खजुराचे लाडू - Khajurache Ladoo

Dates Laddu in English

वेळ: १५ मिनिटे
१० ते १२ लहान लाडू

साहित्य:
२५ खजूर, बिया काढून (मिक्सरमध्ये भरडसर वाटून १ कप)
१/२ कप बदाम, भरडसर वाटून
१/२ कप किसलेले सुके खोबरे, गुलाबीसर भाजून
१ टेस्पून तूप
१ टीस्पून खसखस

कृती:
१) खजुराच्या बिया काढून खजूर मिक्सरमध्ये भरडसर वाटून घ्यावे. नॉनस्टिक पॅनमध्ये तूप गरम करावे त्यात खसखस घालून काही सेकंद परतावे. त्यात भरडसर वाटलेले बदाम, खोबरे आणि खजूर घालून मंद आचेवर गरम करावे.
२) नीट मिक्स झाले कि थाळीमध्ये काढून ठेवावे. हाताच्या तळव्यांना थोडे तूप लावून मिश्रण कोमटसर असतानाच लाडू बांधावेत.
शक्यतो एक ते दोन घासात संपेल इतपतच लाडूचा आकार असावा. खजूर उष्ण असतात एक लाडू आणि त्यावर ग्लासभर दुध प्यायल्यास शरीराला भरपूर उष्मांक मिळतात.

टीपा:
१) साध्या खजूराप्रमाणेच काळ्या खजूराचेही अशाप्रकारे लाडू करू शकतो.
२) मी फक्त बदामच वापरले होते. आवडीनुसार पिस्ता किंवा काजू असे सर्व मिळून अर्धा कप वापरू शकतो. जर जास्त ड्राय फ्रुट्स वापरायची असतील तर खजूराचे प्रमाणही वाढवावे. नाहीतर लाडू नीट बांधले जात नाहीत.
३) तुपाचे प्रमाण आवश्यकतेनुसार वाढवावे.
४) मी बदामाच्या रेडीमेड काप मिळतात ते वापरले होते. ते शक्यतो वापरू नयेत कारण लाडू बांधायला थोडे त्रासदायक पडते.
५) खजूराला ओलसरपणा असावा. कोरडे खडखडीत खजूर लाडवांसाठी चांगले लागत नाहीत.

रवा नारळाचे लाडू - Rava naralache ladu

Rava Coconut laddu in English

२२ ते २४ मध्यम लाडू
वेळ: ३० मिनीटे (मिश्रण आळायला लागणारा वेळ न धरता)

साहित्य:
२ कप बारीक रवा
१ कप खवलेला ताजा नारळ
दिड कप साखर
१ कप पाणी
३ ते ४ टेस्पून तूप
१/२ टिस्पून वेलची पूड
२५ बेदाणे

कृती:
१) रवा मध्यम आचेवर ४ मिनीटे कोरडाच भाजावा. तळापासून सारखे ढवळत राहावे जेणेकरून रवा जळणार नाही. [रंग बदलेस्तोवर भाजू नये, अगदी हलकेच भाजावे. नंतर परत रवा भाजायचा आहे.]
२) भाजलेला रवा परातीत काढावा. त्यात खवलेला नारळ घालावा आणि मिसळावे. नारळातील ओलसरपणा रव्यात उतरेस्तोवर (१० मिनीटे) तसेच ठेवावे.
३) कढई गरम करून त्यात तूप घालावे. तूप वितळले कि रवा-नारळाचे मिश्रण घालावे. ८ ते १० मिनीटे मिश्रण मिडीयम-हाय फ्लेमवर भाजावे. सतत तळापासून ढवळावे. काही वेळाने रवा आणि तूपाचा छान वास येईल. रव्याचा रंग हलका बदामी होईस्तोवर भाजावे. भाजलेले मिश्रण परातीत काढून ठेवावे.
४) साखर आणि पाणी एकत्र करून एकतारी पाक करावा. मिश्रण उकळायला लागले कि साधारण ३ ते ४ मिनीटांनी पाकाचा थेंब पहिले बोट आणि अंगठा यात पकडून उघडझाप करावी. जर एक तार दिसली कि पाक तयार आहे असे समजावे [हि तार अगदी सेकंदभरच दिसेल]. किंवा एकतारी पाक ओळखता येत नसेल. मिश्रण उकळायला लागले कि ३ ते ४ मिनीटात एकतारी पाक तयार होतो. पाक तयार झाला कि गॅस बंद करावा.
५) लगेच पाक रवा-नारळाच्या मिश्रणात ओतावा. मिक्स करावे. मिश्रण सुरूवातीला पातळ दिसेल पण काहीवेळाने घट्ट होईल. यात वेलचीपूड घालावी. मिश्रण आळेस्तोवर मधेमधे मिक्स करत राहावे.
मिश्रण आळले कि लाडू बनवावेत. प्रत्येक लाडवावर एकेक बेदाणा लावावा.

