालावे.
२) वडे बारीक आचेवर तळू नयेत त्यामुळे वडे तेलकट होतात.
३) भिजवलेले पिठ पातळ झाले तर पिठाला दाटपणा येण्यासाठी २ ते ३ चमचे तांदूळाचे पिठ वापरतात. तांदूळाच्या पिठामुळे वडे वरून कुरकूरीत होतात परंतु आतून किंचीत घट्ट राहतात.

Labels:
Medu Vada Sambhar, Udipi Vada Sambhar, Medu Wada Sambar

दाल माखनी - Dal Makhani

Dal Makhani in English

Dal Makhani is a delicacy from Punjab in India. This Dal is cooked in lot of Butter and taste great. (Dal - Cooked Lentils and Makhani (Makkhan in hindi) - Butter)
Traditionally this dal was cooked slowly, for hours, on charcoal. This gave it a creamier texture. Traditionally cooked in a Punjabi houses, it had ‘malai’ (thick creamy skin that forms on top of milk) or fresh butter added to it. Dal Makhani can be served with Paratha, Naan, Roti or even Rice.

वाढणी: ३ ते ४ जणांसाठी

साहित्य:
१/२ कप अख्खे उडीद, सालासकट
१/४ कप राजमा (रेड बिन्स)
३ टेस्पून आलेलसूण पेस्ट
२ + २ बटर
१ टिस्पून जिरे
१/२ टिस्पून हळद
२ मध्यम टॉमेटो
१ टिस्पून गरम मसाला पावडर किंवा खडा मसाला (२ लवंगा, २ वेलची, १ तमालपत्र, १ लहान दालचिनीचा तुकडा)
१/२ कप कांदा, बारीक चिरून
२ टिस्पून लाल तिखट
१ टिस्पून धणेपूड
१ टिस्पून जिरेपूड
१/२ टिस्पून आमचूर पावडर
१/२ टिस्पून कसूरी मेथी
१/२ कप दूध
चवीपुरते मिठ
कोथिंबीर सजावटीसाठी

कृती:
१) उडीद आणि राजमा धुवून ६ ते ८ तास पाण्यात भिजवून ठेवावे. प्रेशर कूकरमध्ये भिजवलेले उडीद आणि राजमा दुप्पट पाणी घालून मऊसर शिजवून घ्यावेत. साधरण ४ ते ५ शिट्ट्या कराव्यात.
२) टॉमेटो प्युरीसाठी एक खोलगट पॅनमध्ये टॉमेटो बुडतील इतपत पाणी गरम करावे. त्यात २ टॉमेटो घालून २ मिनीटे उकळवावे आणि बाहेर काढून थंड होवू द्यावेत. साले आणि बिया काढून टाकाव्यात उरलेला भाग आणि थोडे पाणी मिक्सरमध्ये घालून प्युरी करून घ्यावी.
३) खोलगट पॅनमध्ये बटर घालून मध्यम आचेवर वितळू द्यावे. त्यात जिरे, हळद घालावी. [जर अख्खा गरम मसाला घालणार असाल तर तो आत्ता घालावा. काही सेकंद परतावे.]
४) आलेलसूण पेस्ट आणि लाल तिखट घालावे. काही सेकंद परतून त्यात चिरलेला कांदा घालून परतावे. कांदा निट परतल गेला कि टॉमेटो प्युरी घालून मध्यम आचेवर, पॅनवर झाकण ठेवून ५ ते ७ मिनीटे शिजू द्यावे. मधेमधे ढवळावे.
५) धणे-जिरेपूड घालावी आणि ढवळावे. शिजवलेले उडीद आणि राजमा घालावे. थोडावेळ मॅश करावे. गरजेपुरते पाणी घालून मधम आचेवर उकळी काढावी.
६) जर तुम्ही आख्खा गरम मसाला घातला नसेल तर आता गरम मसाला पावडर घालावी. नंतर कसूरी मेथी, मिठ आणि आमचूर पावडर घालून ढवळावे. अजून थोडे पाणी घालून घट्टपणा अड्जस्ट करावा. पॅनवर झाकण ठेवून २० ते २५ मिनीटे कमी आचेवर शिजू द्यावे. मधेमधे ढवळावे, डाळ पॅनच्या तळाला चिकटू देवू नये.
७) २ टेस्पून बटर घालून अजून १० मिनीटे वाफ काढावी. १० मिनीटांनी १/२ कप दूध घालावे आणि ढवळावे. परत झाकण ठेवून मध्यम आचेवर ५ मिनीटे वाफ काढावी.
गरम दाल मखनी कोथिंबीरीने सजवून रोटी, नान, किंवा भाताबरोबर सर्व्ह करावे.