टीपा:
१) हे लाडू फार काळ टिकत नाहीत, जास्तीत जास्त ७-८ दिवस टिकतील. उष्ण आणि दमट हवामानात ३-४ दिवसच टिकतील. अशावेळी २-३ दिवसांनी लाडू फ्रिजमध्ये ठेवावे.
२) रवा साधारण ३ प्रकारचा मिळतो. जाड (coarse), बारीक (fine), एकदम बारीक (super fine). वरील रेसिपीसाठी बारीक रवा वापरावा. जाड रव्यामुळे लाडू चरचरीत लागतात. एकदम बारीक रवा पिठासारखाच दिसतो त्यामुळे रवा लाडूसाठी योग्य नसतो.
३) लाडूचे मिश्रण जर कोरडे झाले तर एकतारी पाक जरा जास्त आटल्याने दोन तारी किंवा तीन तारी झाला असावा. अशावेळी १/२ कप पाणी + ३ टेस्पून साखर असे मिश्रण उकळवावे. ३ ते ४ मिनीटे उकळवून पाक लाडू मिश्रणावर ओतावा. मिक्स करून मिश्रण आळले कि लाडू करावे.
४) आवडीनुसार सुका मेव्याचे तुकडे घालावे.
५) नारळाचा फक्त पांढरा भाग घ्यावा. करवंटीकडील काळपट भाग घेऊ नये.

मेथीचे लाडू - Methi Ladu

Methi Ladu in English

२५ मध्यम लाडू
वेळ: दिड ते २ तास

साहित्य:
१ कप गव्हाचे पिठ
२ कप सोयाबिन पिठ
१ कप काजू पावडर
१ कप खारीक पावडर
१/२ कप बदाम पावडर
१/२ कप पिस्ता पावडर
२ कप सुकं खोबरं, किसून भाजलेले
५० ग्राम डिंक पावडर
५० ग्राम मेथी
दोन ते अडीच कप गूळ, किसलेला
अंदाजे १/२ किलो तूप

मेथीचे लाडू पाककृती २ - साखर घातलेले मेथीचे लाडू

कृती:
१) कढई चांगली तापवावी. नंतर गॅस बंद करावा व तेवढ्याच उष्णतेवर मेथी भाजून घ्यावी. या मेथीची पूड करावी.
२) साधारण दिड ते दोन कप गरम तूप घ्यावे. यामध्ये मेथी पावडर आणि डिंक पावडर १५ मिनीटे फेसावे. असे १ दिवसाआड ८ दिवस फेसावे. फेसल्याने मेथीचा कडूपणा कमी होतो.
३) काजू, पिस्ता, बदाम, खारीक पावडर प्रत्येकी १ टेस्पून तूपावर भाजावे.
४) गव्हाचे पिठ आणि सोयाबिनचे पिठ थोड्या तूपावर भाजून घ्यावे. (महत्त्वाची टिप पहा)
५) वरील सर्व जिन्नस एकत्र करावे. (काजू-पिस्ता-बदाम-खारीक यांची पावडर, भाजलेले खोबरे, फेसलेले डिंक आणि मेथी, भाजलेले गहू-सोयाबिन पिठ)
६) गूळ पातेल्यात घ्यावा त्यात २ ते ३ चमचे पाणी घालावे. गूळ वितळेस्तोवर कढईत गरम करावा. गूळ वितळला कि गॅस बंद करावा. त्यात वरील एकत्र केलेले जिन्नस मिक्स करावे आणि लाडू वळावे.

टीप:
१) जर शक्य असेल तर अख्खे गहू आणि सोयाबिन तूपावर भाजून त्याचे पिठ करावे.
२) लाडू वळताना मिश्रण थोडे अजून ओलसट हवे असेल तर तयार मिश्रणात गरजेपुरते पातळ गरम तूप घालावे. मिक्स करून लाडू वळावेत.

डिंकाचे लाडू - Dinkache Ladu

Dinkache Ladu in English

वेळ: साधारण दिड तास
नग: साधारण २५ ते २८ मध्यम लाडू

साहित्य:
२०० ग्राम डिंक
तूप - साधारण १/२ किलोला थोडे कमी
१ कप मूगाचे पिठ
१ कप सोयाबिन पिठ
३/४ कप भरडसर वाटलेले बदाम
३/४ कप भरडसर वाटलेले काजू
३/४ कप भरडसर वाटलेले पिस्ता
१ कप खारीक पावडर
१/४ कप बेदाणे
१ कप सुके खोबरे
एका जायफळाची पावडर
३/४ किलो मऊ गूळ

कृती:
१) २०० ग्राम डिंक १/४ किलो तूपात तळावा. डिंक तळून उरलेल्या तूपात मूगाचे व सोयाबिनचे पिठ भाजून घ्यावे.
२) भरडसर वाटलेले बदाम, काजू पिस्ता आणि खारीक, प्रत्येकी एकेक चमचा तूपावर मंद आचेवर भाजून घेणे.
३) सुकं खोबरं कोरडंच भाजावं. जायफळ बारीक किसणीवर किसून घ्यावे.
४) तळलेला डिंक, भाजलेले सोयाबिन-मूगाचे पिठ, भाजलेला सुका मेवा, बेदाणे, भाजलेले खोबरे आणि जायफळ पूड एकत्र करून घ्यावे.
५) कूकरच्या तळाला १ भांडं पाणी घालावे. गूळ किसून कूकरच्या आतल्या डब्यात पाणी न घालता ठेवावा आणि डबा उघडाच ठेवावा. कूकर बंद करून २ शिट्ट्या होवू द्यावा. वाफ जिरली कि गरम गूळ एका परातीत घालावा. त्यामध्ये एकत्र केलेले जिन्नस (स्टेप क्रमांक ४) घालावे. सर्व एकत्र मिक्स करून लाडू वळावेत.

टीप:
१) गूळ कूकरमध्ये शिजवला कि त्याचा पाक करावा लागत नाही. जर कूकरमध्ये गूळ शिजवणे जमणार नसेल तर जाड बुडाच्या कढईत किसलेला गूळ आणि २ ते ३ टेस्पून पाणी घालून गूळ पूर्ण वितळू द्यावा. या पाकात जिन्नस घालावे आणि लाडू वळावे.
२) गूळ कूकरमध्ये शिजवला कि ५ मिनीटात कूकर उघडून गरम गूळच वापरावा.

कणकेचे लाडू - Kanakeche Ladu

Wheat Flour Laddu in English

५ ते ८ मध्यम लाडू
वेळ: २० मिनीटे

साहित्य:
१ कप कणिक
१/२ कप तूप
१/२ ते ३/४ कप किसलेला गूळ
१/२ टिस्पून वेलचीपूड

कृती:
१) तुपावर कणीक मध्यम आचेवर खमंग भाजावी.
२) कणकेचा रंग किंचीत बदलला कि गॅस मंद करून गूळ आणि वेलचीपूड घालावा. आणि निट मिक्स करावे.
३) मिश्रण गरम असतानाच लाडू वळावेत.

टीप:
१) हे लाडू अजून पौष्टिक करण्यासाठी गूळाबरोबर १ चमचा खारीकपूड, १ चमचा बदामपूड १ चमचा भाजलेले सुके खोबरे घालावे आणि मग लाडू वळावेत. हे जिन्नस घातल्यास थोडे तुपाचे प्रमाण वाढवावे.

रवा बेसन लाडू - Rava Besan Ladu

Rava Besan Ladu in English

१२ ते १५ लाडू, मध्यम आकाराचे
वेळ: ३० ते ४० मिनीटे (पाक मुरायला कमीतकमी २० मिनीटे आणि जास्तीत जास्त २ तासही लागू शकतात)

साहित्य:
१ कप बारीक रवा
१/२ कप बेसन
४ टेस्पून तूप
१ कप साखर
१/२ कप पाणी
१/२ टिस्पून वेलचीपूड
बदाम काजूचे पातळ काप

कृती:
१) बारीक रवा मध्यम आचेवर कोरडाच भाजावा. गुलाबीसर रंग येऊ द्यावा. तसेच भाजताना सतत कालथ्याने उलथत राहावा. मोठ्या आचेवर भाजल्यास रंग पटकन येईल पण रवा कच्चाच राहिल.
२) रवा भाजला कि परातीत काढून ठेवावा. त्याच कढईत तूप घालून, मध्यम आचेवर बेसन खमंग भाजून घ्यावे. बदाम काजूचे काप घालावे.
३) दुसर्‍या पातेल्यात १ कप साखर आणि १/२ कप पाणी घालून एकतारी पाक करावा. एकतारी पाक करण्यासाठी साखर पाणी एकत्र करावा एक उकळी येऊ द्यावी. उकळी आली कि मिश्रण फेसाळेल आणि फेस कमी झाला कि अर्ध्या मिनीटात लगेच गॅस बंद करावा आणि हा पाक रवा आणि बेसनाच्या मिश्रणात घालावा. कालथ्याने ढवळावे आणि झाकून ठेवावे. १५-२० मिनीटांनी मिश्रण ढवळावे. वेलचीपूड घालावी. हळू हळू मिश्रण आळेल आणि लाडू वळण्याइतपत घट्ट झाले कि लगेच लाडू वळावेत.

टीप:
१) पाक व्यवस्थित जमला पाहिजे, पाक गरजेपेक्षा थोडाजरी दाट झाला कि मिश्रण कोरडे होते. मी लाडू बनवले तेव्हा मिश्रण पटकन आळले आणि जरा कोरडे झाले तेव्हा मी थोडे दुध घालून लाडू वळले. छान झाले आणि ८ दिवस टिकलेसुद्धा. जर दमट हवेच्या ठिकाणी राहात असाल आणि लाडू वळताना दुध घातले असेल तर शक्यतो लाडू बनवल्यावर दुसर्‍या दिवशी फ्रिजमध्ये ठेवावेत.