Labels:
Dal Makhani, Malai Dal, Punjabi Dal Makhani

डाळींबी उसळ - Dalimbi Usal

Dalimbi Usal in English

वाढणी: २ जणांसाठी



साहित्य:
३/४ कप वाल
फोडणीसाठी:
१ टेस्पून तेल, १/४ टिस्पून मोहोरी, १/२ टिस्पून जिरे, १/८ टिस्पून हिंग, १/४ टिस्पून हळद, १/२ टिस्पून लाल तिखट
४ कढीपत्ता पाने
२ टेस्पून सुका नारळ
१ टिस्पून जिरे
१ टिस्पून गूळ
२ आमसुलं
१/४ कप कोथिंबीर
२ टेस्पून ओला नारळ
चवीनुसार मिठ

कृती:
१) वाल कोमट पाण्यात १० ते १२ तास भिजत ठेवावे. नंतर पाणी काढून टाकून भिजलेले वाल मोड आणण्यासाठी पंच्यात ८ ते १० तास गच्च बांधून ठेवावे. डाळींब्यांना मोड आले कि कोमट पाण्यात १० मिनीटे टाकून ठेवावे. डाळींब्या सोलून घ्याव्यात. मोड आलेल्या डाळींब्या हाताळताना त्या अख्ख्या राहतील याची काळजी घ्यावी. साधारण सव्वा ते दिड कप डाळींब्या होतील.
२) कढईत किसलेला सुका नारळ मध्यम आचेवर भाजून घ्यावे. नंतर जिरे खरपूस भाजून घ्यावे. नंतर भाजलेला नारळ आणि भाजलेले जिरे निट कुटून घ्यावे.
३) कढईत तेल गरम करावे. त्यात १/४ टिस्पून मोहोरी घालून तडतडू द्यावी. नंतर जिरे, हिंग, हळद, आणि लाल तिखट घालून फोडणी करावी. कढीपत्ता आणि कोथिंबीर घालावी. थोडावेळ परतून डाळींब्या घालाव्यात. हलक्या हाताने परतावे. थोडा पाणी घालावे. १ ते २ टिस्पून कुटलेले जिरे-खोबरे, आमसुलं आणि मिठ घालून वाफ काढावी.
४) डाळींब्या अर्ध्या शिजल्या कि गूळ घालून वाफ काढावी. डाळींब्या खुप नाजुक असतात पटकन मोडल्या जातात म्हणून हलक्या हाताने परतावे.
उसळ तयार झाली कि ओला नारळ घालावा. गरमागरम पोळ्यांबरोबर सर्व्ह करावे.

Labels:
Dalimbyanchi Usal, Valachi Usal, Dalimbi Usal

आलू मुंगोडी चाट - Aloo Mungodi chat

Aloo Mungodi Chat in English

वाढणी: २ ते ३ जणांसाठी
वेळ: ४० मिनीटे (मूग भिजलेले असल्यास)

साहित्य:
मुगभजीसाठी:::
१/२ कप हिरवी मुगडाळ (सालासकट)
३-४ हिरव्या मिरच्या, ४ लसूण पाकळ्या
१/२ टिस्पून लाल तिखट, १/२ टिस्पून हळद, १ टिस्पून जिरेपूड
चवीपुरते मिठ
तळण्यासाठी तेल
बटाटा:::
२ मध्यम बटाटे, उकडून, १ टिस्पून बटर, चवीपुरते मिठ, १ टिस्पून लिंबाचा रस
लाल चटणी:::
लाल मिरच्या भिजवण्यासाठी वेळ नव्हता म्हणून मी लाल चटणी पुढील प्रमाणे केली
२ टिस्पून काश्मिरी लाल तिखट, १ टिस्पून धणेपूड, २-३ टेस्पून पाणी
इतर साहित्य:::
२ टेस्पून हिरवी चटणी
१/४ कप चिंचेची चटणी
२ टिस्पून चाट मसाला
१ टिस्पून जिरेपूड
१/२ कप दही
१/२ टिस्पून काळे मिठ
साधे मिठ चवीनुसार
२ टेस्पून बारीक चिरलेली कोथिंबीर, १/४ कप बारीक शेव, १/४ कप बारीक चिरलेला कांदा
१/४ टिस्पून लाल तिखट

कृती:
१) चिंचेची चटणी आणि हिरवी चटणी तयार ठेवावी. दही फेटून घ्यावे.
२) मुगभजीसाठी हिरवी मुगडाळ ३ तास भिजत घालावी. त्यातील पाणी काढून टाकावे. मिक्सरमध्ये भिजवलेली हिरवी मुगडाळ, हिरव्या मिरच्या, लसूण पाकळ्या, लाल तिखट, हळद, जिरेपूड, चवीपुरते मिठ घालून बारीक करावे. तेल गरम करून त्यात छोट्या भजी तळून घ्याव्यात.
३) उकडलेले बटाटे सोलून त्याचे छोटे तुकडे करून घ्यावेत. एक पॅन गरम करून बटर घालावे त्यात बटाट्याच्या फोडी घालून परतावे. गॅस मध्यम ठेवावा. मिठ घालावे आणि गॅस बंद करून लिंबाचा रस घालावा.
४) प्लेटमध्ये आधी भज्या घालाव्यात त्यावर परतलेले बटाटे, २ चमचे दही, हिरवी चटणी, चिंचेची चटणी, लाल चटणी, अजून थोडे दही, चाट मसाला, जिरेपूड, काळे मिठ, साधे मिठ, लाल तिखट घालावे. शेवटी कोथिंबीर, बारीक शेव घालून सजवावे.

Labels:
Dahi Chat, Pakoda Chat, Moong Bhajji Chat, Bombay chat food, Aloo Chat

दहीवडा - Dahi vada

Dahi Wada in English

वाढणी: साधारण १० मध्यम वडे


साहित्य:
::::वड्यांसाठी::::
पाउण कप उडदाची डाळ
१/४ कप ओल्या खोबर्‍याचे पातळ तुकडे
४-५ मिरं
चवीपुरते मिठ
२ कप पातळ ताक
तळण्यासाठी तेल
::::दही बनवण्यासाठी::::
दिड कप दही, ५-६ टेस्पून साखर, १ टिस्पून मिठ
::::वरून भुरभूरवण्यासाठी::::
मिरपूड, लाल तिखट, चाट मसाला

कृती:
१) उडीद डाळ पाण्यात ४-५ तास भिजत घालावी. ४-५ तासानंतर डाळ उपसून ठेवावी. आणि पाणी न घालता मिक्सरमध्ये बारीक वाटून घ्यावी. वाटलेले मिश्रण आपल्याला घट्टसर हवे आहे. पण अगदी गरज वाटल्यास थोडे पाणी घालावे. त्यात मिठ, ठेचलेले मिरं, आणि खोबर्‍याचे पातळ काप घालावेत.
२) वडे मध्यम आचेवर गोल आकारात किंवा मेदूवड्याच्या आकारात तळून घ्यावे. वड्यांचा आकार खुप मोठा ठेवू नये. काहीवेळेस वडे आतून कच्चे राहू शकतात.
३) पातळ ताकात थोडी साखर आणि किंचीत मिठ घालावे. यामध्ये तळलेले वडे साधारण अर्धा ते एक तास बुडवून ठेवावे.
४) तोवर वरून घालायचे दही तयार करून घ्यावे. वाडग्यात दही घ्यावे, रवीने नुसतेच घुसळून घ्यावे. मग किंचीत पाणी घालून आवश्यक तेवढा पातळपणा द्यावा. त्यात चवीनुसार साखर आणि मिठ घालावे. ढवळून घ्यावे. आणि थोडावेळ फ्रिजमध्ये गार करण्यास ठेवावे.
सर्व्ह करताना ताकात भिजवलेले वडे प्लेटमध्ये घालावेत. त्यावर दही घालून वरती चाट मसाला, मिरपूड, आणि लाल तिखट घालावे.

Labels:
Dahi Vada, Chat food, Indian Wedding Food, Dahi wada recipe, Indian Chat food

फडतरे यांची "कोल्हापूरी मिसळ" - Phadtare Misal

Phadtare's Kolhapuri Misal

कोल्हापूरातील फडतरे यांची मिसळ खुपच प्रसिद्ध आहे. मी त्यापद्धतीची मिसळ घरी बनवली होती. खुपच चविष्ट आणि चमचमीत पाककृती आहे.
त्याचा व्हिडीओ खाली दिला आहे. पण फडतरे यांनी hotel style सारखी जास्त प्रमाणावर हि मिसळ दाखवली आहे, म्हणून मी जशी मिसळ बनवली होती त्याचे प्रमाण दिलेले आहे.
पण त्यातील दोन चार जिन्नस (बडी इलायची, जाड मिठ, बेडगी मिरची तिखट, दगडफूल) घरात उपलब्ध नव्हते. त्यामुळे व्हिडिओ आणि खाली दिलेले प्रमाण याची सांगड घालून हि चविष्ट मिसळ नक्की करून पाहा.