बेसन लाडू (बिनपाकाचे) - Besan Ladu

Besan Ladu in English

१० ते १२ मध्यम आकाराचे लाडू
वेळ: साधारण १ तास (प्रमाण दुप्पट केल्यास ३० ते ४० मिनीटे अधिक)

बेसन लाडू, साखरेचा पाक करूनही बनवता येतात, त्या रेसिपीसाठी इथे क्लिक करा - पाकातले बेसन लाडू

साहित्य:
दिड कप बेसन
साधारण पाऊण कप तूप (वितळवलेले)
३/४ कप पिठी साखर (किंवा गरजेनुसार)
१/२ टिस्पून वेलचीपूड
३ टेस्पून दूध
बेदाणे किंवा सुकामेव्याचे तुकडे आवडीनुसार

कृती:
१) बेसन तूपामध्ये मध्यम आचेवर खमंग भाजून घ्यावे (साधारण ३५ ते ४० मिनीटे). भाजताना सारखे ढवळत राहावे. तूपात बेसन घातल्यावर आधी घट्ट होईल आणि साधारण ५ ते ७ मिनीटांत पातळ व्हायला लागेल. पातळ झाले तरी काळजी करू नये.
२) दुध न घालता:
बेसन छान बदामी रंगावर भाजले गेले कि गॅस बंद करावा. बेसन पूर्ण गार होवू द्यावे. साधारण २ तास तरी साखर घालू नये. नंतर त्यात आवडीप्रमाणे सुकामेवा, वेलचीपूड आणि गरजेनुसार साखर घालावी. निट मिक्स करून लाडू वळावेत. कधी कधी लाडूचे पिठ पातळ झाल्यासारखे वाटते आणि लाडू बसतात. पण काही तासांनी लाडू वळले कि छान होतात.

तरीही बेसन गरम असतानाच थोडे दुध घातले तर शक्यतो लाडू चुकत नाहीत. त्याची कृती पुढीलप्रमाणे.
२) दुध घालून:
बेसन व्यवस्थित भाजले गेले आणि खमंग वास आला कि गॅस बंद करावा आणि दुधाचा हबका मारावा. यामुळे बेसन चांगले फुलेल (आधी फसफसेल) आणि घट्टसर होईल. हे बेसन लगेच दुसर्‍या भांड्यात काढून ठेवावे. साधारण २० मिनीटांनी यात सुका मेवा, वेलचीपूड आणि साखर घालून हलके मळून ठेवून द्यावे. गार झाले कि लाडू वळावेत.

टिप:
१) हे लाडू १५ ते २० दिवस सहज टिकतात. फक्त बेसन गरम असतानाच दुधाचा हबका मारावा.

Labels:
Besan Ladu, Besanache ladoo

अळिव लाडू - Alivache ladu

Alivache ladu in English

वाढणी: साधारण ६ ते ७ मध्यम लाडू


साहित्य:
१/८ कप अळीव (अळीव कुठे मिळतील? - टीप १)
१/४ कप दूध
३/४ कप गूळ
१ कप ओला नारळ

कृती:
१) अळीव गार दुधात ३-४ तास भिजत घालावेत. ३ ते ४ तासात अळीव छान फुगून येतील.
२) भिजवलेले अळीव, गूळ आणि नारळ एकत्र करून कढईत मध्यम आचेवर शिजवत ठेवावेत. मिश्रण कडेने सुटू लागले आणि मिश्रण दाटसर झाले कि लाडू वळावेत.

टीप
१) अळीव भारतामध्ये किराणा मालाच्या दुकानात मिळू शकतील. भारताबाहेर इंडीयन स्टोअर्समध्ये मिळेल.

Labels:
Healthy laddus, Aliv Ladu, Alivache Laadu

गुलकंद बर्फी Gulkand Barfi

Gulkand Burfi in English

वाढणी: साधारण १० ते १२ वड्या

साहित्य:
सव्वा कप खवा ( रिकोटा चिजपासून खवा)
१/४ ते १/२ कप साखर
३ टेस्पून गुलकंद
१ टिस्पून तूप










कृती:
१) रिकोटा चिजपासून खवा बनवण्याची कृती
२) १/२ टिस्पून तूप नॉनस्टिक पॅनमध्ये गरम करावे. त्यात खवा मध्यम आचेवर भाजून घ्यावा. साधारण ६-७ मिनीटे. नंतर त्यात साधारण १/४ ते १/२ कप साखर घालून मिक्स करावे. साखर अंदाज घेतघेत घालावी कारण गुलकंदातही साखर असते. अशावेळी चमचा साखर घालावी आणि चव घेवून पाहावे. मंद आचेवर मिश्रण दाटसर होवू द्यावे.
३) खवा घट्टसर झाला कि गॅस बंद करावा. अंदाजे १/३ मिश्रण काढून घ्यावे. पोळपाटाला किंवा एका ताटाला तूपाचा हात लावून त्यावर हे मिश्रण चौकोनी आकारात साधारण १ सेमी उंचीचे थापावे. वार्‍यावर थंड होवू द्यावे.
४) उरलेल्या २/३ खव्यात २-३ टेस्पून गुलकंद घालून निट मिक्स करावे. मंद आचेवर २-३ मिनीटे परतावे. या मिश्रणाचा गोळा हाताळण्यायोग्य झाला कि चौकोनी आकारात थापलेल्या खव्याच्या वर त्याच आकारात गुलकंदयुक्त खवा थापावा.
थंड झाले कि वड्या पाडाव्यात.

टीप:
१) मी वापरलेले गुलकंद वेलचीयुक्त होते म्हणून मी खवा परतताना वेलची घातली नव्हती. जर गरज वाटल्यास वेलची घालावी.
२) वड्या थापताना खुप तूप वापरू नये नाहीतर वड्या खुप तूपकट होतात.
३) मिश्रण थापताना हाताला खुप गरम लागत असेल तर जाडसर प्लास्टिकच्या तुकड्याला थोडे तूप लावून मिश्रण थापण्यासाठी वापरावा.

Labels:
Gulkand Barfi, Burfi mithai recipe, sweets Indian, Diwali Sweets

शिंगाडा पिठाचे लाडू - Shingada Pithache Ladu

Shingada Flour Laddoo in English

हे लाडू करायला सोप्पे आणि चविष्ट असतातच तसेच उपवासालाही चालतात.

वाढणी : ५ ते ६ लाडू


साहित्य:
१/४ कप घट्ट तूप (पातळ असेल तर १/४ कपपेक्षा जास्त आणि १/२ कपपेक्षा थोडे कमी)
१/२ कप शिंगाडा पिठ
१/२ कप साखर
१/२ टिस्पून वेलचीपूड
१ टेस्पून खारीक पूड (ऐच्छिक)
१ टेस्पून सुकं भाजलेले खोबरे (ऐच्छिक)

कृती:
१) कढईत तूप गरम करून त्यात शिंगाडा पिठ खमंग भाजून घ्यावे. शेवटी सुके खोबरे आणि खारीकपूड घालून एखाद मिनीट परतावे.
२) भाजलेले पिठ गरम असतानाच त्यात साखर, वेलचीपूड घालून लाडू वळावेत.

Label:
laadu recipe, Laddu recipe, Shingada Pithache ladu, Upvas recipe, Fasting recipe

नारळाचे लाडू - Naralache Ladu

Coconut ladu in English

सोपे आणि पटकन होणारे लाडू..

वाढणी : साधारण ८ छोटे लाडू

साहित्य:
२ कप खवलेला ताजा नारळ
१/२ कप साखर
१/२ कप दूध
१/२ टिस्पून वेलचीपूड
२ टेस्पून बदामाचे काप

कृती:
१) एका पातेल्यात खवलेला नारळ आणि दूध एकत्र करावे. मध्यम आचेवर उकळत ठेवावे.
२) घट्टसर होत आले कि साखर घालावी. पातेल्याच्या तळाला नारळ चिकटू नये म्हणून ढवळत राहावे.
३) वेलचीपूड आणि बदामाचे काप घालावे. मिश्रण घट्टसर होत आले कि गॅस बंद करावा आणि पातेले गॅसवरून उतरवावे.
४) मिश्रण थोडे कोमटसर होवू द्यावे. गरज पडल्यास थोडा तुपाचा हात घेऊन लाडू वळावेत.

टीप:
१) हे लाडू नरमसर होतात. जर थोडा घट्टपणा हवा असेल तर थोडावेळ फ्रिजमध्ये ठेवावेत आणि मग खावेत.

Labels: laddu recipe, coconut laddu recipe, naralache ladu, naral ladu

मूग डाळीचे लाडू - Moogdal ladu

Moog Dal Ladu

साहित्य:
२ वाट्या रवाळ मूग डाळ पिठ (पिवळी मूगडाळ)
(मूग डाळ किंचीत जाडसर दळून आणायची)
१ वाटी तूप
१ वाटी पिठीसाखर
१/२ वाटी दूध
१ लहान चमचा वेलचीपूड
आवडीनुसार बेदाणे बदाम,पिस्ता यांचे काप

कृती:
१) मूगडाळ जराशी रवाळ दळून आणायची. १ वाटी तूप पातेल्यात गरम करायचे. त्यात २ वाट्या मूगडाळीचे पिठ मध्यम आचेवर खमंग भाजायचे.
२) पिठाचा रंग बदलला आणि खमंग भाजले गेले कि त्यावर १/२ वाटी दूधाचा हबका मारावा व ढवळावे. गॅस बंद करून पातेले खाली उतरवावे.
३) भाजलेले पिठ कोमटसर झाले कि त्यात १ वाटी पिठी साखर घालावी. बर्याचदा मिक्स करताना पिठी साखरेची गोळी होते त्याची निट काळजी घ्यावी. निट मिक्स करावे. वेलची पूड, सुकामेवा घालावा व लाडू वळावे.

टीप:
१) जर लाडू अजून पौष्टीक हवे असतील तर मूगडाळ सालीसकट दळावी.
२) या लाडवांसाठी आपण हिरवी किंवा पिवळी कोणतीही मूगडाळ वापरू शकतो.

चकली

पाकातले बेसन लाडू - Besan Ladu

Besan Ladu (English Version)



बेसनाचे लाडू पाक न करता हि बनवता येतात. बिन पाकाच्या बेसन लाडूच्या कृती साठी या लिंकवर क्लिक करा
बिन पाकाचे बेसन लाडू (Easy Besan Ladoo Recipe in English)

साहित्य:
१ वाटी बेसन
१/२ वाटी साजूक तूप
पाऊण वाटी साखर
अर्धी वाटी पाणी
वेलची पूड
बेदाणे

कृती:
१) तूप पातेल्यात गरम करावे त्यात बेसन घालून मध्यम आचेवर खमंग भाजावे. बेसन गॅसवरून उतरवावे.
२) पाणी आणि साखर एकत्र गरम करत ठेवावे व त्याचा एकतारी पाक करावा.
३) तयार झालेला पाक गरम असतानाच भाजलेल्या बेसनात घालून ढवळावे. ढवळताना बेसनाची गोळी होण्याची शक्यता असते. त्याची काळजी घ्यावी.
४) हळूहळू पाक बेसनात मुरतो. मध्येमध्ये मिश्रण ढवळत राहावे. मिश्रणात वेलची पूड घालावी.मिश्रण थोडे घट्टसर झाले कि लाडू वळावेत. लाडू वळताना त्यावर एक एक बेदाणा लावावा.