वाढणी : ४ प्लेट

साहित्य:
::::बटाटा भाजी::::
२ ते अडीच कप बटाट्याच्या फोडी (शिजवून आणि सोलून)
३/४ कप कांदा (उभा चिरून)
२ टेस्पून तेल
फोडणीसाठी : १/४ टिस्पून मोहोरी, १/४ टिस्पून जिरे, १/२ टिस्पून हळद
३ ते ४ हिरव्या मिरच्या, बारीक चिरून
चवीपुरते मिठ
::::मटकी उसळ::::
३/४ कप मटकी (भिजवून मोड काढल्यावर दिड कप)
३/४ कप चिरलेला कांदा
१/२ कप चिरलेला टोमॅटो
१/२ टिस्पून हळद
२ टिस्पून लाल तिखट
१ टेस्पून धणेजिरे पूड
२ टिस्पून तेल
३/४ टिस्पून साखर
चवीनुसार मिठ
::::कट::::
४ टेस्पून तेल
३/४ कप उभा चिरलेला कांदा
१/२ कप चिरलेला टोमॅटो
१/२ टिस्पून हळद
२ टिस्पून लाल तिखट
१/४ कप ओला नारळ
गरम मसाला पेस्ट:
२ टेस्पून सुके खोबरे, ३ लवंगा, १ दालचिनीची लहान काडी, चिमूटभर जायफळ पूड, २ वेलची, ४ लसूण पाकळ्यांची पेस्ट, १ टिस्पून आलेपेस्ट, ३ हिरव्या मिरच्या, १ टिस्पून जिरे



Labels:
kolhapuri Misal, misal recipe, maharashtrian misal recipe, misal recipe video

मिनी उत्तप्पा - Mini Uttappa

Mini Uthappa (English Version)



साहित्य:
१/२ कप उडीद डाळ
सव्वा ते दिड कप तांदूळ
चवीपुरते मिठ
१ कांदा
१ टोमॅटो
१ टीस्पून मिरचीचा ठेचा (ऑप्शनल)
कोथिंबीर
१/२ वाटी तेल

कृती:
१) तांदूळ आणि उडीद डाळ पाण्यात साधारण ७-८ तास भिजत घालावे. नंतर मिक्सरमध्ये थोडे बारीक वाटून घ्यावे. मिश्रण एकदम पातळ किंवा घट्टं नसावे. मध्यमसरच वाटावे, त्यानुसार वाटताना पाणी घालावे. मिक्सरमध्ये डाळ व तांदूळ वाटताना १ चमचाभर मिठ घालावे.
२) वाटलेले मिश्रण आंबवण्यासाठी उबदार ठिकाणी किमान १०-१२ तास झाकून ठेवावे. जर वातावरण खुप थंड असेल तर ओव्हन २-३ मिनीटे प्रिहीट करून बंद करावा व मिश्रण झाकून ओव्हनमध्ये ठेवावे. तेवढ्या उबेवर पिठ आंबते. आवश्यकतेनुसार आंबवलेल्या पिठात मिठ घालावे.
३) पिठ आंबले कि कांदा पातळ आणि उभा चिरावा. कांद्याला थोडे मिठ चोळून घ्यावे. टोमॅटो बारीक चिरून घ्यावा.
४) नॉनस्टीक तवा गरम करावा. १/२ चमचा तेल घालावे. आंबवलेल्या पिठापैकी १ डाव पिठ तव्यावर घालून थोडे जाडसर पसरवावे. त्यावर चिरलेला कांदा, टोमॅटो, कोथिंबीर आणि आवडत असल्यास किंचीत मिरचीचा ठेचा लावावा.
५) मध्यम आचेवर तव्यावर झाकण ठेवून थोडी वाफ काढावी. एक बाजू शिजली कि सावकाशपणे कालथ्याने बाजू पलटावी कारण वरच्या बाजूवर आपण कांदा टोमॅटो घातले आहेत. दुसरी बाजू शिजू द्यावी. गरम गरम मिनी उत्तपा, सांबार आणि चटणीबरोबर सर्व्ह करावे.


टीप:
१) मसाला डोसा बनवताना जी बटाट्याची भाजी करतो ती भाजी, उत्तप्प्यावर कांदा टोमॅटो घालून एक वाफ काढली कि पसरवावी आणि हि बाजू शेकवावी. हा मसाला उत्तप्पाही मस्त लागतो.

Labels:
Mini Uttappa, Onion Uttappa, Tomato Uthappa, South Indian Recipe, Onion Tomato Uthappa