टीप :
१) वरील कृतीमध्ये तूप बेताचेच घातले असल्याने मिश्रण पटकन आळते त्यामुळे मिश्रणावर लक्ष ठेवावे. मिश्रण जास्त आळले तर लाडू वळता येत नाहीत.

Labels:
Besan Recipes, besan laddu recipe, chickpea flour recipe, Indian sweets recipe, Indian sweet

चुरमुर्याचे लाडू - Churmura ladu

churamuryache Ladu (English Version)

चुरमुर्याचे लाडू करायला अतिशय सोपे, झटपट होणारे आणि चवीलाही मस्त लागतात.

साहित्य:
५ ते साडे पाच वाट्या चुरमुरे
१ वाटी चिक्कीचा गूळ

कृती:
१) पातेल्यात चिक्कीच्या गूळ घालावा. गूळाचा पाक होवून उकळायला लागला कि लगेच त्यात चुरमुरे घालून ढवळावे.
२) मिश्रण गरम असतानाच लाडू वळावेत.

टीप:
१) साध्या गुळाचेसुद्धा लाडू चांगले होतात पण चिक्कीच्या गुळाचा खमंगपणा त्यांना येत नाही.
२) साध्या गुळाचे जर लाडू बनवले तर १ वाटी गूळाला ३ ते साडेतीन वाट्या चुरमुरे घ्यावे.
३) साध्या किंवा भडंगाच्या चुरमुर्याचे लाडू चवीला सारखेच लागतात पण साध्या चुरमुर्यापेक्षा भडंगाच्या चुरमुर्याचे लाडू दिसायला आकर्षक असतो.
४) आवडत असल्यात भाजलेल्या शेंगदाण्याचे तुकडे, थोडे डाळं घालू शकतो.

Labels:
Laddu recipe, Maharashtrian Laddu, Indian Laddu recipe, Laddu recipe, Indian Sweets Laddu recipe

तिळगुळाचे लाडू - Tilgul

Tilgulache Ladu (English version)

तुम्हा सर्वांना मकर संक्रांतीच्या हार्दिक शुभेच्छा
तिळगूळ घ्या गोड गोड बोला !!

साहित्य:
१/२ किलो तिळ
१/२ किलो चिकीचा गूळ
१ ते दिड वाटी शेंगदाण्याचा भरडसर कूट
१ वाटी किसून भाजलेले सुके खोबरे
१/२ वाटी चण्याचं डाळं
१ चमचा वेलची पूड
१ ते २ चमचे तूप

कृती:
१) १/२ किलो तिळ व्यवस्थित भाजून घ्यावेत. पातेल्यात चिकीचा गूळ घ्यावा. थोडे तूप घालावे. गूळाचा गोळीबंद पाक करावा. सतत ढवळत राहावे, गूळ पूर्ण पातळ झाला कि थोड्या वेळाने तो फेसाळतो.
पाक गोळीबंद झाला आहे कि नाही हे पाहण्यासाठी गूळाचा पाक फेसाळला कि गॅस बारीक करावा. एका वाटीत गार पाणी घ्यावे. त्यात एक थेंब पाक घालावा. बोटाने तो पाक हातात घेऊन त्याची गोळी करावी आणि वाटीतल्या पाण्यात तो गोळा खडा मारल्यासारखा टाकावा. जर वाटीचा "टण्णं" असा आवाज आला तर पाक तयार आहे असे समजावे.
२) पाक गोळीबंद झाला कि त्यात भाजलेले तिळ, दाण्याचा कूट, भाजलेले सुके खोबरे, चण्याचे डाळं, वेलची पूड घालून निट ढवळावे, आणि गरम असतानाच लाडू वळावेत. लाडू वळताना हाताला थोडे तूप लावावे ज्यामुळे गरम मिश्रण हाताला चिकटणार नाही.

टीप:
१) लाडूंमध्ये आवडत असल्यास काजूतुकडा किंवा ईतर सुकामेवा घालू शकतो.

Labels:
Sesame Laddu, Tilache Ladu, Makarsankranti Ladu, Tilgulache Ladu Recipe

मेथीचे लाडू - Methiche Ladu

Methiche Ladu In English

साहित्य:
५० ग्राम मेथी पावडर
२ वाट्या गव्हाचे पिठ (कणिक)
१ वाटी किसलेले सुके खोबरे
१ वाटी खारीक पावडर
५० ग्राम डिंक (ऑप्शनल)
५० ग्राम खसखस (कोरडी भाजावी व पावडर करावी)
अडीच वाट्या पिठी साखर
अडीच वाट्या तूप
बेदाणा काजूतुकडा ईतर सुकामेवा (ऑप्शनल)
वेलची पूड

मेथीचे लाडू पाककृती २ - गूळ घालून मेथीचे लाडू

कृती:
१) खसखस भाजून त्याची पावडर करून घ्यावी.
२) वरील दिलेल्या तूपातील १/२ वाटी तूप गरम करावे. त्यात मेथी पावडर किमान १२-१५ तास भिजवून ठेवावी.
३) सुके खोबरे किसून भाजून घ्यावे.
४) २ वाट्या तूप कढईत घालून त्यात डिंक तळून घ्यावा. डिंक बाजूला काढून उरलेल्या तूपात गव्हाचे पिठ खमंग भाजून घ्यावे. गॅस बंद करून त्यात भिजवलेली मेथी पावडर, खारीक पावडर, खसखस पावडर, किसून भाजलेले खोबरे, वेलची पूड, सुकामेवा, तळलेला डिंक, पिठीसाखर घालून मिश्रण गरम असतानाच त्याचे लाडू वळावे.

टीप:
१) काही जणांना जास्त तूपाचे लाडू आवडतात तर कणिक भाजताना त्यात अर्धा वाटी गरम तूप वाढवावे.
२) गव्हाच्या पिठाऐवजी आवडीनुसार सोयाबिन पिठ किंवा मुगाचे पिठही वापरू शकतो.

रव्याचे लाडू - Rava Ladu

Rava Ladu in English

१५ मध्यम लाडू

साहित्य:
२ वाट्या बारीक रवा
१ वाटी पाणी
दिड वाटी साखर
१/२ वाटी साजूक तूप
१ लहान चमचा वेलची पूड

कृती:
१) प्रथम रवा मध्यम आचेवर तूपावर भाजून घ्यावा. खमंग वास आला कि गॅसवरून उतरवावा.
२) पातेल्यात साखर आणि पाणी एकत्र करून एकतारी पाक करून घ्यावा. (किंवा साखरेचा पाक पारदर्शक झाला कि एक उकळी काढून लगेच उतरवावा.) भाजलेल्या रव्यात पाक ओतावा. गुठळ्या न होता मिक्स करावे. त्यात वेलची पूड घालावी.
३) हे रव्याचे आणि साखरेचे मिश्रण झाकून ठेवावे. काही तासांनी मिश्रण आळते. मग लाडू वळावेत.

टीप:
१) जर लाडवाचे मिश्रण फळफळीत झाले तर अर्धी वाटी पाणी लहान पातेल्यात उकळावे. त्यात २-३ चमचे साखर घालावी. पाक बनवून तो मिश्रणात घालावा. मिक्स करावे. थोड्या वेळाने लाडू वळावेत.
२) रव्याच्या लाडवांसाठी शक्यतो बारीक रवा घ्यावा.

Labels:
Semolina Laddu Recipe, Indian Laddu Recipe, Indian Sweets recipe, Mithai recipe

आले बटाटा वडी - Alepak

Alepak in English

सध्या थंडीचे दिवस आहेत त्यामुळे आल्याचा (जिंजर) भरपूर वापर घरात होतो. आल्याच्या वड्या, आल्याचा चहा बर्याचदा केले जातात. या वड्या नेहमीच्या आलेवड्यांपेक्षा मऊ असतात. करायला सोप्या आणि चवीलाही छान.

साहित्य:
(मेजरमेंटसाठी जर मेजरमेंट कप उपलब्ध असतील तर १/४ कपचे जे माप आहे त्या प्रमाणात पुढील जिन्नस घेतले तर साधारण २० मध्यम आकाराच्या वड्या पडतील.)
१ मध्यम वाटी किसलेले आले (चेपून भरून)
२ मध्यम वाट्या साखर
१/२ मध्यम वाटी पिठी साखर
१/२ मध्यम वाटी दूध
१ चमचा साजूक तूप
२ मध्यम वाट्या शिजवलेल्या बटाट्याचा किस
वेलची पूड
सजावटीसाठी बदामाचे काप (ऑप्शनल)

कृती:
१) कढईत किंवा नॉनस्टीक फ्राईंग पॅनमध्ये किसलेले आले + २ वाट्या साधी साखर + तूप + दूध एकत्र करावे. हाय गॅसवर ढवळत राहावे.
२) आळत आले कि शिजवलेल्या बटाट्याचा किस घालावा. ढवळत राहावे. मिश्रण घट्टसर झाले कि मध्यम आचेवर त्यात पिठी साखर घालावी.
३) मिश्रण वड्या पाडता येतील एवढे दाटसर झाले त्यात वेलचीपूड घालावी. ढवळून घ्यावे.
४) स्टिलच्या ताटाला तूपाचा हात लावून घ्यावा त्यावर मिश्रण समान थापून घ्यावे. सजावटीसाठी बदामाचे काप घालावे. थंड झाल्यावर वड्या पाडाव्यात.

टीप:
१) वेलचीपूडऐवजी जायफळ पावडरनेसुद्धा छान स्वाद येतो.
२) मिश्रण व्यवस्थित दाट झाल्यावरच ताटात थापावे नाहीतर वड्या चिकट होण्याचा संभव असतो.
३) वड्या लगेच डब्यात भरू नये काही तास मोकळ्या हवेत उघड्याच ठेवाव्यात.

Labels:
Ale Batata Vadi, Ale Pak recipe, Ginger Candy

नारळाच्या वड्या - Naralipak

नारळाच्या वड्या

वाढणी : २० ते २५ वड्या



साहित्य:
१ नारळ
३५० ग्रॅम साखर
तूप
वेलची पूड

कृती :
१) एक नारळ खवून घ्यावा. नारळ खवताना त्यातील काळपट भाग घेऊ नये.
२) नंतर कढईमध्ये दोन ते तीन चमचे तूप घ्यावे. तूप गरम झाल्यावर त्यात खवलेला नारळ घालावा.
३) मंद आचेवर थोडासा परतून घ्यावा.
४) २-३ मिनिटानंतर साखर घालून परतावे. हळूहळू साखर वितळू लागेल. मंद आचेवर ढवळत राहावे.
५) छोटा अर्धा चमचा वेलचीच पूड घालावी. हळूहळू मिश्रण घट्ट होऊ लागते.
६) एका परातीला तूप लावून घ्यावे आणि मिश्रण त्यात ओतावे. एका वाटीच्या तळाला तूप लावावे आणि मिश्रण पूर्ण परातीत समान पसरावे. अर्ध्या इंचाचा थर करावा.
७) मिश्रण गरम असतानाच सुरीने हलक्या हाताने वड्या पाडाव्यात. नाहीतर मिश्रण थंड झाल्यावर वड्या नीट पडत नाहीत.
८) मिश्रण थंड झाले की वड्या वेगवेगळ्या कराव्यात.

टिप:
१) वड्यांना केशरी रंग हवा असल्यास थोडे केशर किंवा खायचा केशरी रंग घालू शकतो.
२) जर आंब्याचा रस उपलब्ध असेल तर साखर घालताना थोडी साखर कमी करून थोडा आंबा रस घालावा. नारळ आणि आंबा एकत्र स्वाद अप्रतिम लागतो.

नारळाच्या वड्यांची रेसिपी मनोगत दिवाळी अंक २००७ मध्ये छापून आली होती.

पेढे - Pedha

Pedhe in English

पेढा बनवायला खवा लागतो. जर तयार खवा उपलब्ध असेल तर उत्तमच, पण जर उपलब्ध नसेल तर रिकोटा चिजपासून खवा बनवता येतो. खाली दिलेली पेढ्याची कृती हि रिकोटा चिजपासून खवा आणि त्या खव्यापासून पेढे कसे बनवावेत याची आहे.
साहित्य:
४२५ ग्राम रिकोटा चिज अथवा २०० ग्राम खवा
१ चमचा साजूक तूप
१ कप दूध
१०० ग्राम साखर
२ चिमूट केशर
१ लहान चमचा वेलची पावडर
बारीक चिरलेले बदाम, पिस्ता

कृती:
१) सर्वात प्रथम रिकोटा चिजपासून खवा बनवून घ्यावा लागतो. त्यासाठी नॉनस्टीक फ्राईंग पॅनमध्ये तूप घालावे, तूप पातळ झाले कि रिकोटा चिज घालावे. अगदी मध्यम आचेवर परतावे. सुरूवातीला चिज पातळ होते. रिकोटा चिज सारखे ढवळत राहावे, तळाला चिकटणार नाही याची काळजी घ्यावी. हळूहळू रिकोटा चिज घट्ट होवून त्याचा खवा तयार होतो. या कृतीत रिकोटा चिज आळत जाते. मी खवा केला तेव्हा ४२५ ग्राम रिकोटा चिजचा २०० ग्राम खवा तयार झाला होता. या कृतीला अंदाजे २५-३० मिनीटांचा कालावधी लागतो. खवा थंड झाला कि मळून घ्यावा.
२) पेढा करण्याआधी दूधात केशर मिक्स करून ठेवावे. तयार खवा नॉनस्टीक फ्राईंग पॅनमध्ये घ्यावा त्यात साखर घालावी. मध्यम आचेवर ढवळत राहावे. ५-७ मिनीटात साखर आणि खवा यांचे पातळसर मिश्रण तयार होते. त्यात दूध घालावे. आणि मिडीयम लो गॅसवर सारखे ढवळत राहावे. मिश्रण जरा घट्ट झाले त्यात वेलची पावडर घालावी. जवळ जवळ २८-३० मिनीटांनी पेढ्यांसाठी घट्ट गोळा तयार होतो.
३) मिश्रण अगदी थोडा वेळ निवळू द्यावे, शक्यतो मिश्रण गरम असतानाच पेढे वळावेत. हातांच्या तळव्यांना थोडे तूप लावून पेढे वळावेत. सजावटीसाठी पेढ्यांना वरती बदाम, पिस्त्याचे काप लावावेत.

टीप:
१) पेढे जर पिवळ्या रंगाचे हवे असतील त्यात खायचा रंग घालावा.
२) पेढे ५-६ दिवस फ्रिजमध्ये व्यवस्थित टिकतात. पेढे बनवल्यावर दोन एक दिवसांनी पेढ्यांचा गोडपणा जरा वाढतो, त्याप्रमाणे साखर कमीजास्त करावी.

Labels:
Pedha, Indian Sweet Recipe, sweets to India, Mithai, Indian Desserts recipe